কৰ’নাৰ ভেকচিন প্ৰদানৰ প্ৰথমটো দিনটোত ভেকচিনৰ পাৰ্শ্ব প্ৰতিক্ৰিয়াৰ বহুকেইটা ঘটনাৰ বাতৰি পোৱা গৈছে।
বাতৰি অনুসৰি, ৰাজধানী দিল্লীতেই ভেকচিন গ্ৰহণৰ পাছত ৫২জন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছে।
ইয়াৰ ভিতৰত ৫১জনৰ দেহত সামান্য আৰু এজনৰ দেহত গুৰুতৰ পাৰ্শ্ব প্ৰতিক্ৰিয়া দেখা দিছে।
সেইদৰে তেলেংগানাত ১১জনৰ দেহত পাৰ্শ্ব প্ৰতিক্ৰিয়া দেখা দিয়াৰ কথা জানিব পৰা গৈছে।
শনিবাৰৰ পৰা সমগ্ৰ দেশতে আৰম্ভ হৈছে কৰ’নাৰ ভেকচিন প্ৰদানৰ কাৰ্যসূচী। দুই এটা সৰু ঘটনাৰ কথা বাদ দিলে গোটেই দেশতে প্ৰথমটো দিনৰ টীকাকৰণ প্ৰক্ৰিয়া সুকলমে পাৰ হৈ যায়।
কিন্তু নিশা আগবাঢ়ি যোৱালৈকে বহুকেইটা পাৰ্শ্ব প্ৰতিক্ৰিয়াৰ ঘটনা পোহৰলৈ আহিছে।
কলকাতাত এগৰাকী নাৰ্ছ অসুস্থ হৈ পৰাৰ খৱৰ পোৱা গৈছে। তেওঁক হাস্পাতলত ভৰ্তি কৰা হয়।
দিল্লীত টীকাকৰণৰ পাছতে দুজন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছিল। দুয়োজনকে চৰক পালিকা হাস্পাতলত ভেকচিন প্ৰদানৰ পাছত বুকুত চাপ অনুভৱ কৰে। আধা ঘন্টা পৰ্যবেক্ষণত ৰখাৰ পাছত স্বাভাৱিক হৈ পৰাত তেওঁলোকক যাবলৈ দিয়া হয়।
দিল্লী চৰকাৰৰ স্বাস্থ্য বিভাগৰ সূত্ৰ অনুসৰি দিল্লীত মুঠ ৫২জন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছিল। দক্ষিণ দিল্লীৰ এজন স্বাস্থ্যকৰ্মী গুৰুতৰভাৱে অসুস্থ হৈ পৰা বুলি কোৱা হৈছে।
অৱশ্যে, সন্ধিয়া কেন্দ্ৰীয় স্বাস্থ্যমন্ত্ৰী হৰ্ষ বৰ্দ্ধনে সংবাদমেলত দাবী কৰে যে টীকাকৰণৰ পাছত দেশত কোনো ডাঙৰ পাৰ্শ্ব প্ৰতিক্ৰিয়াৰ ঘটনা ঘটা নাই।
দিল্লী চৰকাৰৰ ফালৰ পৰাও এতিয়ালৈকে চৰকাৰীভাৱে কোনো বিবৃতি প্ৰকাশ কৰা হোৱা নাই।
ইপিনে, কো-উইন এপৰ সমস্যাত ভূগিছে কেইখনমান ৰাজ্য। এনে সমস্যাৰ বাবে মহাৰাষ্ট্ৰত ১৮জানুৱাৰিলৈকে টীকাকৰণ স্থগিত ৰখা হৈছে।
