পুনৰ দক্ষিণৰ চলচ্চিত্ৰ জগতৰ তাৰকাৰ অনুষ্ঠানৰ মাজত এক বৃহৎ দুৰ্ঘটনা সংঘটিত হৈছে। অভিনেতা-ৰাজনীতিক বিজয়ৰ ৰাজনৈতিক বিজয় সমাৱেশত গৈ হেঁচা-ঠেলাত এক মৰ্মান্তিক পৰিস্থিতিৰ সৃষ্টি হয়।
শনিবাৰে তামিলাগা ভেত্ৰী কাঝাগামৰ মুৰব্বী বিজয়ৰ এই বিজয় সমাৱেশত প্ৰায় ৩০ হাজাৰ লোক সমবেত হৈছিল। এতিয়ালৈকে সেই সমাৱেশত হোৱা পদপিষ্টৰ এই দুৰ্ঘটনাত প্ৰায় ৩৮ জন লোকৰ মৃত্যু হৈছে।
তামিলনাডুৰ কাৰুৰত অভিনেতা তথা টিভিকেৰ প্ৰতিষ্ঠাপক বিজয়ৰ ৰাজহুৱা সমাৱেশত এই পৰ্যন্ত ৩৮ জন লোকে প্ৰাণ হেৰুৱাইছে। নিশ্চিত নোহোৱা সূত্ৰৰ মতে, মৃত্যুৰ সংখ্যা ৩৯ লৈ বৃদ্ধি পাইছে। প্ৰথমতে জনা গৈছে যে মৃতকৰ ভিতৰত ১৬ গৰাকী মহিলা আৰু ৮ গৰাকী শিশুও আছে। সংকটজনক অৱস্থাত বহু লোক চিকিৎসাধীন হৈ আছে চিকিৎসালয়ত। ফলত মৃতকৰ সংখ্যা আৰু বৃদ্ধি পাব পাৰে বুলি আশংকা কৰা হৈছে।
সৰ্বভাৰতীয় সংবাদ মাধ্যমৰ সূত্ৰ অনুসৰি শনিবাৰে সেই সমাৱেশত অভিনেতা-ৰাজনীতিক বিজয়েও ভাষণ দিছিল। ভাষণ শেষ হোৱাৰ পিছতে হুলস্থুলীয়া পৰিৱেশৰ সৃষ্টি হয়। ইয়াৰ পিছত বিজয়ে বুজি পালে যে পৰিস্থিতি মৰ্মান্তিক হৈ পৰিছে। সমাৱেশত ক্ষতিগ্ৰস্ত লোকসকলে আৰক্ষীৰ পৰা সহায় বিচাৰিছিল। বিজয়ে নিজেই ভিৰৰ মাজত আহতসকলক পানীৰ বটলেৰে সহায় কৰিবলৈ চেষ্টা কৰিছিল। তেওঁ এম্বুলেন্সৰো ব্যৱস্থা কৰে, কিন্তু তাতো শেষ ৰক্ষা নহ’ল।
ইতিমধ্যে তামিলনাডু চৰকাৰে পদক্ষেপ গ্ৰহণ কৰিছে। চৰকাৰে মৃত আৰু আহতসকলৰ কাষত থিয় দি তেওঁলোকৰ চিকিৎসাৰ ব্যৱস্থা কৰি, সম্ভৱপৰ সকলো সহায় আগবঢ়াবলৈ চেষ্টা কৰিছে। লগতে জনসমাগম নিয়ন্ত্ৰণ কৰি পৰিস্থিতি যিমান পাৰি নিয়ন্ত্ৰণ কৰাৰ প্ৰয়াস কৰা হৈছে। ইয়াৰ পূৰ্বেও আল্লু অৰ্জুনৰ অনুষ্ঠানত একেধৰণৰ ভয়ানক পৰিস্থিতিৰ সৃষ্টি হৈছিল। বিজয়ৰ সমাৱেশৰ এই ঘটনাই সেই স্মৃতি ঘূৰাই আনিলে।
ইপিনে, নিজৰ প্ৰথম প্ৰতিক্ৰিয়াত অভিনেতা বিজয়ে কয়, “মোৰ হৃদয় ভাঙি গৈছে। মই ইমানেই অসহ্যকৰ যন্ত্ৰণাত ছটফটাই আছো যে শব্দৰে প্ৰকাশ কৰাটো অসম্ভৱ।”
তেওঁ লগতে লিখিছে, “কাৰুৰত প্ৰাণ হেৰুৱাই পেলোৱা মোৰ মৰমৰ ভাই-ভনীসকলৰ পৰিয়াললৈ গভীৰ সমবেদনা জ্ঞাপন কৰিছো। চিকিৎসালয়ত চিকিৎসাধীন হৈ থকাসকলৰ আশু আৰোগ্য কামনা কৰিছো।”
জানিব পৰা মতে বিজয়ে দুপৰীয়া ১২ বজাত ৰেলী অনুষ্ঠিত কৰাৰ কথা আছিল যদিও সন্ধিয়া ৬ বজাৰ ভিতৰত বিজয়ে উপস্থিত হয়। তেতিয়ালৈকে সভাস্থলীত মানুহৰ আগমনৰ বাবে ৰাস্তা-ঘাট, বেৰিকেড, আনকি প্ৰচাৰ বাছসমূহো বন্ধ হৈ পৰিছিল। হয়তো এই দীঘলীয়া বিলম্বক লৈয়েই আৰম্ভ হৈছে ৰাজনৈতিক উত্তেজনা।
এই সন্দৰ্ভত ডি এম কেৰ মুখপাত্ৰ সাৰাভানন আন্নাদুৰাইয়ে সংবাদ সংস্থাক কয় যে, “এয়া পৰিকল্পিতভাৱে কৰা হৈছে। জনসমাৱেশ বৃদ্ধিৰ বাবে ইচ্ছাকৃতভাৱে পলম কৰা হৈছে। এয়া সস্তীয়া ৰাজনৈতিক কৌশল। বিজয়ে দায়িত্ব এৰাই চলিব নোৱাৰে। দোষীসকলক গ্ৰেপ্তাৰ কৰিবই লাগিব।”
আনহাতে, ৰাজ্যৰ মুখ্যমন্ত্ৰী ষ্টেলিনে সমগ্ৰ ঘটনাৰ তদন্ত আৰু ক্ষতিপূৰণ আয়োগ ঘোষণা কৰিছে। এক বিবৃতিত তামিলনাডুৰ মুখ্যমন্ত্ৰী এম কে ষ্টেলিনে মৃতকৰ পৰিয়ালক ১০ লাখ টকাৰ ক্ষতিপূৰণ দিয়া হ’ব বুলি জানিবলৈ দিয়ে। আহতসকলৰ বাবে উত্তম চিকিৎসা সুবিধা নিশ্চিত কৰাৰ নিৰ্দেশ দিছে। তদুপৰি এই ভয়াবহ কাণ্ডত উচ্চ ন্যায়ালয়ৰ অৱসৰপ্ৰাপ্ত ন্যায়াধীশ অৰুণা জগদীশনৰ নেতৃত্বত এজনীয়া সদস্যৰ আয়োগ গঠন কৰা হৈছে।
তেওঁ কয়, “এই হৃদয় বিদাৰক ঘটনাত আমি সকলোৱে স্তম্ভিত হৈছো।মই কাৰুৰলৈ যাম, মৃতকৰ পৰিয়ালক লগ কৰি হস্পিতাললৈ গৈ আহতসকলৰ অৱস্থাৰ বুজ লম।”
ইপিনে, সমগ্ৰ ঘটনাই কাৰুৰ জিলাৰ চিকিৎসালয় আৰু প্ৰশাসনিক মহলত চৰম আতংক আৰু বিশৃংখলতাৰ সৃষ্টি কৰিছে। বহু পৰিয়াল এতিয়াও নিজৰ আপোনজনৰ সন্ধানত উদ্বিগ্ন। কেইবাজনো প্ৰত্যক্ষদৰ্শীৰ মতে, “বেৰিকেডবোৰ ভাঙি পৰাৰ পিছত মানুহে ইজনে সিজনক পিষ্ট কৰি পলাবলৈ চেষ্টা কৰিছিল।”
এই ঘটনাৰ ৰাজনৈতিক উত্তাল পৰিস্থিতিৰ সমান্তৰালকৈ এটা ডাঙৰ প্রশ্ন উত্থাপন হৈছে– ইমান বৃহৎ সমাৱেশত নিৰাপত্তা আৰু জনসমাগম নিয়ন্ত্রণৰ ব্যর্থতাৰ দায়িত্ব শেষত কোনে ল’ব?
