ৰাজ্যখনত অসম ৰাজ্যিক পৰিবহন বাছ সেৱা আৰম্ভ হোৱাৰে পৰা দূৰনিবতিয়া যাত্ৰী সকলৰ বাবে তিনিচুকীয়া জিলাৰ মাৰ্ঘেৰিটা মহকুমাৰ অসম-অৰুণাচল সীমামূৰীয়া জাগুনত এটা বাছ আস্থানৰ দাবী কৰি আহিছিল স্থানীয় ৰাইজে।
স্বাধীনতাৰ ৭৩ বছৰৰ অন্তত প্ৰথম বাৰৰ বাবে অসম ৰাজ্যিক পৰিবহনৰ এটা বাছ আস্থান জাগুন এ পি বি এন কেম্পৰ সমীপত নিৰ্মান হ’ব।
আজি ৰাজ্যিক পৰিবহন নিগমৰ অধ্যক্ষ অশোক ভট্টৰায়ৰ দ্বাৰা স্থাপন কৰা হ’ল বাছ আস্থানৰ আধাৰশিলা।
জাগুনৰ এ পি বি এন কেম্পৰ সমীপত ২১ লাখ ৫৩ হাজাৰ টকাৰ পুঁজিৰে নিৰ্মাণ হ’ব অসম ৰাজ্যিক পৰিবহন নিগমৰ বাছ আস্থান।
বাছ আস্থানৰ আধাৰশিলা স্থাপন কাৰ্যসূচীত পৰিবহণ নিগমৰ অধ্যক্ষ অশোক ভট্টৰায় উপস্থিত থকাৰ লগতে নিগমৰ বহু বিষয়া-কৰ্মচাৰীৰ লগতে স্থানীয় ৰাইজ উপস্থিত থাকে।
আধাৰশিলা স্থাপনৰ লগত সংগতি ৰাখি অনুষ্ঠিত সভাত ভট্টৰায়ে ভাষণ প্ৰসংগত কয় যে জাগুনত এটা আস্থান নিৰ্মান হ’লে স্থানীয় ৰাইজ বহু পৰিমানে উপকৃত হ’ব।