বাংলাদেশৰ অন্তৱৰ্তীকালীন চৰকাৰৰ মুৰব্বী (মুখ্য উপদেষ্টা) মহম্মদ ইউনুছে চলিত বৰ্ষৰ শেষৰ ফালে নতুবা ২০২৬ চনৰ আৰম্ভণিতে অনুষ্ঠিত হ’বলগীয়া সাধাৰণ নিৰ্বাচনত দেশী-বিদেশী প্ৰভাৱশালী শক্তিয়ে বাধাৰ সৃষ্টি কৰিব পাৰে বুলি গভীৰ আশংকা ব্যক্ত কৰিছে। তেওঁ আশংকা কৰিছে যে অপসাৰিত প্ৰধানমন্ত্ৰী শ্বেখ হাছিনাৰ দল আৱামী লীগক প্ৰতিদ্বন্দ্বিতা কৰাত বাধা দিয়াৰ বাবে নিৰ্বাচন বিফল কৰিবলৈ এই শক্তিসমূহে চেষ্টা চলাব পাৰে।
অস্থায়ী চৰকাৰে নিৰ্বাচনৰ প্ৰস্তুতি চলাই থকাৰ মাজতে এখন উচ্চ পৰ্যায়ৰ বৈঠকত ইউনুছৰ প্ৰেছ সচিব ছফিকুল আলমে তেওঁৰ উদ্ধৃতি দি কয় যে, “দেশৰ ভিতৰৰ পৰা আৰু বাহিৰৰ পৰাও বহু শক্তিয়ে নিৰ্বাচন বিফল কৰাৰ চেষ্টা কৰিব। ক্ষুদ্ৰ শক্তি নহয়, বহু প্ৰভাৱশালী শক্তিয়ে ইয়াক বিফল কৰাৰ চেষ্টা কৰিব। হঠাতে আক্ৰমণো হ’ব পাৰে।”
মুখ্য উপদেষ্টা ইউনুছে এক বৈঠকত মন্তব্য কৰে যে নিৰ্বাচন প্ৰত্যাহ্বানমূলক হ’ব, কাৰণ “দেশৰ ভিতৰ আৰু বাহিৰৰ পৰা পৰিকল্পিতভাৱে বিভিন্ন ধৰণৰ অপপ্ৰচাৰ চলোৱা হ’ব।”
ইউনুছে বিশেষভাৱে আশংকা ব্যক্ত কৰে যে কৃত্ৰিম বুদ্ধিমত্তা (AI)-ৰ দ্বাৰা প্ৰস্তুত কৰা ভুৱা ফটো আৰু ভিডিঅ’সমূহ অনলাইন আৰু সামাজিক মাধ্যমত প্ৰচাৰিত হ’ব। এনে বিষয়বস্তুৰ প্ৰচাৰ ৰোধ কাৰিবৰ বাবে তাৎক্ষণিক ব্যৱস্থা গ্ৰহণৰ ওপৰত তেওঁ গুৰুত্ব আৰোপ কৰে।
ইউনুছে দৃঢ়তাৰে কয়, “আমি সেইবোৰ (বাধা) অতিক্ৰম কৰিব লাগিব।” ইউনুছে সম্ভাব্য নিৰ্বাচন সম্পৰ্কীয় মন্তব্য কৰা দিনটোতে অপসাৰিত প্ৰধানমন্ত্ৰী শ্বেখ হাছিনাই বিদেশী সংবাদ সংস্থা আৰু ব্ৰিটেইনৰ দ্য ইণ্ডিপেণ্ডেণ্ট কাকতত এক সাক্ষাৎকাৰ দিয়ে। যোৱা বছৰৰ ৫ আগষ্টৰ পিছত হাছিনাই মূলসুঁতিৰ সংবাদ মাধ্যমত এইটোৱেই প্ৰথম সাক্ষাৎকাৰ।
বিদেশত আত্মগোপন কৰি থকা হাছিনাই তেওঁৰ সাক্ষাৎকাৰত দৃঢ়তাৰে কয় যে তেওঁ দেশত গণতন্ত্ৰ পুনৰুদ্ধাৰৰ বাবে প্ৰতিশ্ৰুতিবদ্ধ হৈ আছে। তেওঁ ইণ্ডিপেণ্ডেণ্ট কাকতক দিয়া সাক্ষাৎকাৰত কয় যে পৰৱৰ্তী চৰকাৰৰ নিৰ্বাচনী বৈধতা থাকিব লাগিব।
নিৰ্বাচন আয়োগে আৱামী লীগৰ পঞ্জীয়ন বাতিল কৰি নিৰ্বাচনত প্ৰতিদ্বন্দ্বিতা কৰাৰ পৰা অযোগ্য ঘোষণা কৰা সন্দৰ্ভত হাছিনাই কয় যে দলৰ লাখ লাখ সমৰ্থকে নিৰ্বাচন বৰ্জন কৰিব। এনে পৰিস্থিতিত বাংলা দেশৰ সাধাৰণ নিৰ্বাচনৰ প্ৰতি শংকাত ভুগিছে ইউনুছ প্ৰশাসন।
