দেশৰ ঘৰুৱা বিমান পৰিবহণ খণ্ডক সকাহ দিয়াৰ লগতে আন্তঃৰাষ্ট্ৰীয় বজাৰৰ মূল্যবৃদ্ধিৰ প্ৰভাৱ হ্ৰাস কৰাৰ লক্ষ্যৰে কেন্দ্ৰীয় চৰকাৰে এক নতুন ‘মূল্য স্থিৰকৰণ আঁচনি’ মুকলি কৰিছে। একে সময়তে চৰকাৰী ইন্ধন বিক্ৰেতা প্ৰতিষ্ঠানসমূহে বিমানত ব্যৱহৃত ইন্ধন বা এভিয়েচন টাৰ্বাইন ফুৱেলৰ (এটিএফ) মূল্য প্ৰায় দহ শতাংশ বৃদ্ধি কৰিছে। চৰকাৰৰ এই নতুন ব্যৱস্থাৰ অধীনত ঘৰুৱা বিমান সেৱা প্ৰতিষ্ঠানসমূহে আগন্তুক তিনি বছৰৰ বাবে এটিএফৰ এক নিৰ্দিষ্ট মূল্য নিৰ্ধাৰণ কৰাৰ সুবিধা লাভ কৰিব, যাৰ ফলত প্ৰতিষ্ঠানসমূহে গোলকীয় বজাৰৰ অস্থিৰতাৰ পৰা সুৰক্ষা পাব।
চৰকাৰী সূত্ৰই প্ৰকাশ কৰা অনুসৰি, এই আঁচনিখন সম্পূৰ্ণৰূপে স্বেচ্ছামূলক আৰু ইয়াত অন্তৰ্ভুক্ত হোৱা বা নোহোৱাৰ সিদ্ধান্ত এয়াৰলাইনছসমূহে নিজেই গ্ৰহণ কৰিব পাৰিব। যিসমূহ এয়াৰলাইনছে এই আঁচনি গ্ৰহণ কৰিব, তেওঁলোকে প্ৰতি লিটাৰ এটিএফৰ বাবে ১১৫ টকা আদায় দিব লাগিব, যিটো পূৰ্বে প্ৰতি লিটাৰত ১০৪.৯২৭ টকা আছিল। আনহাতে, যিসমূহ প্ৰতিষ্ঠানে এই গাঁথনিৰ বাহিৰত থকাৰ সিদ্ধান্ত ল’ব, তেওঁলোকে বৰ্তমানৰ বজাৰ মূল্য অৰ্থাৎ প্ৰতি লিটাৰত প্ৰায় ১৪২ টকাত ইন্ধন ক্ৰয় কৰিব লাগিব। উল্লেখযোগ্য যে আন্তঃৰাষ্ট্ৰীয় বিমান সেৱা প্ৰতিষ্ঠানসমূহেও বৰ্তমান এই একেই বজাৰ মূল্যতে ইন্ধন ক্ৰয় কৰি আছে। আঁচনিখনত অন্তৰ্ভুক্ত হোৱা প্ৰতিষ্ঠানসমূহ লক্-ইন পিৰিয়ডৰ সময়ছোৱাত আন্তঃৰাষ্ট্ৰীয় বজাৰৰ উঠা-নমাৰ পৰা সুৰক্ষিত থাকিব। আনপিনে, বাহিৰত থকা প্ৰতিষ্ঠানসমূহে ইন্ধনৰ মূল্য হ্ৰাস পালে লাভান্বিত হ’ব যদিও মূল্যবৃদ্ধিৰ সময়ত আৰ্থিক বোজা নিজেই বহন কৰিব লাগিব।
এই নিৰ্দিষ্ট মূল্য নিৰ্ধাৰণৰ সূত্ৰটো ‘ফ্ৰী-অন-বৰ্ড’ মানদণ্ডৰ আধাৰত প্ৰতি লিটাৰত ৮৬.৩২ টকা হিচাপে নিৰ্ধাৰণ কৰা হৈছে। ইয়াৰ ভিতৰত বিমান বন্দৰৰ মাচুল, তেল কোম্পানীসমূহৰ লাভাংশ আৰু প্ৰযোজ্য কৰসমূহো অন্তৰ্ভুক্ত আছে। এই ফৰ্মূলা অনুসৰি বৰ্তমান প্ৰতি লিটাৰ এটিএফৰ কাৰ্যকৰী মূল্য দিল্লীত ১১৫ টকা, মুম্বাইত ১১৪.৫ টকা আৰু চেন্নাইত ১৩৯ টকা হ’ব। চলিত বৰ্ষৰ আৰম্ভণিতে পশ্চিম এছিয়াত আৰম্ভ হোৱা সংঘাতৰ ফলত গোলকীয় বজাৰত ইন্ধনৰ মূল্য বৃদ্ধি পাইছিল। তাৰ পিছতো দুমাহতকৈ অধিক সময় ধৰি দিল্লীত ঘৰুৱা এটিএফৰ মূল্য প্ৰতি লিটাৰত প্ৰায় ১০৫ টকাতে স্থিৰ হৈ আছিল। আন্তঃৰাষ্ট্ৰীয় বজাৰত মূল্যবৃদ্ধি হোৱাৰ পিছতো গ্ৰাহকৰ ওপৰত ইয়াৰ সম্পূৰ্ণ বোজা জাপি নিদিয়াৰ ফলত চৰকাৰী তেল কোম্পানীসমূহে বিস্তৰ লোকচানৰ সন্মুখীন হ’বলগীয়া হৈছিল।
এই লোকচান পূৰণ কৰিবলৈ আৰু ভৱিষ্যতে বিমান পৰিবহণ খণ্ডক এনে আৰ্থিক অস্থিৰতাৰ পৰা ৰক্ষা কৰিবলৈ কেন্দ্ৰীয় কেবিনেটে ১০,০০০ কোটি টকাৰ মূল্য স্থিৰকৰণ গাঁথনিত অনুমোদন জনাইছে। এই গাঁথনিৰ জৰিয়তে তেল কোম্পানীসমূহৰ লোকচান হ্ৰাস কৰাৰ লগতে বিমান সেৱাসমূহক এক সুস্থিৰ ব্যৱসায়িক পৰিৱেশ প্ৰদান কৰাৰ লক্ষ্য নিৰ্ধাৰণ কৰা হৈছে।
এই নতুন ব্যৱস্থাৰ অধীনত, যদিহে গোলকীয় মানদণ্ডৰ মূল্য প্ৰতি লিটাৰত ৮৬.৩২ টকাৰ মূল নিৰিখতকৈ বৃদ্ধি পায়, তেন্তে চৰকাৰে এই পাৰ্থক্য দূৰ কৰিবলৈ তেল বিপণন কোম্পানীসমূহক বিনাসূতে অগ্ৰিম ধন প্ৰদান কৰিব। পৰৱৰ্তী সময়ত যেতিয়া আন্তঃৰাষ্ট্ৰীয় বজাৰত ইন্ধনৰ মূল্য হ্ৰাস পাব, তেতিয়া চৰকাৰে সেই অতিৰিক্ত ধন পুনৰুদ্ধাৰ কৰি ভাৰতৰ সঞ্চিত নিধিত জমা কৰিব। বৰ্তমান চৰকাৰৰ এই পদক্ষেপে ঘৰুৱা বিমান সেৱা খণ্ডত দীৰ্ঘম্যাদী সুস্থিৰতা অনাৰ লগতে আগন্তুক সময়ত বিমান যাত্ৰীসকলৰ টিকটৰ মূল্যতো প্ৰত্যক্ষ প্ৰভাৱ পেলোৱাৰ সম্ভাৱনা আছে।
