এক্সপ্ৰেছৱে নিৰ্মাণৰ সময়তে খহি পৰে ক্ৰেন। ইয়াৰ ফলত কমেও ১৬ জন শ্ৰমিকৰ মৃত্যু হয়। মঙলবাৰে পুৱাৰ ভাগত সংঘটিত হয় এই ঘটনা। মহাৰাষ্ট্ৰৰ থানে জিলাত সমৃদ্ধি এক্সপ্ৰেছৱেৰ তৃতীয় পৰ্যায়ৰ নিৰ্মাণৰ সময়ত এটা গাৰ্ডাৰ মেচিন বাগৰি পৰে। ইয়াৰ ফলত কমেও ১৬ জন শ্ৰমিকৰ মৃত্যু হোৱা বুলি আৰক্ষীয়ে জানিবলৈ দিয়ে।
বাতৰি অনুসৰি, দুৰ্ঘটনা সংঘটিত কৰা ক্ৰেনখন দলং নিৰ্মাণত ব্যৱহাৰ কৰা এক বিশেষ মেচিন। ইফালে, দুৰ্ঘটনাৰ খবৰ পোৱাৰ পিছতে আৰক্ষী আৰু প্ৰশাসনৰ বিষয়াসকলে সেই স্থানত উপস্থিত হৈছে। উদ্ধাৰ অভিযানৰ বাবে মতা হৈছে ৰাষ্ট্ৰীয় দুৰ্যোগ সঁহাৰি বাহিনীক।
জানিব পৰা মতে, থানে জিলাৰ ছাহাপুৰ তহচিলৰ এখন দলঙৰ ফলকত ক্ৰেনখন বাগৰি পৰে। ইয়াৰ তলত চেপা খাই পৰে প্ৰায় ২০ জন শ্ৰমিক। ইয়াৰে ১৬ জনৰ মৃত্যু হয়। সংকটজনক অৱস্থাত দুজন লোকক চিকিৎসালয়লৈ লৈ যোৱা হয়।
ইপিনে, ক্ৰেনখন পৰি যোৱাৰ ঘটনা পোহৰলৈ অহাৰ লগে লগে ৰাষ্ট্ৰীয় দুৰ্যোগ সঁহাৰি বাহিনী বা এনডিআৰএফৰ দুটা দলক সেই স্থানলৈ প্ৰেৰণ কৰা হয়। লগে লগে উদ্ধাৰ কাম আৰম্ভ কৰে।
এন ডি আৰ এফে জনোৱা মতে, ভাঙি পৰা গাঁথনিটোৰ ভিতৰত এতিয়াও কমেও পাঁচজন লোক আবদ্ধ হৈ থকাৰ আশংকা কৰা হৈছে। এনডিআৰএফৰ লগতে আৰক্ষী আৰু অগ্নিনিৰ্বাপক বাহিনীয়েও উদ্ধাৰ অভিযানত অংশগ্ৰহণ কৰে।
উল্লেখ্য যে নিৰ্মাণকাৰ্যৰ সময়ত এই দুৰ্ঘটনা সংঘটিত হোৱা ঘাইপথটোৰ সম্পূৰ্ণ নাম ‘হিন্দু হৃদয়সম্ৰাট বালাচাহেব থাকৰে মহাৰাষ্ট্ৰ সমৃদ্ধি মহামাৰ্গ’। মুম্বাই আৰু নাগপুৰ সংযোগী এই এক্সপ্ৰেছৱে ৭০১ কিলোমিটাৰ দৈৰ্ঘ্যৰ। এই এক্সপ্ৰেছৱে নাগপুৰ, ৱাছিম, ৱৰ্ধা, আহমেদনগৰ, বুলধনা, ঔৰংগাবাদ, আমৰাৱতী, জালনা, নাচিক আৰু থানেকে ধৰি ১০খন জিলাৰ ওপৰেৰে পাৰ হৈ যায়। এই সমৃদ্ধি মহামাৰ্গ নিৰ্মাণৰ কাম মহাৰাষ্ট্ৰ ৰাজ্যিক পথ উন্নয়ন নিগমৰ উদ্যোগত।
এই এক্সপ্ৰেছৱেৰ প্ৰথম পৰ্যায়ৰ কাম সম্পূৰ্ণ হৈছে। এতিয়া সেই ৰাস্তাৰে নাগপুৰৰ পৰা শিৰডী যাব পাৰি। প্ৰধানমন্ত্ৰী নৰেন্দ্ৰ মোদীয়ে ২০২২ চনৰ ডিচেম্বৰ মাহত এই অংশটো উদ্বোধন কৰিছিল। ইয়াৰ পূৰ্বে যোৱা মে’ মাহত মুখ্যমন্ত্ৰী একনাথ ছিণ্ডে কৈছিল যে চলিত বৰ্ষৰ ডিচেম্বৰৰ শেষৰ ফালে এক্সপ্ৰেছৱেৰ তৃতীয় আৰু অন্তিম পৰ্যায়ৰ কাম সম্পূৰ্ণ হ’ব। বৰ্তমান থানেত তৃতীয় পৰ্যায়ৰ কাম চলি আছিল।
