শুকুৰবাৰে লেবাননৰ বেকা উপত্যকাত ইজৰাইলৰ বিমান আক্ৰমণত কমেও ১০ জন লোক নিহত হোৱাৰ লগতে ৫০ জন আহত হোৱাৰ কথা সংবাদ সংস্থাৰ সূত্ৰসমূহে নিশ্চিত কৰিছে।
ইজৰাইলৰ সেনাই দাবী কৰে যে তেওঁলোকে বালবেক অঞ্চলত হিজবুল্লাহৰ ঘাটিসমূহক লক্ষ্য কৰি আক্ৰমণ চলাইছে।
যোৱা কেইটামান সপ্তাহৰ ভিতৰত পূব লেবাননত ইজৰাইলী আক্ৰমণৰ এইটো অন্যতম ৰক্তাক্ত আক্ৰমণ। এই আক্ৰমণৰ ফলত ইজৰাইল আৰু হিজবুল্লাহৰ মাজত আমেৰিকাৰ মধ্যস্থতাত হোৱা সাময়িক যুদ্ধবিৰতি বিপদৰ মুখত পৰিল। দুয়োপক্ষই বাৰে বাৰে ইটোৱ সিটোক যুদ্ধবিৰতি উলংঘা কৰাৰ অভিযোগ উত্থাপন কৰি আহিছে।
ইজৰাইলৰ সেনাই এক বিবৃতিত কয় যে তেওঁলোকে বালবেক অঞ্চলৰ হিজবুল্লাহ কমাণ্ড চেণ্টাৰত নিখুঁত আক্ৰমণ চলাইছে।
লেবাননৰ নিৰাপত্তা সূত্ৰই জনোৱা মতে নিহতসকলৰ ভিতৰত হিজবুল্লাহৰ এজন জ্যেষ্ঠ নেতা আছে। অৱশ্যে এই আক্ৰমণ সন্দৰ্ভত হিজবুল্লাহৰ কোনো আনুষ্ঠানিক বিবৃতি পোৱা হোৱা নাই।
এবছৰতকৈ অধিক সময় ধৰি চলি থকা সীমান্ত সংঘাতৰ অন্ত পেলাবলৈ ২০২৪ চনত আমেৰিকাৰ মধ্যস্থতাত হিজবুল্লাহ আৰু ইজৰাইলে যুদ্ধবিৰতি চুক্তি স্বাক্ষৰ কৰিছিল। এই চুক্তিৰ মূল লক্ষ্য আছিল ইৰাণৰ সমৰ্থিত গোট হিজবুল্লাহৰ সামৰ্থ্য হ্ৰাস কৰা আৰু সংঘাত বন্ধ কৰা। কিন্তু এই চুক্তিৰ পিছৰে পৰা দুয়োপক্ষই ইটোৱে সিটোক যুদ্ধবিৰতি উলংঘা কৰাৰ অভিযোগ উত্থাপন কৰি আহিছে।
হিজবুল্লাহৰ অস্ত্ৰ-শস্ত্ৰৰ মজুত নিয়ন্ত্ৰণৰ বাবে লেবানন চৰকাৰৰ ওপৰত আমেৰিকা আৰু ইজৰাইলৰ বিষয়াসকলে হেঁচা বৃদ্ধি কৰি আহিছে। অৱশ্যে লেবাননৰ ৰাজনৈতিক নেতাসকলে সকীয়াই দিছে যে ইজৰাইলৰ ইমান বৃহৎ আক্রমণে ইতিমধ্যে অৰ্থনৈতিক আৰু ৰাজনৈতিকভাৱে সংগ্ৰাম কৰি থকা দেশখনক আৰু অধিক অস্থিৰ কৰি তুলিব পাৰে।
একেদিনাই পৃথক অভিযানত ইজৰাইলে দক্ষিণ লেবাননৰ ছিডন চহৰৰ সমীপৰ আইন আল-হিলৱেহ শৰণাৰ্থী শিবিৰত আক্ৰমণ চলায়। ইজৰাইলী বাহিনীয়ে দাবী কৰে যে তাত হামাছৰ কমাণ্ড চেণ্টাৰ আছিল। কিন্তু হামাছে এই দাবী নাকচ কৰি কয় যে আক্ৰমণৰ স্থানটো শৰণাৰ্থী শিবিৰৰ নিৰাপত্তা ৰক্ষাৰ দায়িত্বত থকা যুটীয়া নিৰাপত্তা বাহিনীৰ এটা কাৰ্যালয়হে।
