নেপালত সাধাৰণ নিৰ্বাচনৰ ভোটগ্ৰহণৰ পিছত গণনা চলি আছে। জেন জেড (যুৱ প্ৰজন্ম)ৰ পছন্দৰ দল ৰাষ্ট্ৰীয় স্বতন্ত্ৰ পাৰ্টি (আৰ এছ পি) প্ৰাৰম্ভিক গণনাত বহু আগবাঢ়ি আছে। সেই দলৰ মুৰব্বী কাঠমাণ্ডুৰ প্ৰাক্তন মেয়ৰ বলেন্দ্ৰ শ্বাহে ঝাপা-৫ সমষ্টিত আগবাঢ়ি আছে। সেই সমষ্টিত দ্বিতীয় স্থানত আছে নেপালৰ প্ৰাক্তন প্ৰধানমন্ত্ৰী তথা নেপাল কমিউনিষ্ট পাৰ্টিৰ মুৰব্বী কে পি শৰ্মা অলি।
প্ৰাৰম্ভিক গণনাত দেখা গৈছে যে অলিৰ দলটোৱেও নিৰ্বাচনত বিশেষ ছাপ পেলাব পৰা নাই। হিমালয়ৰ বক্ষত সোমাই থকা এই দেশখনত প্ৰত্যক্ষ নিৰ্বাচন অনুষ্ঠিত হোৱা ১৬৫খন আসনৰ ভিতৰত অলিৰ দলটোৱে পাঁচখন আসনত আগবাঢ়ি আছে। ৫০ খন আসনত আগবাঢ়ি আছে বলেন্দ্ৰৰ আৰ এছ পি।
নেপালৰ আটাইতকৈ পুৰণি দল গগন থাপাৰ নেপালী কংগ্ৰেছ পাঁচখন আসনত আগবাঢ়ি আছে। নেপালৰ আন এজন প্ৰাক্তন প্ৰধানমন্ত্ৰী পুষ্পকাল দহল ওৰফে প্ৰচণ্ডৰ দলে তিনিখন আসনত আগবাঢ়ি আছে। ৰুকুম পূৱ-১ সমষ্টিৰ পৰা নিজে আগবাঢ়ি আছে প্ৰচণ্ড। দ্বিতীয় স্থানত আছে নেপালী কংগ্ৰেছৰ প্ৰাৰ্থী। এই পৰ্যন্ত আন দলে দুখন আসন লাভ কৰিছে।
যোৱা ছেপ্টেম্বৰ মাহত যুৱ প্ৰজন্মৰ (জেন জেড) প্ৰতিবাদৰ বাবে নেপালত প্ৰধানমন্ত্ৰী অলিৰ চৰকাৰৰ পতন ঘটিছিল। ইয়াৰ তিনিদিন পিছতে অন্তৱৰ্তীকালীন চৰকাৰৰ প্ৰধানমন্ত্ৰী হিচাপে শপত গ্ৰহণ কৰে উচ্চতম ন্যায়ালয়ৰ প্ৰাক্তন মুখ্য ন্যায়াধীশ সুশীলা কাৰ্কীয়ে। বিভিন্ন স্তৰত আলোচনাৰ অন্তত সেই দেশৰ নিৰ্বাচন আয়োগে ৫ মাৰ্চত সংসদীয় নিৰ্বাচনৰ দিন ঘোষণা কৰে। সেই অনুসৰি বৃহস্পতিবাৰে নেপালত সাধাৰণ নিৰ্বাচন অনুষ্ঠিত হয়। ৬৫টা ৰাজনৈতিক দলে এই নিৰ্বাচনী যুঁজত অংশ লৈছিল।
নেপালৰ জেন জেডৰ এক বৃহৎ অংশৰ বাছনি আছিল প্ৰাক্তন গায়ক তথা ৰাজধানী কাঠমাণ্ডুৰ প্ৰাক্তন মেয়ৰ বলেন্দ্ৰ শ্বাহ। যোৱা ছেপ্টেম্বৰ মাহত জেন জেড আন্দোলনৰ অন্যতম পৃষ্ঠপোষক আছিল তেওঁ। এইবাৰ ঝাপা-৫ সমষ্টিত ক্ষমতাচ্যুত প্ৰধানমন্ত্ৰী তথা নেপাল কমিউনিষ্ট পাৰ্টি অলিৰ বিৰুদ্ধে প্ৰতিদ্বন্দ্বিতা কৰাৰ সিদ্ধান্ত লয় বলেন্দ্ৰই। ২০২২ চনৰ সাধাৰণ নিৰ্বাচনত তেওঁৰ দল ৰাষ্ট্ৰীয় স্বতন্ত্ৰ পাৰ্টিয়ে চতুৰ্থ স্থান লাভ কৰিছিল।
ইপিনে, ৪৯ বছৰীয়া গগন থাপাই সাধাৰণ নিৰ্বাচনৰ পূৰ্বে নেপালী কংগ্ৰেছৰ ভিতৰত অভ্যুত্থান ঘটাই প্ৰবীণ প্ৰাক্তন প্ৰধানমন্ত্ৰী শ্বেৰ বাহাদুৰ দেউবাক সভাপতি পদৰ পৰা অপসাৰণ কৰিছিল। এইবাৰ প্ৰধানমন্ত্ৰী পদৰ দৌৰত তেওঁ অন্যতম মুখ আছিল। প্ৰাক্তন মাওবাদী গেৰিলা নেতা প্ৰচণ্ডও যুঁজত আছিল।
ছেপ্টেম্বৰ মাহত ছাত্ৰ আৰু যুৱ প্ৰতিবাদত অলি চৰকাৰৰ পতনৰ পিছত বহুতে তাত বাংলাদেশৰ প্ৰভাৱ বিচাৰি পাইছিল। ২০২৪ চনৰ আগষ্ট মাহত বাংলাদেশত শ্বেখ হাছিনা চৰকাৰৰ পতনৰ কাৰণ হোৱা বৈষম্য বিৰোধী ছাত্ৰ আন্দোলনৰ নেতাসকলে পৰৱৰ্তী সময়ত ৰাষ্ট্ৰীয় নাগৰিক পাৰ্টি (এন চি পি) নামেৰে এটা নতুন দল গঠন কৰে।
কিন্তু ১২ ফেব্ৰুৱাৰীত বাংলাদেশত অনুষ্ঠিত হোৱা সাধাৰণ নিৰ্বাচনৰ পিছত দেখা গ’ল যে সেই দেশৰ জনসাধাৰণে পৰিচিত দল বিএনপিৰ ওপৰত আস্থা ৰাখিছে। আশাব্যঞ্জক প্ৰদৰ্শন দাঙি ধৰে বিএনপিয়ে।
ইপিনে, প্ৰাথমিক গণনাৰ পিছত দেখা গৈছে যে নেপালে পুৰণি বা পৰিচিত দলৰ ওপৰত নহয়, তুলনামূলকভাৱে নতুন দল আৰু নতুন নেতাৰ ওপৰত বিশ্বাস ৰাখিছে।
