শনিবাৰে মুম্বাইৰ বান্দ্ৰা ইষ্টত প্ৰাক্তন মন্ত্ৰী তথা ৰাষ্ট্ৰীয়তাবাদী কংগ্ৰেছ পাৰ্টিৰ জ্যেষ্ঠ নেতা বাবা ছিদ্দিকীক গুলীয়াই হত্যা কৰা হয়।
খবৰ অনুসৰি আজিৰ পূৰ্বে অচিনাক্ত আক্ৰমণকাৰীয়ে তেওঁক একাধিকবাৰ গুলীয়াই হত্যা কৰাৰ লগতে বুকুৰ ওচৰত এটা গুলী আঘাত কৰা বুলি বাতৰি প্ৰকাশ পাইছে। ঘটনাৰ পাছতে তেওঁক ততাতৈয়াকৈ চিকিৎসাৰ বাবে লীলাৱতী চিকিৎসালয়লৈ প্ৰেৰণ কৰা হয়।
জানিব পৰা মতে, নিৰ্মল নগৰৰ কলগেট খেলপথাৰৰ সমীপত বান্দ্ৰা ইষ্টক প্ৰতিনিধিত্ব কৰা বিধায়ক পুত্ৰ জিশ্বন ছিদ্দিকীৰ কাৰ্যালয়ৰ বাহিৰত সংঘটিত হয় এই গুলীচালনা। এই ঘটনাৰ সৈতে জড়িত দুজন ব্যক্তিক আটক কৰিছে কৰ্তৃপক্ষই।
তদন্তৰ সৈতে জড়িত এক পৰিঘটনাত দিল্লী আৰক্ষীৰ বিশেষ কোষেও বাবা ছিদ্দিকৰ হত্যাকাণ্ডৰ তদন্ত আৰম্ভ কৰিছে।
মুম্বাই আৰক্ষীয়ে ৰাষ্ট্ৰীয়তাবাদী কংগ্ৰেছ দলৰ নেতা বাবা ছিদ্দিকৰ মৃতদেহ দেওবাৰে পুৱা লীলাৱতী হাস্পতালৰ পৰা কুপাৰ হাস্পতাললৈ মৰণোত্তৰ পৰীক্ষাৰ বাবে বদলি কৰে।
উল্লেখ্য যে, গুলীচালনাৰ পাছতে ছিদ্দিকীক ততাতৈয়াকৈ লীলাৱতী চিকিৎসালয়লৈ লৈ যোৱা হয় আৰু নিশা প্ৰায় ৯:৩০ বজাত তেওঁক ভৰ্তি কৰা হয়। চিকিৎসাৰ ব্যাপক প্ৰচেষ্টা সত্ত্বেও সেই নিশাই শেষ নিশ্বাস ত্যাগ কৰে। ৰাজনীতিবিদ আৰু চেলিব্ৰিটিকে ধৰি বৃহৎ জনসমাগম চিকিৎসালয়খনত সমবেত হৈ ছিদ্দিকীৰ পৰিয়াললৈ সমবেদনা জ্ঞাপন কৰে।
বান্দ্ৰা পশ্চিমৰ তিনিবাৰৰ বিধায়ক ছিদ্দিকে কংগ্ৰেছ ত্যাগ কৰি চলিত বৰ্ষৰ ফেব্ৰুৱাৰী মাহত এনচিপিৰ অজিত পাৱাৰৰ ফৈদত যোগদান কৰিছিল। তেওঁৰ কৰুণ মৃত্যুই ৰাজনৈতিক মহলত বহুতকে স্তম্ভিত কৰি তুলিছে।
মহাৰাষ্ট্ৰৰ মুখ্যমন্ত্ৰী একনাথ শিণ্ডে এই কাণ্ডক “অতি দুৰ্ভাগ্যজনক” বুলি অভিহিত কৰি শোক প্ৰকাশ কৰে। উত্তৰ প্ৰদেশ আৰু হাৰিয়ানাৰ বুলি অনুমান কৰা দুজন সন্দেহযুক্ত লোকক গ্ৰেপ্তাৰ কৰাৰ কথাও তেওঁ নিশ্চিত কৰাৰ বিপৰীতে তৃতীয়জন সন্দেহযুক্ত লোক এতিয়াও পলাতক অৱস্থাত আছে বুলি উল্লেখ কৰে।
মুম্বাইৰ অতিৰিক্ত আৰক্ষী আয়ুক্ত পৰমজিৎ সিং দহিয়াই এই গ্ৰেপ্তাৰ নিশ্চিত কৰি তদন্ত অব্যাহত থকা বুলি কয়।
