যৌতুকৰ বাবে পত্নীক প্ৰহাৰ কৰাৰ অভিযোগত বাংলাদেশ আৰক্ষীয়ে ছচিয়েল মিডিয়াৰ নায়ক আশ্ৰাফুল হুছেইন আলমক গ্ৰেপ্তাৰ কৰিছে। আৰক্ষী সূত্ৰই জানিবলৈ দিয়ে যে তেওঁলোকে হিৰ’ আলম হিচাপে পৰিচিত ছচিয়েল মিডিয়াৰ নায়কগৰাকীক বুধবাৰে নিশা আটক কৰে।
সোমবাৰে অভিযুক্তই প্ৰহাৰ কৰাৰ পাছত আলমৰ পত্নী ছদিয়া আখতাৰ ছুমি বৰ্তমান বগুৰা ছহিদ জিয়াউৰ ৰহমান মেডিকেল কলেজত চিকিৎসাধীন হৈ আছে।
তেওঁৰ পিতৃ ছফিউল আলমে সংবাদ মাধ্যমৰ আগত কয় যে তেওঁ মঙলবাৰে ছুমিক পতি আলমৰ গৃহৰ পৰা উদ্ধাৰ কৰি হাস্পাতলত ভৰ্তি কৰে। তেওঁ লগতে জানিবলৈ দিয়ে যে ২৮ বছৰীয়া ছুমিয়ে মূৰৰ পিছফালে আঘাত পাইছে। ‘বাংলাদেশ ২৪ ডটকম’ত এইকথা প্ৰকাশ পাইছে।
উল্লেখযোগ্য যে আলমে ছচিয়েল মিডিয়াত জোকাৰণি তোলা তেওঁৰ অপেছাদাৰী মিউজিক ভিডিঅ’ৰ জৰিয়তে খ্যাতি লাভ কৰিছিল। তদুপৰি, তেওঁ যোৱা ৩০ ডিচেম্বৰত লোকসভা নিৰ্বাচনত এইচ এম এৰছাদ জাতীয় পাৰ্টিৰ পৰা টিকট নোপোৱাৰ পাছত এগৰাকী নিৰ্দলীয় হিচাপে প্ৰতিদ্বন্দ্বিতা কৰি ৰাজনৈতিক ক্ষেত্ৰখনতো পৰিচিত হৈ পৰে।
আনহাতে, আলমে তেওঁৰ পত্নী আৰু শহুৰেকৰ বিৰুদ্ধে তেওঁক প্ৰহাৰ কৰা আৰু তেওঁৰ গৃহৰ পৰা ৫০০,০০০ টকা লৈ যোৱা বুলি অভিযোগ তুলি আৰক্ষীৰ আগত অভিযোগ দাখিল কৰে।
বগুৰা সদৰ আৰক্ষী উপ-পৰিদৰ্শক আব্দুৰ ৰহিমে কয় যে মঙলবাৰে নিশা আলম তেওঁলোকৰ থানালৈ আহি অভিযোগ দাখিল কৰিছিল যে তেওঁক সন্ধিয়া এক পাৰিবাৰিক সংঘাতৰ পাছত ছফিউল, ছুমি আৰু আন তিনিজন লোকে প্ৰহাৰ কৰিছিল।
‘’মই বুধবাৰে ৰাতিপুৱা ঘটনাস্থলীলৈ গৈছিলো আৰু জানিব পাৰিছিলো যে হিৰ’ আলমে নিজেও তেওঁৰ পত্নীক প্ৰহাৰ কৰিছিল। তেওঁক চিকিৎসাৰ বাবে হাস্পাতললৈ লৈ যোৱা হৈছিল। দুয়োপক্ষই অভিযোগ দাখিল কৰিছে,’’ –উপ পৰিদৰ্শক ৰহিমে কয়।
সংবাদ মাধ্যমৰ আগত বক্তৱ্য ৰাখি ছুমিয়ে অভিযোগ কৰে যে আলমে আন এগৰাকী মহিলাৰ লগত সম্পৰ্ক গঢ়ি তুলি মহিলাগৰাকীৰ সৈতে বিবাহপাশত আবদ্ধ হোৱাৰ পাছত তেওঁৰ আৰু তেওঁলোকৰ ল’ৰা-ছোৱালীৰ চেৱাচিতা বন্ধ কৰি দিছিল।
আলমে ইয়াৰ পূৰ্বে তেওঁক ‘দ্বিতীয় বিবাহ’ৰ বিৰোধিতা কৰাৰ বাবেও প্ৰহাৰ কৰিছিল বুলিও ছুমিয়ে জনায়।
ছচিয়েল মিডিয়াৰ নায়কগৰাকীয়ে সোমবাৰে নিশা নগৰখনৰ দাঁতিকাষৰীয়া এৰুলিয়া গাঁৱৰ ঘৰলৈ দুমাহ পাছত আহিছিল আৰু তিনিঘন্টা ধৰি এগৰাকী মহিলাৰ সৈতে ফোনত কথা পাতিছিল বুলিও পত্নীয়ে জানিবলৈ দিয়ে।
তেওঁ ইয়াৰ প্ৰতিবাদ কৰাৰ পাছতে তেওঁক প্ৰহাৰ কৰা বুলি উল্লেখ কৰি ছুমিয়ে কয় যে তেওঁৰ পিতৃ আৰু আন আত্মীয়ই তেওঁক উদ্ধাৰ কৰি হাস্পাতলত ভৰ্তি কৰে।
ছফিউলে কয় যে আলমে দীৰ্ঘদিন ধৰি ছুমিক নিৰ্যাতন চলাই আহিছে। আৰক্ষীক দাখিল কৰা অভিযোগত তেওঁ লগতে আলমে তেওঁৰ পৰা ২০০,০০০ টকা যৌতুক দাবী কৰা বুলিও অভিযোগ আনে।
