নিৰ্বাচনৰ পূৰ্বে ইয়াচিন মালিকৰ জে কে এল এফক আৰু ৫ বছৰৰ বাবে নিষিদ্ধ কৰিলে কেন্দ্ৰই

শনিবাৰে ঘোষণা কৰা হৈছে লোকসভা নিৰ্বাচন। তাৰ পূৰ্বে কেন্দ্ৰীয় চৰকাৰে এটা ডাঙৰ সিদ্ধান্ত লয়। বিচ্ছিন্নতাবাদী নেতা ইয়াছিন মালিকৰ নেতৃত্বৰ জম্মু কাশ্মীৰ লিবাৰেশ্যন ফ্ৰণ্টৰ ওপৰত (জে কে এল এফ) আৰু পাঁচ বছৰৰ বাবে নিষেধাজ্ঞা আৰোপ কৰা হৈছে।

নিৰ্বাচনৰ সময়ত জম্মু-কাশ্মীৰত সন্ত্ৰাসবাদী আক্ৰমণ প্ৰতিৰোধৰ বাবে এই সিদ্ধান্ত লোৱা বুলি কেন্দ্ৰীয় গৃহ মন্ত্ৰালয়ে প্ৰকাশ কৰিছে। জে কে এল এফৰ অধীনৰ আন চাৰিটা গোটকো ভাৰতত নিষেধাজ্ঞা কৰা হৈছে।

সন্ত্ৰাসবাদ বিৰোধী আইনৰ অধীনত এই সংগঠনটোক নিষিদ্ধ কৰা হৈছে। কেন্দ্ৰৰ মতে, বিচ্ছিন্নতাবাদী নেতা ইয়াচিন মালিকৰ এই সংগঠনটোৱে কাশ্মীৰত বিভিন্ন বিচ্ছিন্নতাবাদী কাৰ্যকলাপত ইন্ধন যোগাইছিল।

লগতে পঢ়কঃ আজিৰে পৰাই কাৰ্যকৰী নিৰ্বাচনী আদৰ্শ আচৰণ বিধি; কি কি নিয়ম মানি চলিব লাগিব জানেনে?

ইয়াচিন মালিক জেলত থাকিলেও তেওঁৰ সংগঠনৰ কাম-কাজ একেই আছে। এনে পৰিস্থিতিত যদি এই সংগঠনটোক নিষিদ্ধ ঘোষণা কৰা নহয়, তেন্তে ই কাশ্মীৰৰ শান্তি বিঘ্নিত কৰিব পাৰে। সেয়েহে জে কে এল এফক অবৈধ কাৰ্যকলাপ প্ৰতিৰোধ আইন (ইউ এ পি এ)ৰ বিভিন্ন ধাৰাত নিষিদ্ধ কৰা হৈছে।

এই ঘোষণাৰ লগে লগে গৃহ পৰিক্ৰমা মন্ত্ৰালয়ে এক বিবৃতি প্ৰকাশ কৰে। বিবৃতি অনুসৰি জে কে এল এফে বিভিন্ন দেশবিৰোধী কাৰ্যকলাপত লিপ্ত হৈছিল। ইয়াচিন মালিকক গ্ৰেপ্তাৰ কৰাৰ পিছতো সংগঠনটোৰ কৰ্মীসকলে নিজৰ কাম অব্যাহত ৰাখিছিল। কাশ্মীৰ আৰু পাকিস্তানৰ বিভিন্ন উগ্ৰপন্থী সংগঠনৰ সৈতে তেওঁলোক জড়িত আছিল বুলিও জনা যায়।

শনিবাৰে কেন্দ্ৰীয় গৃহমন্ত্ৰীয়ে এক্স হেণ্ডেলত কয় যে যি কোনো ব্যক্তিয়ে দেশৰ নিৰাপত্তা, সাৰ্বভৌমত্ব আৰু অখণ্ডতাক ক্ষতিগ্ৰস্ত কৰিবলৈ চেষ্টা কৰিলে তেওঁলোকৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।

লগতে পঢ়কঃ শিবিৰৰ পৰাই ভোটদান কৰিব পাৰিব হিংসাজৰ্জৰ মণিপুৰৰ লোকেঃ নিৰ্বাচন আয়োগৰ ঘোষণা

কেন্দ্ৰৰ দাবী যে জম্মু-কাশ্মীৰ লিবাৰেশ্যন ফ্ৰণ্টে বিভিন্ন ধৰণৰ কূতাঘাতমূলক বাবে বহিঃৰাজ্যৰ সন্ত্ৰাসবাদী সংগঠনক সহায় কৰিছিল। অভিযোগ অনুসৰি উপত্যকাত সন্ত্ৰাস আৰু অশান্তিৰ সৃষ্টিৰ অন্যতম প্ৰধান ভূমিকা আছিল এই জে কে এল এফৰ। আৰু সেইবাবেই এই ধৰণৰ সংগঠন যদি নিষিদ্ধ নহয়, তেন্তে কাশ্মীৰৰ নিৰাপত্তাৰ ক্ষেত্ৰত ই এক সমস্যা হ’ব বুলি গৃহ মন্ত্ৰালয়ৰ সূত্ৰই প্ৰকাশ কৰিছে।

পুলৱামা আক্ৰমণৰ পিছতহে জম্মু-কাশ্মীৰত বিভিন্ন বিচ্ছিন্নতাবাদী সংগঠনৰ বিৰুদ্ধে ব্যৱস্থা গ্ৰহণ কৰা হয়। প্ৰথমে জম্মু-কাশ্মীৰৰ প্ৰায় সকলো বিচ্ছিন্নতাবাদী নেতাক গ্ৰেপ্তাৰ কৰা হ’ল। তাৰ পিছত তেওঁলোকৰ সংগঠনসমূহ নিষিদ্ধ কৰাৰ প্ৰক্ৰিয়া আৰম্ভ হ’ল।

ইয়াৰ পূৰ্বে দুটা সংগঠনৰ ওপৰত নিষেধাজ্ঞা আৰোপ কৰা হৈছিল। ইয়াৰ পূৰ্বে ‘জামাত-ই-ইছলামী জম্মু-কাশ্মীৰ’ সংগঠনটোক নিষিদ্ধ ঘোষণা কৰা হৈছিল। এই সংগঠনৰ নেতা আব্দুল হামিদ ফায়াজ বৰ্তমান কাৰাগাৰত আছে। আনহাতে, জম্মুৰ কোট বলৱাল কাৰাগাৰত বন্দী হৈ আছে ইয়াচিন মালিক।