শুকুৰবাৰে বলিভিয়াৰ ৰাজধানী লা পাজৰ সমীপৰ এল আল্ট’ চহৰৰ ব্যস্ত পথত দুৰ্ঘটনাগ্ৰস্ত হয় বলিভিয়াৰ বায়ুসেনাৰ এখন হাৰকিউলিছ বিমান। স্থানীয় সংবাদ মাধ্যমৰ বাতৰি অনুসৰি এই ঘটনাত কমেও ১৫ জন লোক নিহত হোৱাৰ লগতে ৩০ জন আহত হয়।
জানিব পৰা মতে বিমানখনত বহু টকা কঢ়িয়াই লৈ অনা হৈছিল। ব্যস্ত পথত দুৰ্ঘটনাগ্ৰস্ত বিমানখনৰ ধ্বংসাৱশেষৰ পৰা ধন সংগ্ৰহৰ চেষ্টাত বিশৃংখলতাৰ সৃষ্টি হয়।
বলিভিয়াৰ প্ৰতিৰক্ষা মন্ত্ৰালয়ৰ তথ্য অনুসৰি সামৰিক বিমানখনে বৃহৎ পৰিমাণৰ নতুনকৈ ছপা হোৱা বেংকনোট লৈ এখন চহৰৰ পৰা আন এখন চহৰলৈ যাত্ৰা কৰিছিল। কিন্তু মাজ বাটতে বলিভিয়াৰ ৰাজধানীৰ ব্যস্ত পথত দুৰ্ঘটনাগ্ৰস্ত হয়।
সংবাদ সংস্থাৰ সূত্ৰ অনুসৰি সেই সময়ত পথটোত যথেষ্ট যান-জঁট আছিল। ফলত কেইবাখনো গাড়ীৰ ওপৰত বিমানখন দুৰ্ঘটনাগ্ৰস্ত হোৱা বুলি দাবী কৰা হৈছে।
ছ’চিয়েল মিডিয়াত প্ৰচাৰিত এক ভিডিঅ’ত বিমানখনৰ ধ্বংসাৱশেষ পথত ছিটিকি পৰি থকা দেখা গৈছে। কাষৰ গাড়ী, ঘৰ আৰু ৰাস্তাও ক্ষতিগ্ৰস্ত হয়। উদ্ধাৰকাৰী দলে জুই নিৰ্বাপন কৰি যাত্ৰীসকলক উলিয়াই অনাৰ চেষ্টা চলাইছে।
এটা ভিডিঅ’ই পুনৰ বন্দী কৰিছে চৰম বিশৃংখলতাৰ দৃশ্য। দুৰ্ঘটনাস্থলীৰ সমীপত সিঁচৰতি হৈ থকা বিমানখনে ধন কঢ়িয়াই লৈ আনিছিল। মাটিত পৰি থকা টকাখিনি সংগ্ৰহ কৰিবলৈ হুলস্থুলীয়া পৰিৱেশৰ সৃষ্টি হয়।
সূত্ৰই জনোৱা মতে, স্থানীয় আৰক্ষীয়ে আনকি জল কামান ব্যৱহাৰ কৰিও ভিৰ ছত্ৰভংগ দিবলগীয়া হৈছিল। অৱশ্যে বিমানখনত কিমান টকা বা কিমান মানুহ আছিল সেয়া এতিয়াও স্পষ্ট হোৱা নাই। প্ৰাৰম্ভিক তদন্তত দেখা গৈছে যে বেয়া বতৰৰ বাবেই এই দুৰ্ঘটনা সংঘটিত হৈছে।
