ভাৰতৰ চুবুৰীয়া দেশৰ ধৰ্মীয় সংখ্যালঘুৰ ভাৰতীয়কৰণৰ চৰ্ত শিথিল কৰিব খোজা নাগৰিকত্ব বিধেয়ক বাংলাদেশৰ হিন্দুৰ বাবে মৃত্যুদূত হৈ নামিছে।
নৰ্থইষ্ট নাওত এই বিপদ সদৰী কৰি বাংলাদেশৰ জাতীয় হিন্দু মহাজোঁটৰ প্ৰধান নেতা গোবিন্দ প্ৰামাণিকে বিধেয়কখন বন্ধ কৰিবলৈ ভাৰত চৰকাৰক আহ্বান জনাইছে।
“দিল্লীয়ে কিবা এটা কৰে আৰু আমি তাৰ প্ৰতিফল ভুগিব লগা হয়। এই কথা হ’ব নোৱাৰে,” হিন্দু মহাজোঁটৰ সাধাৰণ সম্পাদক প্ৰামাণিকে কয়।
“বাংলাদেশত শেহতীয়াকৈ তিনিজন হিন্দু পুৰুষ হত্যাৰ বলি হৈছে। এগৰাকী হিন্দু মহিলা ধৰ্ষিতা হৈছে।’’
শাসক বিজেপিয়ে অসমৰ এন আৰ চি বহিৰ্ভূত হিন্দুক বিধেয়কখনে “বিদেশী” হোৱাৰ পৰা বচাব বোলাৰ বিপৰীত মত পোষণ কৰিছে বাংলাদেশী হিন্দু নেতাজনে।
হিন্দু বাঙালীসকলৰ বাবে এই পৰিকল্পনাই বিষয়টো অধিক জটিল কৰি তুলিব, আৰু ইতিমধ্যে তুলিছেই, বাংলাদেশী হিন্দু সংগঠনটোৰ নেতাজনৰ মত।
“ই (বিধেয়কে) বাংলাদেশ আৰু উত্তৰ-পূব ভাৰতত আমাক কেৱল টাৰ্গেট কৰি তুলিছে। আমাৰ মানুহখিনিক ডবাখেলৰ গুটিৰূপে ব্যৱহাৰ কৰা হৈছে আৰু এইটো বন্ধ হ’ব লাগে,” প্ৰামাণিকে কয়।
প্ৰামাণিক পেছাত অধিবক্তা আৰু তেওঁ বাংলাদেশত সংখ্যালঘু হিন্দুসকলৰ সুৰক্ষাৰ বাবে আইনী যুঁজ চলাই আহিছে।
কেৱল বিধেয়কেই নহয়, হিন্দু নেতাজনে অসমৰ এন আৰ চি প্ৰক্ৰিয়াটোও বন্ধ কৰাৰ বাবে ভাৰত চৰকাৰক আহ্বান জনাইছে।
“এন আৰ চিয়ে মূলতঃ আমাৰ মানুহৰ বিৰুদ্ধে অধিক কাম কৰিছে। ১০ লাখতকৈ অধিক বাঙালী হিন্দু অসমৰ এন আৰ চিৰ পৰা বাদ পৰিছে,” তেওঁ কয়।
প্ৰামাণিকে কয়, পশ্চিম বংগ আৰু আন ভাৰতীয় ৰাজ্যলৈয়ো এন আৰ চি সম্প্ৰসাৰণৰ বাবে দিল্লীয়ে কৰা পৰিকল্পনাই বাঙালী হিন্দুৰ গুৰুতৰ ক্ষতি কৰিব।
বিশ্ব হিন্দু পৰিষদৰ অধীন মহাজোঁটৰ নেতাজনে পূৰ্বেও নাগৰিকত্ব বিধেয়কৰ বিৰোধিতা কৰিছিল।
বিধেয়কক লৈ বাংলাদেশী হিন্দু নেতাজনে কৰা মন্তব্যই অসমত ব্যাপক প্ৰতিক্ৰিয়াৰ সৃষ্টি কৰিছিল।
অসমৰ বিজেপি নেতা ৰঞ্জিত দাসে প্ৰামাণিকৰ বিধেয়কখন সম্পৰ্কে “কোনো ধাৰণাই নাই” বুলি মন্তব্য কৰিছিল।
বিপৰীতে, হিন্দু বাংলাদেশীৰ আগমনে সমগ্ৰ উত্তৰ-পূব ভাৰতৰ জনগাঁথনি সলাই পেলাব বুলি প্ৰামাণিকে কৰা মন্তব্যই অসমৰ বিধেয়কবিৰোধী দল-সংগঠনৰ আশংকাৰ প্ৰতিফলন কৰিছিল।
ভাৰতৰ যোৱা সাধাৰণ নিৰ্বাচনৰ পূৰ্বে বিধেয়খন লোকসভাত গৃহীত হৈছিল যদিও ৰাজ্যসভাত উত্থাপন কৰা নাছিল।
বিজেপি নেতৃত্বই শেহতীয়াকৈ কৈ আহিছে যে উত্তৰ-পূৰ্বাঞ্চলৰ আশংকা দূৰ কৰি সংশোধিত ৰূপত বিধেয়কখন পুনৰ সদনত উত্থাপন কৰা হ’ব।
