অসমস্থিত ইউক’ বেংকত জমা ৰখা ধন বেংকটোৰ হায়দৰাবাদ আৰু চেন্নাইত থকা শাখাৰ পৰা গ্ৰাহকৰ নামত আন কোনো লোকে চে’কযোগে উলিয়াই নি থকাৰ এক চাঞ্চল্যকৰ ঘটনা পোহৰলৈ আহিছে।
ইউক’ বেংকৰ ডিব্ৰুগড় শাখাৰ ৩জন জ্যেষ্ঠ নাগৰিকৰ একাউণ্টৰ পৰা নোহোৱা হৈছে মুঠ ৩৫ লাখ টকা। এই সন্দৰ্ভত যোৱা ২৯ ছেপ্তেম্বৰত মদন মোহন গোস্বামী নামৰ এজন অধ্যাপকে ডিব্ৰুগড় থানাত এটা গোচৰ (নং ১৫৪৭/১৮) ৰুজু কৰাৰ বিপৰীতে বৃ্হস্পতিবাৰে পুনৰ একে অভিযোগেৰে আন এটা গোচৰ (১৫৭৮/১৮) পঞ্জীয়ন কৰিছে আৰ এন গাড়োদিয়া নামৰ এজন ব্যৱসায়ীয়ে।
ডিব্ৰুগড় হনুমানবক্স সূৰজমল কানৈ বাণিজ্য মহাবিদ্যালয়ৰ অৱসৰপ্ৰাপ্ত অধ্যাপক গোস্বামীয়ে আৰক্ষীৰ ওচৰত দাখিল কৰা অভিযোগৰ পিছতে পোহৰলৈ আহিছে এই ভয়ংকৰ ঘটনা। ৭৫ বছৰীয়া লোকজনৰ একাউণ্টৰ পৰা অন্তৰ্ধান হৈছে ১০.৮ লাখ টকা।
“ইউক’ বেংকৰ হায়দৰাবাদস্থিত এটা শাখাৰ পৰা এখন চে’কযোগে গোস্বামীৰ ধনখিনি উলিয়াই নিয়া হৈছে,” বেংকৰ অভ্যন্তৰীণ তদন্তত প্ৰকাশ।
লক্ষণীয়ভাৱে ধনখিনি হস্তান্তৰৰ পূৰ্বে হায়দৰাবাদস্থিত শাখাটোৰ পৰিচালকজনে গোস্বামীৰ ফ’নত চেকখন তেওঁৰ হয়নে নিশ্চিত কৰিছিল। কিন্তু সেইদিনাখন গোস্বামীৰ ফ’ন নম্বৰটো স্বয়ংক্ৰিয়ভাৱে ‘ব্লক’ হৈ আছিল।
“মই ধন উলিয়াই নিয়াক লৈ কোনো ফ’ন পোৱা নাছিলো। কেনেকে হ’ল নাজানো। কিন্তু মোৰ ফ’নটো সেইদিনা নিজে নিজে ব্লক হৈ আছিল,” নৰ্থ ইষ্ট নাও-ক জনালে গোস্বামীয়ে।
গোস্বামীয়ে জনাই যে পিছদিনা তেওঁ দুপ্লিকে’ট চিম কাৰ্দ এখন উলিয়াওতে এই ধনখিনি উলিয়াই নিয়া বুলি মেছেজটো লাভ কৰিছিল।
আনহাতে ঘটনাটোৰ পিছতে বেংকটোৰ ডিব্ৰুগড় শাখাই কৰা অভ্যন্তৰীণ তদন্তত ৩ অক্তোবৰত পুনৰ পোহৰলৈ আহে একেধৰণৰ আন দুটা ঘটনা। ডিব্ৰুগড়ৰে ব্যৱসায়ী আৰ কে গাড়োদিয়া আৰু বিশ্বেশ্বৰ চক্ৰবৰ্তী নামৰ আন দুজন লোকৰ একাউণ্টৰ পৰাও ক্ৰমে ১৫ লাখ আৰু ১০.৮ লাখ টকা হৰলুকি হৈছে। গোস্বামীৰ দৰে একেধৰণেৰেই এই দুজন গ্ৰাহকৰ ধন উলিয়াই নিয়া হৈছে ইউক’ বেংকৰ চেন্নাইস্থিত এটা শাখাৰ পৰা।
লগতে পঢ়ক– ষ্টে’ট বেংক শাখাৰ সৈতে জিলা প্ৰশাসনৰ সকলো লেন-দেন বাতিল!
অধ্যাপক গোস্বামীৰ অভিযোগৰ ভিত্তিত ডিব্ৰুগড় আৰক্ষী থানাত ভাৰতীয় দণ্ডবিধিৰ ৪০৬, ৪২০ নং ধাৰাত আৰু ব্যৱসায়ী গাড়োদিয়াৰ অভিযোগৰ ভিত্তিত ভাৰতীয় দণ্ডবিধিৰ ৪০৬, ৪২০, ৪৬৭, ৪৬৮ ধাৰাত দুটা গোচৰ পঞ্জীয়ন কৰা হৈছে। আনজন ব্যক্তি বিশ্বেশ্বৰ চক্ৰবৰ্তীয়ে বৃ্হস্পতিবাৰলৈকে অভিযোগ দাখিল কৰা নাই।
‘‘গোস্বামীৰ এজাহাৰৰ জৰিয়তেই প্ৰথমে ঘটনাটো পোহৰলৈ আহে। আমি ঘটনা তিনিটাৰ তদন্ত আৰম্ভ কৰিছো,” বেংকৰ লোক জৰিত থকা নথকা সন্দৰ্ভত এতিয়াই একো মন্তব্য কৰিবলৈ অস্বীকাৰ কৰি এই মন্তব্য ডিব্ৰুগড় আৰক্ষী থানাৰ ভাৰপ্ৰাপ্ত বিষয়া সিদ্ধেশ্বৰ বৰাৰ।
বেংকৰ পৰা ধন নোহোৱাত ক্ষোভ প্ৰকাশ কৰি অৱসৰপ্ৰাপ্ত অধ্যাপক গোস্বামীয়ে কয়, “বেংকতে ধন নিৰাপদ নহ’লে কেনেকৈ হ’ব? এয়া মোৰ কষ্টৰ ধন আৰু যেনেকৈ হ’লেও বেংকে মোক ঘূৰাই দিব লাগিব।”
আনহাতে যদি ঠগবাজি হৈছে তেন্তে গ্ৰাহককেইজনক ধন ঘূৰাই দিয়া হ’ব বুলি নিশ্চিতি দিয়াৰ লগতে নিজাববীয়া তদন্ত আৰম্ভ কৰিছে বেংক কৰ্তৃপক্ষই। ‘আমি ইতিমধ্যে তদন্ত আৰম্ভ কৰিছো।
চেন্নাই আৰু হায়দৰাবাদৰ যিকেইটা শাখাৰ পৰা ধনখিনি উলিয়াই নিছিল তাতো তেওঁলোকে তদন্ত কৰিছে,” নৰ্থ ইষ্ট নাও-ক জনালে ডিব্ৰুগড়স্থিত শাখাৰ পৰিচালক আচাৰ্জি সোণোৱালে।
