বাংলাদেশৰ বিৰোধী নেত্ৰী খালেদা জিয়াক মুকলি কৰি দিয়া হৈছে। সেনা মুৰব্বী জেনেৰেল ৱাকাৰ-উজ-জামানে কয় যে অতি সোনকালে বিএনপিৰ অধ্যক্ষ বেগম খালেদা জিয়াক মুকলি কৰি দিয়া হ’ব আৰু বিদেশত তেওঁৰ চিকিৎসাৰ ব্যৱস্থা কৰা হ’ব।
সোমবাৰে নিশা (৫ আগষ্ট) বংগভৱনত ৰাষ্ট্ৰপতি মহম্মদ চাহাবুদ্দিন, বিএনপিৰ সম্পাদক প্ৰধান মিৰ্জা ফখৰুল আৰু অন্যান্য ৰাজনৈতিক নেতাৰ সন্মুখত এই কথা ঘোষণা কৰে সেনা প্ৰধানগৰাকীয়ে।
সোমবাৰে ৰাষ্ট্ৰপতিৰ অধ্যক্ষতাত বংগভৱনত অন্তৱৰ্তীকালীন চৰকাৰ গঠনৰ বাবে এখন বৈঠক অনুষ্ঠিত হয়। বৈঠকত সৰ্বসন্মতিক্ৰমে বিএনপিৰ অধ্যক্ষ বেগম খালেদা জিয়াক মুকলি কৰি দিয়াৰ সিদ্ধান্ত লোৱা হয়।
উল্লেখ্য যে দুৰ্নীতিৰ গোচৰত দোষী সাব্যস্ত হোৱা খালেদা জিয়াক বিদেশলৈ যোৱাত নিষেধাজ্ঞা আৰোপ কৰা হৈছিল। তেওঁ কেইবাটাও চৰ্ত মানি চলিবলগীয়া হৈছিল। প্ৰধানমন্ত্ৰী শ্বেখ হাছিনা চৰকাৰৰ পতনৰ পিছত সেই সকলোবোৰ চৰ্ত উঠাই লোৱা হৈছে।
লগতে পঢ়কঃ কৃত্ৰিম বানত বিপৰ্যস্ত গুৱাহাটী! আজি বন্ধ থাকিব মহানগৰীৰ সকলো শিক্ষা প্ৰতিষ্ঠান
দুর্নীতিৰ দুটা গোচৰত দোষী সাব্যস্ত হোৱা খালেদা জিয়াক ২০১৮ চনৰ ৮ ফেব্ৰুৱাৰীত গ্ৰেপ্তাৰ কৰা হৈছিল। বাংলাদেশৰ প্ৰাক্তন প্ৰধানমন্ত্ৰী তথা বিএনপি নেতা জিয়াক জিয়া অনাথ আশ্ৰম ট্ৰাষ্ট আৰু জিয়া চেৰিটেবল ট্ৰাষ্টৰ দুৰ্নীতিৰ গোচৰত শাস্তি প্ৰদান কৰা হয়। দুবছৰতকৈও অধিক সময় জেলত আছিল।
২০২০ চনৰ ২৫ মাৰ্চত চৰকাৰে কাৰ্যবাহী আদেশ জাৰি কৰি শাস্তি স্থগিত ৰখাৰ লগতে চৰ্তসাপেক্ষে মুক্তিৰ অনুমতি প্ৰদান কৰে। ইয়াৰ পিছত চৰকাৰে তেওঁৰ আবেদনৰ প্ৰতি লক্ষ্য ৰাখি ছমাহৰ বাবে শাস্তি স্থগিত ৰাখি মুক্তিৰ সময়সীমা বৃদ্ধি কৰিছে। যোৱা ২১ মাৰ্চত আৱামী লীগ চৰকাৰে কাৰ্যবাহী আদেশত অষ্টমবাৰৰ বাবে তেওঁৰ মুক্তিৰ সময় বৃদ্ধি কৰে।
খালেদা জিয়াক ফৌজদাৰী প্ৰক্ৰিয়া আইনৰ ৪০১ ধাৰাত বিশেষ চৰ্তত মুকলি কৰি দিয়া হৈছে। অৱশ্যে কিছুমান চৰ্তও আৰোপ কৰা হৈছে। দুটা চৰ্ত হ’ল – খালেদা জিয়া বিদেশলৈ যাব নোৱাৰে আৰু ঢাকাত থাকিয়েই চিকিৎসা কৰিব লাগিব। অৱশ্যে বাংলাদেশত ভ্ৰমণৰ বাবে খালেদা জিয়াই কোনো অনুমতি ল’ব নালাগে। তেওঁৰ মুক্তিৰ সময় বৃদ্ধি কৰাৰ আইনী সুযোগ আছে।
লগতে পঢ়কঃ প্ৰাণৰ মমতাত দেশ এৰি পলায়ন শ্বেখ হাছিনাৰ; ঢাকা ত্যাগ কৰি ভাৰতৰ ত্ৰিপুৰাত উপস্থিত হাছিনা
সোমবাৰেই অন্তৱৰ্তীকালীন চৰকাৰ গঠনৰ বাবে ৰাষ্ট্ৰপতিৰ অধ্যক্ষতাত বংগভৱনত সেনা প্ৰধান, নৌসেনাৰ মুৰব্বী আৰু বায়ুসেনাৰ মুৰব্বী আৰু বিভিন্ন ৰাজনৈতিক দলৰ নেতা আৰু নাগৰিক সমাজৰ প্ৰতিনিধিৰ বৈঠক অনুষ্ঠিত হয়। বৈঠকত সেনাবাহিনীক লুণ্ঠন আৰু হিংসাত্মক কাৰ্যকলাপ বন্ধ কৰাৰ বাবে কঠোৰ ব্যৱস্থা গ্ৰহণৰ দায়িত্ব দি সিদ্ধান্ত লোৱা হয়।
