আন্দামানৰ সমীপৱৰ্তী বেৰেন দ্বীপতস্থিত ভাৰতৰ একমাত্ৰ সক্ৰিয় আগ্নেয়গিৰিটো চলিত মাহত দুবাৰকৈ উদ্গীৰণৰ ঘটাৰ খবৰ পোৱা গৈছে। সোমবাৰে বিভাগীয় বিষয়া সকলে এই তথ্য প্ৰকাশ কৰিছে।
প্ৰাপ্ত তথ্য অনুসৰি, ১৩ আৰু ২০ ছেপ্টেম্বৰত দুবাৰ উদ্গীৰণ হৈছিল যদিও ইয়াক মৃদু প্ৰকৃতিৰ বুলি বৰ্ণনা কৰা হৈছে। ওচৰৰ অঞ্চলৰ বাবে কোনো তাৎক্ষণিক বিপদৰ সৃষ্টি হোৱা নাই বুলি সদৰী কৰিছে।
উল্লেখ্য যে প’ৰ্ট ব্লেয়াৰৰ পৰা প্ৰায় ১৩৮ কিলোমিটাৰ উত্তৰ-পূৰ্বে অৱস্থিত বেৰেন দ্বীপৰ এই আগ্নেয়গিৰিটো দক্ষিণ এছিয়াৰ একমাত্ৰ সক্ৰিয় আগ্নেয়গিৰি। প্ৰায় ৩ বৰ্গ কিলোমিটাৰ দৈৰ্ঘ্যৰ এই দ্বীপটো লাভা আৰু ছাইৰে আৱৃত থাকে, য’ত খুব কম গছগছনি দেখা যায়। সমুদ্ৰপৃষ্ঠৰ পৰা ৩৫৪ মিটাৰ উচ্চতাত অৱস্থিত আন্দামান-নিকোবৰ দ্বীপপুঞ্জৰ এক বিশেষ ভূতাত্ত্বিক বৈশিষ্ট্য হিচাপে পৰিগণিত জীৱন্ত আগ্নেয়গিৰিটো।
৮.৩৪ বৰ্গ কিলোমিটাৰ এলেকা জুৰি বিস্তৃত এই দ্বীপটোত কোনো মানৱ বসতি নাই। ইয়াৰ ওচৰৰ স্বৰাজ দ্বীপ (হেভলক দ্বীপ) আৰু নাৰ্কণ্ডাম দ্বীপ প্ৰায় ১৪০-১৫০ কিলোমিটাৰ দূৰত অৱস্থিত।
আন্দামান-নিকোবৰ প্ৰশাসনৰ তথ্য অনুসৰি ১৭৮৭ চনত প্ৰথমবাৰৰ বাবে বেৰেন দ্বীপত আগ্নেয়গিৰিৰ কাৰ্যকলাপ লক্ষ্য কৰা হৈছিল। তাৰ পিছত ১৯৯১, ২০০৫, ২০১৭ আৰু ২০২২ চনত উল্লেখযোগ্য উদ্গীৰণ হৈছিল। এই বছৰ জুলাই মাহতো এটা উদ্গীৰণৰ ঘটনা ঘটিছিল।
শেহতীয়া উদ্গীৰণসমূহ সৰু স্বভাৱৰ বুলি উল্লেখ কৰিছে। এতিয়ালৈ মানুহৰ বসতিৰ বাবে কোনো বিপদৰ সৃষ্টি কৰা নাই। যদিও, দ্বীপটোৰ ওপৰত সততে নিবিড়ভাৱে নিৰীক্ষণ চলাই থকা হৈছে।
