বিশ্বৰ প্ৰাক্তন ১ নং স্থানৰ তথা দেশৰ প্ৰথম শাৰীৰ বেডমিণ্টন তাৰকা ২৯ বছৰীয়া ছাইনা নেহৱালে আজি বিজেপিত যোগদান কৰিছে{
দিল্লীৰ বিধানসভাৰ নিৰ্বাচনৰ প্ৰাকমুহূৰ্তত তাৰকাগৰাকীৰ এই সিদ্ধান্ত তাৎপৰ্য্যপূৰ্ণ বিবেচিত হৈছে।
ছাইনা নেহৱালে লণ্ডন অলিম্পিকত (২০১২ চন) ব্ৰঞ্জৰ পদকটোকে ধৰি মুঠ ২৪টা আন্তঃৰাষ্ট্ৰীয় খিতাপ দখল কৰিছে আৰু খেলবিধত তেওঁ এতিয়াও দেশৰ অন্যতম শীৰ্ষ তাৰকা।
দ্দা কুইণ্ট নামৰ সংবাদ প্ৰতিষ্ঠানটোৰ মতে, হাৰিয়ানাৰ খেলুৱৈগৰাকীয়ে আজি নতুন দিল্লীত থকা বিজেপিৰ কাৰ্য্যালয়ত দলটোত যোগদান কৰি কয় যে বিজেপিত যোগদান কৰিবলৈ পাই তেওঁ আনন্দিত হৈছে। নৰেন্দ্ৰ মোদী ছাৰে দেশৰ বাবে বহু কষ্ট কৰে আৰু এইটো প্ৰেৰণাদায়ক। তেওঁ দেশলৈ মোদীৰ দৰেই সেৱা আগ বঢ়াব খোজে বুলি প্ৰকাশ।
উল্লেখ কৰিব পাৰি যে যোৱা সময়ছোৱাত নেহৱালে প্ৰধান মন্ত্ৰী নৰেন্দ্ৰ মোদীক প্ৰশংসা কৰি বহুকেইটা টুইট কৰি আহিছে। ইয়াৰে কিছুমান টুইট আন টুইটৰ সৈতে (সাধাৰণতে কপি কৰিলে যিটো হয়) অবিকল হোৱা বাবে তেওঁ ছ’চিয়েল মিডিয়াত ট্ৰলৰ সন্মুখীন হৈছিল।
সূত্ৰ কিছুমানৰ দাবী যে নেহৱালে দিল্লীৰ বিধানসভাৰ নিৰ্বাচনত দলটোৰ হৈ প্ৰচাৰ চলাব পাৰে। ৮ ফেব্ৰুৱাৰিত দিল্লীৰ বিধানসভাৰ নিৰ্বাচন অনুষ্ঠিত হ’ব।
৪ বাৰকৈ ছিনিয়’ৰ ৰাষ্ট্ৰীয় চেম্পিয়ন হোৱা নেহৱালে পদ্মভূষণ, পদ্মশ্ৰী আৰু ৰাজীৱ গান্ধী খেলৰত্ন বঁটা লাভ কৰিছে।