ঢাকাৰ ধানমন্দিৰ ৩২ নং ঘৰটো বুলডজাৰেৰে ভাঙি পেলোৱা হৈছে। বংগবন্ধু মুজিবুৰ ৰহমানে বাংলাদেশৰ স্বাধীনতা ঘোষণা কৰা ঘৰটো ভাঙি জ্বলাই দিয়াৰ প্ৰতিবাদত আৱামী লীগে ধাৰাবাহিক বিক্ষোভৰ আহ্বান জনাইছে।
যোৱা বছৰৰ ৫ আগষ্টত শ্বেখ হাছিনাৰ চৰকাৰ পতনৰ দিনা ধানমন্দিৰ বংগবন্ধু ভৱনত আক্ৰমণ সংঘটিত হৈছিল। সেইদিনা ঢাকাকে ধৰি বাংলাদেশৰ বিভিন্ন প্ৰান্তত মুজিবুৰ ৰহমানৰ প্ৰতিমূৰ্তি ভাঙি লণ্ডভণ্ড কৰে। বুধবাৰে নিশা পুনৰ আক্ৰমণৰ ঘটনা সংঘটিত হয় ঘৰটোত। বৃহস্পতিবাৰে পুৱা বুলডজাৰেৰে ঘৰটো ভাঙি পেলোৱা হয়।
বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই এই ঘটনাৰ তীব্ৰ গৰিহণা দিয়ে। আৱামী লীগৰ সভাপতি শ্বেখ হাছিনাই এই ঘৰটোক সকলোৱে কিয় ইমান ভয় কৰিছে বুলি প্ৰশ্ন উত্থাপন কৰিছে।
তেওঁ লগতে কয়, “জাতিৰ জনকে এই ঘৰৰ পৰাই স্বাধীনতা ঘোষণা কৰিছিল। তেন্তে এই ঘৰটো কোনে ভাঙিলে? কেইজনমানে বুলডজাৰেৰে দেশৰ স্বাধীনতা ধ্বংস কৰিব, তেনে শক্তি তেওঁলোকৰ নাই।তেওঁলোকে এটা অট্টালিকা ভাঙিব পাৰে, কিন্তু ইতিহাস মচি পেলাব নোৱাৰে।”
যিসকলে আক্ৰমণ চলাই এই ঘৰটো ভাঙি পেলাইছে বাংলাদেশৰ জনতাই তেওঁলোকক যোগ্য প্ৰত্যুত্তৰ দিব বুলিও কৈছে আৱামী লীগে। একে সময়তে হাছিনাৰ দলটোৱে প্ৰতিবাদ আৰু কূটাঘাতৰ বিৰুদ্ধে এক শক্তিশালী গণ আন্দোলন গঢ়ি তুলিবলৈ সমগ্ৰ দেশতে ধাৰাবাহিক বিক্ষোভ আৰু পদযাত্ৰাৰ আহ্বান জনাইছে।
ছ’চিয়েল মিডিয়াত আৱামী লীগে এক বিবৃতিত দাবী কৰিছে যে অন্তৱৰ্তীকালীন চৰকাৰৰ প্ৰত্যক্ষ সমৰ্থনত আৰু গভীৰ ষড়যন্ত্ৰৰ ফলস্বৰূপে পুনৰ বংগবন্ধু ভবনত আক্ৰমণ কৰা হৈছে। প্ৰতিজন বাঙালীৰ হৃদয়ত সেই ঘৰটোক লৈ এক বেলেগ আৱেগ আছে। সেই আৱেগক ধ্বংস কৰাৰ ক্ষমতা কাৰো নাই। এই কাৰণতে আগন্তুক দিনত ৩২ নম্বৰৰ ঘৰটো পুনৰ নিৰ্মাণ কৰা হ’ব বুলিও আৱামি লীগে এক বিবৃতি প্ৰকাশ কৰি কয়।
ইউনুছৰ চৰকাৰে মুক্তিযুদ্ধৰ চেতনাক ভয় কৰি এই কাম কৰিছে বুলিও তেওঁলোকে দাবী কৰে। অবৈধ আৰু অগণতান্ত্ৰিক চৰকাৰে জনসাধাৰণৰ প্ৰতি কোনো দায়িত্ব প্ৰদৰ্শন নকৰাকৈ বাংলাদেশক পদ্ধতিগতভাৱে গৃহযুদ্ধৰ দিশে ঠেলি দিছে বুলি দাবী কৰিছে আৱামী লীগে। ইয়াৰ দায়িত্ব ল’ব লাগিব ইউনুছ চৰকাৰে। একে সময়তে অন্তৱৰ্তীকালীন চৰকাৰে গ্ৰহণ কৰা “স্বাধীনতা বিৰোধী” মনোভাৱৰ প্ৰতিবাদত আৱামি লীগে ধাৰাবাহিক প্ৰতিবাদ আৰু পদযাত্ৰাৰ আহ্বান জনাইছে।
