আফগানিস্তানৰ কাবুলত এক ভয়াৱহ সন্ত্ৰাসবাদী আক্ৰমণৰ ঘটনা সংঘটিত হৈছে। কাবুল বিশ্ববিদ্যালয়ত সংঘটিত এই আক্ৰমণটোত ১৯ গৰাকী লোক নিহত হোৱাৰ লগতে ২২ গৰাকীকৈ লোক গুৰুতৰভাৱে আহত হৈছে।
বিশ্ববিদ্যালয়ৰ পৰিসৰত এখনি গ্ৰন্থমেলা চলি থকাৰ সময়তে এই ভয়ংকৰ আক্ৰমণটো সংঘটিত হয়।
আক্ৰমণৰ সময়ত বিশ্ববিদ্যালয়খনত আফগানিস্তানৰ ইৰাণী ৰাষ্ট্ৰদূতৰ লগতে আন বহুতো গণ্য মান্য ব্যক্তি উপস্থিত আছিল।
দেশখনৰ অভ্যন্তৰিণ মন্ত্ৰ্যালয়ৰ মুখপাত্ৰ তাৰিক এৰিয়ানে জানিবলৈ দি কয় যে সুৰক্ষা কৰ্মীৰে হোৱা সংঘৰ্ষত আক্ৰমণকাৰী কেইজন নিহত হৈছে।
তেওঁ লগতে জানিবলৈ দি কয় যে এই আক্ৰমণটোত তিনিজন সন্ত্ৰাসবাদী জৰিত আছিল আৰু ইয়াৰে এজনৰ বিস্ফোৰণৰ সময়তে মৃত্যু ঘটে আৰু আন দুজন সুৰক্ষা কৰ্মীৰ হাতত নিহত হয়।
আন একাংশ সংবাদ মাধ্যমত প্ৰকাশ পোৱা অনুসৰি, বন্দুকধাৰী আক্ৰমণকাৰী কেইজনে শিক্ষাৰ্থীসকলক উদ্দেশ্যি গুলীবৰ্ষণ কৰি সেই ঠাইৰ পৰা পলাই গৈছিল।
বিশ্ববি্দ্যালয়খনৰ আহমদ চমিম নামৰ এগৰাকী শিক্ষাৰ্থীয়ে কোৱা মতে এই আক্ৰমণৰ ঘটনাটো বিশ্ববিদ্যালয়খনৰ পূব দিশে ঘটিছিল।
ইফালে এই নৃশংস ঘটনাৰ সৈতে কোন সন্ত্ৰাসবাদী সংগঠন জৰিত আছে তাৰ চৰ্চা চলি থকাৰ সময়তে তালিবান ইয়াৰ সৈতে জৰিত নাই বুলি এক বিবৃতিৰ জৰিয়তে স্পষ্ট কৰি দিয়ে।