ভাৰতত কোভিডৰ চতুৰ্থ ঢৌ আৰম্ভ হোৱাৰ সময়তে আন এক খবৰে চিন্তিত কৰি তুলিছে দেশৰ স্বাস্থ্য বিজ্ঞানীসকলক।
শেহতীয়াকৈ ভাৰতত ধৰা পৰিছে অমিক্ৰনৰে বি.এ.-২ ৰ এক নতুন প্ৰকাৰ।
বি এ.১২ নামৰ এই প্ৰজাতিটো অমিক্ৰনতকৈ দহগুণে বেছি সংক্ৰামক। বিহাৰৰ পাটনাৰ ইন্দিৰা গান্ধী চিকিৎসা বিজ্ঞান প্ৰতিষ্ঠান (আইজিআইএমএছ) ত চিকিৎসাধীন এগৰাকী ৰোগীৰ দেহত কোভিডৰ বি এ.১২ প্ৰজাতি ধৰা পৰাৰ পিছতে তৎপৰ হৈ পৰিছে চিকিৎসা প্ৰতিষ্ঠান খনৰ চিকিৎসকসকল।
ভাৰতত কোভিড সংক্ৰমণৰ বৰ্ধিত প্ৰৱণতাৰ মাজত এনেদৰে কোভিড-১৯ৰ বি এ.১২ প্ৰজাতি ধৰা পৰাৰ কথাই চতুৰ্থ ঢৌৰ সময়ত এই প্ৰজাতিবিধে অধিক সংহাৰৰ সৃষ্টি কৰিব বুলি আশংকা কৰা হৈছে।
আইজিআইএমএছৰ মাইক্ৰ’বায়োলজী বিভাগৰ মুৰব্বী অধ্যাপক ড০ নম্ৰতা কুমাৰীয়ে প্ৰকাশ কৰা মতে চিকিৎসা প্ৰতিষ্ঠান খনত অমিক্ৰনৰ নমুনাৰ জিনোম অনুক্ৰম পৰীক্ষা কৰি চোৱা হৈছিল।
পৰীক্ষাৰ বাবে গ্ৰহণ কৰা মুঠ ১৩ টা নমুনাৰ ভিতৰৰে এটাত বিএ.১২ প্ৰজাতিৰ উপস্থিতি ধৰা পৰিছে। বাকী ১২ টা নমুনাত বি.এ.২ প্ৰজাতি ধৰা পৰাৰ কথা তেওঁ উল্লেখ কৰে।
নতুন বি.এ.১২ প্ৰজাতিটো অমিক্ৰনৰে আন এটা প্ৰকাৰ।
ভাৰতত কোভিডৰ তৃতীয় ঢৌৰ সময়ত অমিক্ৰনে ত্ৰাসৰ সৃষ্টি কৰিছিল। অৱশ্যে সেই সময়ত অমিক্ৰনৰ বি এ ২ প্ৰজাতিৰহে সংক্ৰমণ ঘটিছিল।
অমিক্ৰনৰ নতুন প্ৰজাতি বি.এ.১২ ভাৰতত এইবাৰহে প্ৰথম ধৰা পৰিছে।
এই প্ৰজাতিটো বি এ ২ প্ৰজাতিকৈ দহ গুণে বেছি বিপজ্জনক বুলি স্বাস্থ্য বিজ্ঞানীসকলে কৈ আহিছে।
আমেৰিকাত প্ৰথমবাৰৰ বাবে এই প্ৰজাতিটো ধৰা পৰিছিল।
