অষ্ট্ৰিয়াৰ ৩১ বছৰীয়া সৌন্দৰ্য্য বিষয়ক জনপ্ৰিয় ইনফ্লুয়েন্সাৰ ষ্টেফানী পাইপাৰৰ মর্মান্তিক হত্যাকাণ্ডই চাঞ্চল্যৰ সৃষ্টি কৰিছে। পাইপাৰৰ মৃতদেহ স্লোভেনিয়াৰ এখন অৰণ্যত এটা চুটকেছৰ ভিতৰত পুতি থোৱা অৱস্থাত উদ্ধাৰ হৈছে। এই ঘটনাৰ সন্দৰ্ভত পাইপাৰৰ প্ৰাক্তন প্ৰেমিকক গ্ৰেপ্তাৰ কৰা হৈছে।
ষ্টেফানীয়ে ২৩ নৱেম্বৰৰ দিনা এখন পাৰ্টিৰ পৰা উভতি আহিছিল। প্ৰথমে, পাইপাৰে বন্ধু এজনক মেছেজ কৰি জনাইছিল যে তেওঁ নিৰাপদে ঘৰ পাইছেহি। তাৰ পিছতে, পাইপাৰে ভয়ত দিয়া আন এটা মেছেজত উল্লেখ কৰিছিল যে চিৰিৰ তলত কোনোবা লুকাই আছে। পাইপাৰে এটা ‘অন্ধকাৰ ছাঁ’ দেখা বুলিও জনাইছিল।
ওচৰ-চুবুৰীয়াসকলে সেই ৰাতি ষ্টেফানীৰ ঘৰৰ পৰা কাজিয়াৰ শব্দ শুনা বুলি দাবী কৰিছে। কিছুমানে সেই সময়ত পাইপাৰৰ প্ৰাক্তন প্ৰেমিকক সেই ভৱনত দেখা বুলিও কৈছে।
ষ্টেফানীৰ প্ৰাক্তন প্ৰেমিকক স্লোভেনিয়াত গ্ৰেপ্তাৰ কৰা হৈছে। ২৪ নৱেম্বৰত আৰক্ষীয়ে সীমান্তৰ ওচৰৰ এখন কেচিনোৰ পাৰ্কিং লটত এখন জ্বলি থকা গাড়ীৰ ওচৰত তেওঁক পাইছিল। সেই গাড়ীখন অভিযুক্তজনৰ আছিল আৰু হত্যাৰ পিছত তেওঁ সেই গাড়ীতেই কেইবাবাৰো স্লোভেনিয়ালৈ অহা-যোৱা কৰিছিল বুলি সন্দেহ কৰা হৈছে। পিছত তেওঁক অষ্ট্ৰিয়াৰ আৰক্ষীক প্ৰত্যৰ্পণ কৰা হয়।
আৰক্ষীৰ দাবী অনুসৰি, অভিযুক্তই ইতিমধ্যেই নিজৰ অপৰাধ স্বীকাৰ কৰিছে। তেওঁ স্বীকাৰ কৰিছে যে কাজিয়াৰ পিছত তেওঁ ষ্টেফানী পাইপাৰক ডিঙি চেপি হত্যা কৰিছিল আৰু মৃতদেহ এটা চুটকেছত ভৰাই স্লোভেনিয়াৰ অৰণ্যত পুতি থৈছিল। তেওঁৱেই আৰক্ষীক মৃতদেহটো ক’ত আছে সেই স্থান দেখুৱাই দিছিল।
খবৰ অনুসৰি, অভিযুক্তৰ দুজন পুৰুষ আত্মীয়কো (সম্ভৱতঃ তেওঁৰ ভাতৃ আৰু দেউতাক) ঘটনাটোৰ সৈতে জড়িত থকাৰ অভিযোগত গ্ৰেপ্তাৰ কৰা হৈছে।
এই ঘটনাটোক লৈ নেটিজেনৰ মাজত গভীৰ শোক আৰু চাঞ্চল্য বিৰাজ কৰিছে। ষ্টেফানীয়ে মেকআপ, ফেশ্বন আৰু নিজৰ মিউজিক ভিডিঅ’ৰ বাবে জনপ্ৰিয়তা লাভ কৰিছিল।
