মেক্সিকোৰ এখন চুপাৰ মাৰ্কেটত বিস্ফোৰণৰ ফলত অগ্নিকাণ্ড সংঘটিত হয়। এই ঘটনাত ২৩ জন লোক নিহত হোৱাৰ লগতে আৰু কমেও ১১ জন আহত হয়। শনিবাৰে মেক্সিকোৰ উত্তৰ-পশ্চিম চহৰ হাৰ্মোচিলোৰ শ্বপিং মলত এই বিস্ফোৰণৰ ফলত অগ্নিকাণ্ড সংঘটিত হোৱা বুলি জানিব পৰা গৈছে।
অৱশ্যে বিস্ফোৰণৰ কাৰণ এতিয়াও জানিব পৰা হোৱা নাই। ছ’নোৰা প্ৰদেশৰ গৱৰ্ণৰ আলফনছ ডুৰাজোৱে ২৩ জন লোকৰ মৃত্যু হোৱা বুলি নিশ্চিত কৰিছে। এই ঘটনাক লৈ দেশৰ ৰাষ্ট্ৰপতি ক্লাউডিয়া শ্বেইনবামে শোক প্ৰকাশ কৰে।
ছ’নোৰা প্ৰদেশৰ হাৰ্মোচিলোৰ মাজমজিয়াত থকা ৱাল্ডো ষ্ট’ৰত বিস্ফোৰণৰ শব্দ শুনা যায়। ইয়াৰ পিছত তাতেই জুই বিয়পি পৰে। এই খবৰ পাই ৰেড ক্ৰছ আৰু প্ৰদেশখনৰ অগ্নিনিৰ্বাপক বাহিনীৰ লোক উপস্থিত হয়। মৃত আৰু আহতসকলক উদ্ধাৰ কৰি স্থানীয় চিকিৎসালয়লৈ লৈ যোৱা হয়।
কিহৰ বাবে অগ্নিকাণ্ড সংঘটিত হৈছে সেয়া এতিয়াও স্পষ্ট হোৱা নাই। সেয়ে স্থানীয় প্ৰশাসনে দুৰ্ঘটনাৰ কাৰণ সন্দৰ্ভত এক প্ৰতিবেদনৰ আহ্বান জনাইছে। অৱশ্যে ‘আক্ৰমণ’ৰ বাবে বিস্ফোৰণৰ সম্ভাৱনা নুই কৰিছে স্থানীয় প্ৰশাসনে।
স্থানীয় প্ৰশাসনৰ সূত্ৰ অনুসৰি নিহতসকলৰ ভিতৰত ১২গৰাকী মহিলা, ৫ জন পুৰুষ, ৪ জন ল’ৰা আৰু ২ গৰাকী ছোৱালীও আছে। ইতিমধ্যে দেশৰ ৰাষ্ট্ৰপতিগৰাকীয়ে মৃতকৰ পৰিয়ালক সকলো ধৰণৰ সাহায্য প্ৰদানৰ বাবে বিশেষ দল গঠনৰ নিৰ্দেশ দিছে।
স্থানীয় প্ৰশাসনেও আহতসকলৰ চিকিৎসাৰ ওপৰত নজৰ ৰাখিছে। ফৰেনছিক চিকিৎসা সেৱাৰ উদ্ধৃতি দি প্ৰদেশখনৰ এটৰ্নী জেনেৰেল গুস্তাভো চালাছে কয় যে অধিকাংশ লোকৰ মৃত্যু হৈছে বিষাক্ত গেছৰ বাবে।
এই কাণ্ড সন্দৰ্ভত মেক্সিকোৰ ৰাষ্ট্ৰপতি ক্লাউডিয়া শ্বেইনবামে কয়, ‘হাৰ্মচিলো ষ্ট’ৰৰ অগ্নিকাণ্ডত মৃত্যু হোৱা লোকসকলৰ আপোনজনক মই সমবেদনা জ্ঞাপন কৰিছো। ছ’নোৰাৰ গৱৰ্ণৰ আলফনছ ডুৰাজোৰ সৈতে মোৰ যোগাযোগ হৈছে। ভুক্তভোগীক সকলো ধৰণৰ সহায় আগবঢ়োৱা হ’ব।’
এই ঘটনা সন্দৰ্ভত ছ’চিয়েল মিডিয়াত ছ’ন’ৰাৰ গৱৰ্ণৰ আলফনছ’ ডুৰাজোৱে লিখিছে, ‘ছ’নোৰাৰ বাবে এইটো এটা অতি দুখজনক দিন। বিশেষকৈ আপোনজনক হেৰুওৱা সকলৰ বাবে। ৰাজ্য চৰকাৰে ভুক্তভোগী পৰিয়ালক সম্ভৱপৰ সকলো সাহায্য আগবঢ়াব।‘
