ভাৰতীয় বায়ুসেনাৰ ৯২ বছৰীয়া জয়ন্তী উপলক্ষে দেওবাৰে এক অনুষ্ঠানৰ আয়োজন কৰা হয়। সেই অনুশীলন চাবলৈ গৈ কেইবাজনো লোকৰ মৃত্যু হৈছিল। ২০০ৰো অধিকলোক অসুস্থ হৈ পৰিছে! চেন্নাইত সংঘটিত হৈছে এই ঘটনা। আৰক্ষীয়ে জনোৱা মতে, অতিমাত্ৰা ভিৰৰ বাবেই এই ঘটনা সংঘটিত হৈছে।
তামিলনাডুত এতিয়া গৰম। এই সময়তে ‘লিমকা বুক অৱ ৰেকৰ্ড’ বনোৱাৰ লক্ষ্যৰে প্ৰায় ১৬ লাখ লোকৰ সমাৱেশ ঘটোৱা হৈছিল! ফলত অতিমাত্ৰা ভিৰ আৰু গৰমৰ ফলত কমেও ৫ জন লোকৰ মৃত্যু হৈছে আৰু ২৩০ জন অসুস্থ হৈছে। আৰক্ষীয়ে জনোৱা মতে, নিহত আটাইকেইজন ৰাজ্যখনৰ বাসিন্দা। অৱশ্যে তাত বহু পৰ্যটকো উপস্থিত আছিল। কিন্তু কিয় ইমান অতিমাত্ৰা ভিৰ হৈছিল?
লগতে পঢ়কঃ বিজেপি শাসিত ত্ৰিপুৰাত দুই ফৈদৰ মাজত ৰক্তাক্ত সংঘৰ্ষ, প্ৰশাসনৰ নিষেধাজ্ঞা জাৰি
পুৱা ১১ বজাৰ পৰা দুপৰীয়া ১ বজালৈ অনুষ্ঠিত হোৱাৰ কথা আছিল এই অনুষ্ঠান। কিন্তু ‘ভাল ঠাই’ পোৱাৰ আশাত ৰাতিপুৱা ৭-৮ বজাৰ পৰা মানুহ আহিবলৈ ধৰিলে। তাৰ বাবেই এনে পৰিস্থিতিৰ সৃষ্টি হৈছে। গৰম আৰু ভিৰৰ চাপত কেইজনমান লোকৰ মৃত্যু হয়। বাকীসকল গুৰুতৰভাৱে অসুস্থ।
মূল অনুষ্ঠানৰ স্থানৰ উপৰিও মেৰিনা বিচকে ধৰি মহানগৰীৰ বিভিন্ন প্ৰান্তত জনসমাগম হয়। ফলত যান-জঁটৰো সৃষ্টি হয়। যাৰ বাবে ৰোগীক সোনকালে চিকিৎসালয়লৈ নিব পৰা হোৱা নাছিল। ইয়াৰ বাবেই কেবাজনৰো মৃত্যু হয়।
অনুষ্ঠানত উপস্থিত কেইবাজনো লোকে পিছত এই কাণ্ডৰ বাবে আৰক্ষী আৰু আয়োজক কৰ্তৃপক্ষক দোষাৰোপ কৰে। পথৰ কাষৰ সকলো দোকান আঁতৰাই পেলোৱাৰ অভিযোগ উত্থাপন কৰে। ইয়াৰ কাৰণে কোনোবাই যদি অসুস্থ অনুভৱ কৰে, খোৱাটো দূৰৰ কথা, আনকি পানীও পোৱা নাযায়। তদুপৰি যান-জঁটৰ বাবে বহুতক সময়মতে চিকিৎসালয়লৈ নিব পৰা নাছিল।
লগতে পঢ়কঃ ৫০০ কোটি টকাৰ প্ৰৱঞ্চনাৰ অভিযোগ! অভিনেত্ৰী ৰিয়া চক্ৰৱৰ্তীক চমন দিল্লী আৰক্ষীৰ
তামিলনাডু চৰকাৰী স্বাস্থ্য বিভাগৰ সূত্ৰ অনুসৰি বহু লোকক চিকিৎসালয়ত ভৰ্তি কৰোৱা হৈছে যদিও বহু লোকক প্ৰাথমিক চিকিৎসাৰ অন্তত মুকলি কৰি দিয়া হয়। আৰক্ষীয়ে অৱশ্যে এই অনুষ্ঠানৰ আয়োজনত কোনো প্ৰশাসনিক ভুল হোৱা নাছিল বুলি কয়। গৰমত ঘণ্টাৰ পিছত ঘণ্টা থিয় হৈ থকাৰ বাবেই বহুতে অসুস্থ হৈ পৰিছে।
