কাজিৰঙা ৰাষ্ট্ৰীয় উদ্যানৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰত ২০১৬ চনৰ পৰা প্ৰতিপালিত হৈ অহা এটা গঁড় পোৱালি আজি সন্ধ্যা মৃত্যুমুখত পৰে।
কেন্দ্ৰটোত প্ৰতিপালিত এই পোৱালিতো সৰ্প দৰ্শনত মৃত্যু হোৱা বুলি সন্দেহ কৰিছে কেন্দ্ৰটোৰ পশু চিকিৎসকে।
উল্লেখযোগ্য যে ২০১৬ চনৰ ২৭ জুলাইত বোকাখাতৰ জাপৰিপথাৰৰ পৰা এই মতা পোৱালিটো উদ্ধাৰ কৰি কেন্দ্ৰটোলৈ অনা হৈছিল। অন্য গঁড় পোৱালিৰ সৈতে আঢ়ৈ বছৰ বয়সীয়া এই মাউৰা গঁড় পোৱালিটোক কেন্দ্ৰটোত প্ৰতিপালন কৰি ডাঙৰ কৰা হৈছিল।
২৯ আগষ্টত পশু চিকিৎসকে মৃত গঁড় পোৱালিটো মৰোনোত্তৰ পৰীক্ষা কৰিব। মৰোনোত্তৰ পৰীক্ষাৰ পিছতহে গঁড় পোৱালিটোৰ মৃত্যুৰ প্ৰকৃত কাৰণ জানিব পৰা হ’ব বুলি পশু চিকিৎসকে জানিবলৈ দিয়ে।