ৰাষ্ট্ৰীয় সেউজ প্ৰাধিকৰণে বাঘজান কাণ্ডৰ বাবে অইল ইণ্ডিয়া লিমিটেডক ২৫ কোটি টকাৰ জৰিমনা বিহিছে।
ন্যায়াধিকৰণে ঘটনাটোৰ কাৰণ অনুসন্ধান কৰি ৩০ দিনৰ ভিতৰত প্ৰতিবেদন দাখিলৰ বাবে এখন আঠজনীয়া সমিতিও গঠন কৰি দিছে।
সমিতিখনক তেল আৰু গেছ নিৰ্গমনৰ কাৰণ, মানুহৰ জীৱন, বন্যপ্ৰাণী, পৰিৱেশৰ হোৱা লোকচান আৰু ক্ষতিৰ পৰিমাণ, জনসাধাৰণৰ হোৱা ক্ষতি আৰু স্বাস্থ্য বিপত্তি, তেলখাদ আৰু ইয়াৰ সমীপৰ পানী, বায়ু আৰু ভূমিভাগত কিবা প্ৰদূষণ, তেল নিৰ্গমনৰ বাবে ডিব্ৰু নৈৰ পানীত প্ৰদূষণৰ পৰিমাণ সম্পৰ্কে পৰীক্ষা কৰিবলৈ কোৱা হৈছে।
সমিতিখনক আন বিষয়ৰ লগতে অগ্নিকাণ্ডটোৰ কৃষি, মৎস্য উৎপাদন আৰু ঘৰচীয়া জন্তুৰ ওপৰত প্ৰভাৱ পৰীক্ষা কৰিবলৈয়ো কোৱা হৈছে।
সেউজ ন্যায়াধিকৰণে লগতে কয় যে ২৯ জুলাইত বিষয়টো বিবেচনাৰ বাবে লোৱা হ’ব।
বাঘজানত অইলৰ ৫নং খাদটোত ২৭ মে’ৰ পৰা গেছ নিৰ্গমন হৈ আছিল।
পিছত ৯ জুনত ইয়াত অগ্নিকাণ্ড সংঘটিত হয় যাক নিৰ্বাপন কৰিবলৈ গৈ অইলৰ দুগৰাকী কৰ্মচাৰীয়ে প্ৰাণ হেৰুৱাব লগা হয়।
তাৰোপৰি গেছ নিৰ্গমন আৰু অগ্নিকাণ্ডৰ ঘটনাটোৰ ফলত সমীপৰ বহু গাঁৱৰ প্ৰায় সাত হাজাৰ লোক আশ্ৰয় শিৱিৰত থাকিব লগা হৈছে।
