আমেৰিকাৰ শিক্ষানুষ্ঠানত পুনৰ বন্দুকধাৰীৰ আক্ৰমণ। ব্ৰাউন বিশ্ববিদ্যালয়ত পৰীক্ষাৰ সময়ত নিৰ্বিচাৰ গুলীচালনাৰ অভিযোগ উত্থাপন হৈছে। ক’লা পোছাক পৰিহিত বন্দুকধাৰীৰ গুলীচালনাত কমেও দুজন লোক নিহত হোৱাৰ বিপৰীতে ৮জন গুৰুতৰভাৱে আহত হয়। বৰ্তমান বন্দুকধাৰীজন পলাতক। তেওঁৰ সন্ধানত অভিযান চলি আছে।
জানিব পৰা মতে, স্থানীয় সময় অনুসৰি শনিবাৰে বিশ্ববিদ্যালয়খনৰ অভিযান্ত্ৰিক আৰু পদাৰ্থ বিজ্ঞানৰ ভৱনত এজন বন্দুকধাৰীয়ে প্ৰৱেশ কৰি গুলীচালনা আৰম্ভ কৰে। সেই সময়ত ছাত্ৰ-ছাত্ৰীসকলে ছেমিষ্টাৰৰ চূড়ান্ত পৰীক্ষা দি আছিল। লগে লগে সমগ্ৰ কেম্পাছতে আতংক বিয়পি পৰে।
ঘটনাৰ তিনি ঘণ্টাৰো অধিক সময়ৰ পাছতো সন্দেহজনক লোকজনক এতিয়াও বিচাৰি পোৱা নাই। উপ আৰক্ষী অধীক্ষক টিমোথি অ’হাৰাৰ মতে, সন্দেহযুক্ত লোকজন আছিল ক’লা কাপোৰ পিন্ধা এজন লোক। এই আক্ৰমণৰ পিছত শেষবাৰৰ বাবে অভিযান্ত্ৰিক ভৱনৰ পৰা ওলাই অহা দেখা গৈছিল সন্দেহজনক লোকজনক। কিন্তু তাৰ পিছত তেওঁ ক’লৈ গ’ল সেয়া এতিয়াও স্পষ্ট হোৱা নাই। সমগ্ৰ কেম্পাছত তলা লগাই দিয়া হৈছে।
মেয়ৰ স্মাইলীয়ে কয়, ‘আঘাতপ্ৰাপ্ত আঠজনৰ অৱস্থা গুৰুতৰ যদিও সুস্থিৰ। নিহতসকল ছাত্ৰ-ছাত্ৰী নে সেই সন্দৰ্ভত কোনো মন্তব্য দিবলৈ অস্বীকাৰ কৰে মেয়ৰগৰাকীয়ে। আমেৰিকাৰ ৰাষ্ট্ৰপতি ড’নাল্ড ট্ৰাম্পে বিশ্ববিদ্যালয়খনত গুলীচালনাৰ বিষয়ে অৱগত কৰা বুলি জানিবলৈ দিয়ে। তেওঁ কয়, “এতিয়া আমি মাত্ৰ ভুক্তভোগীৰ বাবে প্ৰাৰ্থনা কৰিব পাৰো।এয়া অতি দুখজনক।”
ইপিনে, ৰোড আইলেণ্ডৰ গৱৰ্ণৰ ডেন মেকিয়ে কয়, “এটা অকল্পনীয় ঘটনা ঘটিছে। তেওঁৰ কাৰ্যালয় গুলীচালনাৰ সন্দৰ্ভত হোৱাইট হাউছৰ সৈতে যোগাযোগত আছে।”
বিশ্ববিদ্যালয়খনৰ ৱেবছাইট অনুসৰি এই আক্ৰমণ সংঘটিত হোৱা অট্টালিকাটোত ১০০টাতকৈও অধিক লেব, কেইবা ডজন শ্ৰেণীকোঠা আৰু কাৰ্যালয় আছে। গুলীচালনাৰ সময়ত তাত অভিযান্ত্ৰিক ডিজাইন পৰীক্ষা চলি আছিল।
অভিযান্ত্ৰিক বিভাগৰ গৱেষক ছাত্ৰ চিয়াংহেং চিয়েনে কয় যে ওচৰৰ লেবত থকা ছাত্ৰ-ছাত্ৰীসকলে গুলীচালনাৰ শব্দ শুনি ডেস্কৰ তলত লুকাই লাইট বন্ধ কৰি দিয়ে। নিউয়ৰ্ক চহৰৰ ২০ বছৰীয়া জুনিয়ৰ মেৰী কেমাৰাই পুথিভঁৰালৰ পৰা ওলাই আহি আশ্ৰয় বিচাৰি টেকেৰিয়াত (মেক্সিকান ৰেষ্টোৰা) সোমাইছিল। আৰক্ষীয়ে কেম্পাছত তালাচী চলাই থকাৰ সময়ত তিনি ঘণ্টাৰো অধিক সময় মেৰী তাত আবদ্ধ হৈ আছিল।
