মৌনি অমৱস্যাৰ সময়ত মহাকুম্ভত অত্যধিক জনসমাগমৰ বাবে এক ভয়াবহ দুৰ্ঘটনা সংঘটিত হয়। প্ৰথম অৱস্থাত ১৫ জন লোকৰ মৃত্যুৰ আশংকা কৰা হৈছিল। কিন্তু প্ৰায় ২০ ঘণ্টাৰ পাছতো আনুষ্ঠানিকভাৱে মৃত্যু হোৱা লোকৰ সংখ্যা ঘোষণা কৰা হোৱা নাই। উত্তৰ প্ৰদেশ আৰক্ষীয়ে ঘোষণা কৰিছে যে এই ঘটনাত ৩০ জন লোকৰ মৃত্যু আৰু কমেও ৬০ জন লোক গুৰুতৰভাৱে আহত হৈছে। অৱশ্যে ৰয়টাৰৰ সূত্ৰ অনুসৰি এই ঘটনাত ৪০ জন লোকৰ মৃত্যু হৈছে।
প্ৰয়াগৰাজ আৰক্ষীৰ হৈ ডিআইজি বৈভৱ কৃষ্ণই সংবাদমেলত কয় যে পুৱা ১ বজাৰ পৰা ২ বজাৰ ভিতৰত এই ভয়াবহ ঘটনা সংঘটিত হয়। মৃত্যু হৈছে ৩০ জন লোকৰ। মৃতকৰ ২৫ জনৰ চিনাক্তকৰণো সম্ভৱ হৈছে বুলিও তেওঁ কয়। বাকী ৫ জন লোকক চিনাক্তকৰণৰ প্ৰচেষ্টা অব্যাহত আছে।
ইপিনে, সংবাদ সংস্থা ৰয়টাৰে প্ৰকাশ কৰা অনুসৰি, ৰাজ্যিক আৰক্ষীয়ে মৃত্যুৰ সংখ্যা ৩০ জন বুলি ঘোষণা কৰিছে যদিও তিনিটা আৰক্ষী সূত্ৰই জনোৱা মতে, এই পদপিষ্টৰ ঘটনাৰ পিছত প্ৰায় ৪০টা মৃতদেহ মৰ্গলৈ অনা হয়। হাৰ্ট এটেকত আক্ৰান্ত হৈ মৃত্যু হোৱা একাংশ লোকৰ মৃত্যু হোৱা বুলি চিকিৎসালয় কৰ্তৃপক্ষই জনায়। পবিত্ৰ স্নানৰ বাবে ভক্তসকলে নদীত নামিবলৈ ভিৰ কৰা সময়তে এই ঘটনা সংঘটিত হয়। প্ৰশাসনে আশা কৰিছিল যে এই দিনটোত ১০ কোটি লোক উপস্থিত থাকিব।
মঙলবাৰে মাজনিশা প্ৰয়াগৰাজৰ ত্ৰিবেণী সংগমলৈ লাখ লাখ ভক্তই পবিত্ৰ স্নানৰ বাবে ভিৰ কৰে। মাজনিশা কোনোবা এটা সময়ত বেৰিকেড ভাঙি যায়। ঠেলাঠেলিত চৰম বিশৃংখলতাৰ সৃষ্টি হয়। তাতেই পদপিষ্টৰ ঘটনা সংঘটিত হয়। কিন্তু ডি আই জি বৈভৱ কৃষ্ণই দাবী কৰে যে পদপিষ্টত চিকিৎসাধীন হৈ থকা গুৰুতৰভাৱে আহত লোকসকলৰ কোনো এজনৰ অৱস্থা সংকটজনক নহয় আৰু সকলো বিপদৰ বাহিৰত।
পদপিষ্টৰ ঘটনাৰ পিছত গংগা, যমুনা আৰু সৰস্বতীৰ সংগমস্থলী ত্ৰিবেণী সংগম খালী কৰি দিয়া হয়। কিন্তু বুধবাৰে দুপৰীয়াৰ কিছু সময়ৰ পাছতেই সাধু, সন্ন্যাসী, ভক্তসকলে এজন এজনকৈ তালৈ যাবলৈ ধৰে। পবিত্ৰ স্নানো আৰম্ভ হয়। ইফালে মৃতকৰ খবৰো আহিল।
কুম্ভমেলাত এনে দুৰ্ঘটনা নতুন কথা নহয়। মেলাৰ ইতিহাসত কোৱা হৈছে যে পবিত্ৰ স্নান কৰাৰ সময়ত বহু লোক পদপিষ্ট হৈছে। ১৯৫৪ চনত প্ৰথম কুম্ভ মেলাৰ পৰা ২০২৫ চনলৈকে তালিকাখন বৰ চুটি নহয়। ইয়াৰ পূৰ্বে ১৯৮৬, ২০০৩, ২০১৩ চনতো এনে কাণ্ড সংঘটিত হৈছিল।
ইয়াৰ পূৰ্বে প্ৰয়াগৰাজৰ কুম্ভ মেলা চৌহদত অগ্নিকাণ্ড সংঘটিত হৈছিল। ভিৰত অসুস্থ হৈ পৰাৰ ঘটনা সাধাৰণতে দেখা যায়। এইবাৰ হুলস্থুলত ইমানবোৰ মানুহৰ মৃত্যু হ’ল! ইতিমধ্যে সমগ্ৰ বিষয়টোক লৈ বিৰোধীয়ে বিজেপি চৰকাৰৰ বিৰুদ্ধে সৰৱ হৈছে। ধৰ্মীয় স্থানত ‘ভিআইপি সংস্কৃতি’ৰ প্ৰসংগ তুলি টাৰ্গেট কৰা হৈছে মোডী চৰকাৰক।
