যোৱা নিশা নেপালকে ধৰি উত্তৰ ভাৰতৰ বিস্তৃত অঞ্চল এক প্ৰবল ভূমিকম্পই জোকাৰি যায়। ৰিখটাৰ স্কেলত এই ভূমিকম্পৰ প্ৰাবল্য আছিল ৬.৪। এই অতি শক্তিশালী ভূমিকম্পত এতিয়ালৈকে নেপালত কমেও ৭০ জন লোকৰ মৃত্যু হৈছে। যোৱা নিশাৰ ভূমিকম্পই নেপালৰ বাহিৰেও দিল্লী, উত্তৰ প্ৰদেশ, উত্তৰাখণ্ড, বিহাৰকে ধৰি ভাৰতৰ বহু অঞ্চল কঁপাই গৈছিল। অৱশ্যে ভাৰতত এতিয়ালৈকে কোনো লোক হতাহতৰ খবৰ পোৱা হোৱা নাই।
ইপিনে, নেপালত মৃত্যুৰ সংখ্যা আৰু বৃদ্ধি পাব পাৰে বুলি আশংকা কৰা হৈছে। স্থানীয় প্ৰশাসনে জনাইছে যে ভূমিকম্পৰ বাবে বহু ঠাইৰ সৈতে যোগাযোগ বিচ্ছিন্ন হৈ পৰিছে। এনে পৰিস্থিতিত নিশাৰ পৰা উদ্ধাৰ অভিযানৰ কাম আৰম্ভ হয়। এই পৰ্যন্ত ৭০ টা মৃতদেহ উদ্ধাৰ কৰা হৈছে।
জানিব পৰা মতে, যে ভূমিকম্পত আৰু বহু লোক আহত হৈছে। ইয়াৰে বহুকেইজনক চিকিৎসালয়ত ভৰ্তি কৰোৱা হৈছে।
লগতে পঢ়কঃ গুৱাহাটীত উপস্থিত ভূটানৰ ৰজা; মুখ্যমন্ত্ৰীকে ধৰি ৰাজ্য আৰু কেন্দ্ৰীয় বিষয়াবৰ্গৰ আদৰণি
ভাৰতীয় ৰাষ্ট্ৰীয় ভূতাত্ত্বিক জৰীপৰ তথ্য অনুসৰি শুকুৰবাৰে নিশা ১১:৩২:৫৪ বজাত নেপালত ভূমিকম্পৰ জোকাৰণি অনুভৱ কৰা হয়। নেপালৰ ৰাজধানী কাঠমাণ্ডুৰ পৰা ৩৩১ কিলোমিটাৰ পশ্চিম আৰু উত্তৰ-পশ্চিমে আছিল এই ভয়ংকৰ ভূমিকেন্দ্ৰৰ কেন্দ্ৰস্থল। এই ভূমিকম্পৰ উৎপত্তি ভূপৃষ্ঠৰ পৰা ১০ কিলোমিটাৰ গভীৰতাত।
আনহাতে, ভূমিকম্পৰ উৎস স্থল ভাৰত সীমান্তৰ সমীপতে আছিল। এই পৰিস্থিতিত দিল্লী, উত্তৰ প্ৰদেশ, উত্তৰাখণ্ডকে ধৰি ভাৰতৰ বহু প্ৰান্তত জোকাৰণি অনুভৱ হৈছিল। উত্তৰাখণ্ডৰ পিথোৰাগড়ৰ পৰা ২০৮ কিলোমিটাৰ পূব আৰু দক্ষিণ-পূবে, যোশীমথৰ পৰা ৩১৭ কিলোমিটাৰ দক্ষিণ-পূবে, উত্তৰ প্ৰদেশৰ লক্ষ্ণৌৰ পৰা ২৫৩ কিলোমিটাৰ উত্তৰ আৰুউত্তৰ-পূবে আৰু উত্তৰ প্ৰদেশৰ অযোধ্যাৰ পৰা ২২৭ কিলোমিটাৰ উত্তৰত আছিল এই ভূমিকম্পৰ কেন্দ্ৰস্থল।
উল্লেখ্য যে নেপালত যোৱা এমাহত তিনিটাকৈ প্ৰবল ভূমিকম্পৰ সৃষ্টি হৈছে। ইয়াৰ পূৰ্বে ২০১৫ চনত নেপালত ভয়ংকৰ ভূমিকম্প হৈছিল। ইয়াৰ ফলত প্ৰায় ৯ হাজাৰ লোকৰ মৃত্যু হয়। প্ৰায় ২২ হাজাৰ লোক আহত হয়। যোৱা নিশাৰ ভূমিকম্পই ২০১৫ চনৰ আতংক নেপালক মনত পেলাই দিছে।
লগতে পঢ়কঃধৰ্ষণ কৰি হত্যা, টুকুৰা-টুকুৰ কৰি কাটিলে মহিলাৰ মৃতদেহ
নেপালৰ প্ৰধানমন্ত্ৰীৰ কাৰ্যালয়ে জনাইছে যে প্ৰধানমন্ত্ৰী পুষ্পা কমল দাহালে এই ঘটনাক লৈ দুখ প্ৰকাশ কৰিছে। নিশাৰ পৰা আৰম্ভ হৈছে জৰুৰীকালীন উদ্ধাৰ অভিযানৰ কাম।
নেপালৰ ৰুকুম জিলাত বহু ঘৰ ভাঙি পৰিছে। সেইদৰে, ভূমিকম্পৰ পিছত জাজাৰকোট গাঁৱৰ স্থানীয় প্ৰশাসনৰ সৈতে যোগাযোগ কৰাটো সম্ভৱ হোৱা নাছিল বুলি জানিব পৰা গৈছে। সেই গাঁৱত বহুত মানুহৰ বসতি। পিছত নিশালৈ জাজাৰকোট জিলাৰ বিষয়া সুৰেশ কুমাৰ সুনাৰে জনায় যে উদ্ধাৰৰ কাম আৰম্ভ হৈছে। আঘাতপ্ৰাপ্ত বহু লোকক চিকিৎসালয়লৈ লৈ যোৱা হয়।
