ষ্টে’ট বেংক অৱ ইণ্ডিয়াৰ কৰ্মচাৰীৰ কাম-কাজক লৈ বহু গ্ৰাহকৰ সঘন অভিযোগৰ মাজতে বেংকটোৰ হাইলাকান্দি শাখাৰ সৈতে শনিবাৰৰ পৰা তাৎক্ষণিকভাৱে কাৰ্য্যকৰী হোৱাকৈ প্ৰশাসনৰ সকলো লেন-দেন বাতিল কৰিছে জিলা উপায়ুক্তই।
বেংকটোত থকা জিলা প্ৰশাসনৰ সকলো বেংক একাউণ্ট উঠাই লোৱাৰ লগতে ইয়াত ধন জমা নকৰাৰ বাবে শনিবাৰে নিৰ্দেশ জাৰি কৰিছে উপায়ুক্ত আদিল খানে।
জিলা বেংকাৰ সমিতিৰো অধ্যক্ষ উপায়ুক্তগৰাকীয়ে বেংকটোৰ কাম-কাজত ভীষণ অসন্তুষ্টি ব্যক্ত কৰি এই কঠোৰ নিৰ্দেশ জাৰি কৰিছে।
‘‘চৰকাৰী আঁচনিসমূহৰ ৰূপায়ণৰ লগতে গ্ৰাহক সেৱাৰ ক্ষেত্ৰটো এচ বি আই, হাইলাকান্দিৰ কাম-কাজ আৰু ব্যৱহাৰ কোনো ক্ষেত্ৰতে সন্তোষজনক নহয়,” উপায়ুক্তৰ নিৰ্দেশত উল্লেখ।
জিলাখনৰ আটাইতকৈ বৃ্হৎ শাখা হোৱা সত্বেও বিভিন্ন চৰকাৰী আঁচনিসমূহৰ ৰূপায়ণ কৰা দূৰৰ কথা, এইক্ষেত্ৰত বাধাহে দিয়া বুলিও গুৰুতৰ অভিযোগ উত্থাপন কৰিছে উপায়ুক্তগৰাকীয়ে।
‘‘জমা আৰু ঋণৰ ন্যূনতম অনুপাত (CD ratio) বাহাল ৰখাত এচ বি আইৰ হাইলাকান্দি শাখা সদায় বিফল হোৱাৰ লগতে ই সামাজিক ক্ষেত্ৰ আৰু অগ্ৰাধিকাৰ ভিত্তিক ঋণ আঁচনিসমূহৰ ক্ষেত্ৰটো ই পুতৌজনকভাৱে ব্যৰ্থ হৈছে,’’ খানে কয়।
উপায়ুক্তগৰাকীয়ে লগতে অভিযোগ কৰে যে গ্ৰাহকৰ প্ৰতি নিৰ্লিপ্ততাৰ উপৰি বিত্ত মন্ত্ৰ্যালয়ৰ অতিৰিক্ত সচিবে অধ্যক্ষতা কৰা জিলা পৰ্য্যায়ৰ এক গুৰুত্বপূৰ্ণ বৈঠকতো ভাগ লোৱাৰ প্ৰয়োজনবোধ কৰা নাছিল বেংকটোৱে।
বেংকটোৰ এই পুতৌজনক সেৱাৰ বিষয়ে উপায়ুক্তই ইতিমধ্যে অসমৰ মুখ্য সচিব, বিত্ত বিভাগৰ প্ৰধান সচিব আৰু গুৱাহাটীস্থিত এচ বি আইৰ মুখ্য মহাপ্ৰবন্ধকৰ দৃষ্টি আকৰ্ষণ কৰিছে।
