ক্ৰমাৎ অপৰাধীৰ ৰম্যভূমিলৈ পৰিণত হৈছে বৰপেটা জিলা ৷ এজনৰ পাছত আন এজন অপৰাধী আৰক্ষীৰ হাতত গ্ৰেপ্তাৰ হোৱাৰ ঘটনাই তাকেই প্ৰমাণ কৰে।
দুই তিনিদিন পূৰ্বে জিলাখনৰ বিভিন্ন স্থানৰ পৰা ৩ জন জেহাদীক গ্ৰেপ্তাৰ কৰাৰ পাছত আজি জিলাখনৰ চেঙাৰ পৰা নিষিদ্ধ ড্ৰাগছসহ ড্ৰাগছ ব্যৱসায়ী এজনক গ্ৰেপ্তাৰ কৰে বৰপেটা আৰক্ষীয়ে ৷
এক গোপন সুত্ৰৰ পম খেদি বৰপেটাৰ উপ আৰক্ষী অধীক্ষক সমীৰণ বৈশ্যৰ নেতৃত্বত যোৱা আৰক্ষীৰ এটা দলে চেঙা সমষ্টিৰ বৰ আগদিয়া নামৰ গাঁৱখনত অভিযান চলাই নিষিদ্ধ ব্ৰাউন ছুগাৰসহ এজন ড্ৰাগছ ব্যৱসায়ীক গ্ৰেপ্তাৰ কৰিবলৈ সক্ষম হয় ৷
ধৃত ড্ৰাগছ ব্যৱসায়ীজন হৈছে বৰ আগদিয়া গাঁওৰ আমিনুল মিঞা ৷
ধৃত ড্ৰাগছ ব্যৱসায়ীজনৰ পৰা আৰক্ষীয়ে ব্ৰাউন ছুগাৰৰ ৭ টা পেকেট জব্দ কৰিবলৈ সক্ষম হয় ৷
ড্ৰাগছখিনিৰ মূল্য আনুমানিক পোন্ধৰ লাখ টকা হব বুলি জানিব পৰা গৈছে ৷
ধৃত ড্ৰাগছ ব্যৱসায়ীজনে এই ব্ৰাউন ছুগাৰ ক’ৰ পৰা আনিছে তাৰ অনুসন্ধান অব্যাহত ৰাখিছে বৰপেটা আৰক্ষীয়ে ৷