ভয়াবহ এক শিহৰণকাৰী ঘটনা! এজন প্ৰাক্তন আৰক্ষী কৰ্মীয়ে উত্তৰ-পূব থাইলেণ্ডৰ এটা শিশু সেৱা কেন্দ্ৰত (চাইল্ডকেয়াৰ চেন্টাৰ) প্ৰৱেশ কৰি নিৰ্বিচাৰে গুলীচালনা কৰে। এই ঘটনাত এতিয়ালৈকে ঘটনাটোত ৩৪ জন লোকৰ মৃত্যু হোৱাৰ খবৰ পোৱা গৈছে। মৃতসকলৰ ভিতৰত ২২ টি শিশু আৰু শিশু সেৱা কেন্দ্ৰটোৰ ১৪ জন কৰ্মচাৰী আছিল।
স্থানীয় আৰক্ষী সূত্ৰই জনোৱা অনুসৰি আক্ৰমণকাৰীজনক এজন প্ৰাক্তন আৰক্ষী পানায়া কামৰাব বুলি চিনাক্ত কৰা হৈছে। গুলীচালনাৰ পিছত তেওঁ এখন বগা পিকআপ ভেনত পলাই গৈছিল।
ইপিনে, থাই সংবাদ মাধ্যমৰ এক বাতৰি অনুসৰি ঘৰলৈ উভতি অহাৰ পিছত হত্যাকাৰী আৰক্ষীজনে তেওঁৰ পত্নী আৰু সন্তানক হত্যা কৰি আত্মহত্যা কৰে।
থাইলেণ্ড আৰক্ষীয়ে কয় যে ঘটনাটো নং বুৱা লাম্পুৰ এটা শিশু সেৱা কেন্দ্ৰত সংঘটিত হৈছিল। মধ্যাহ্নভোজনৰ সময়ত আক্ৰমণকাৰীজনে শিশু সেৱা কেন্দ্ৰত প্ৰৱেশ কৰিছিল আৰু নিৰ্বিচাৰভাৱে গুলীচালনা কৰে।
এনে আক্ৰমণ কিয় সংঘটিত কৰিলে সেয়া এতিয়াও জানিব পৰা হোৱা নাই। কিন্তু অতি শিহৰণকাৰী কথাটো হ’ল যে গুলীয়াই হত্যা কৰাৰ পিছত তেওঁ মৃত্যু নিশ্চিত কৰিবলৈ শিশুসকলক চুৰিৰে আঘাত কৰিছিল।
সূত্ৰসমূহৰ মতে আক্ৰমণকাৰীজনে শিশু সেৱা কেন্দ্ৰটোত প্ৰৱেশ কৰি প্ৰথমে এজন শিক্ষকসহ পাঁচজনক গুলীয়ায়। এগৰাকী শিক্ষয়িত্ৰীয়ে কয়, “প্ৰথমতে এনে লাগিছিল যে কোনো ফটকা ফুটি আছে। পিছত মই আক্ৰমণকাৰীজনক বন্দুকৰ সৈতে দেখিলো।‘’
লক্ষ্যনীয় বিষয়টো হ’ল যে থাইলেণ্ডত সাধাৰণ লোকৰ অবৈধ বন্দুক ৰখাৰ হাৰ অঞ্চলটোৰ আন দেশতকৈ বহু বেছি। কাৰণ থাইলেণ্ডত অস্ত্ৰৰ চোৰাং সৰবৰাহ এটা অতি সহজ ঘটনা। কিন্তু দেশখনত পূৰ্বতে এনেধৰণৰ গণহত্যা বেছি হোৱা নাছিল। অৱশ্যে ২০২০ চনত এজন সেনা জোৱান গুলীচালনা কৰি ২০ জন লোকক হত্যা কৰিছিল।
