বহুদিন ধৰি ভাৰতীয় ক্ৰিকেট নিয়ন্ত্ৰণ বোৰ্ডৰ (বিচিচিআই)ভিতৰত চিন্তা-চৰ্চা অব্যাহত আছিল। অৱশেষত ইয়াৰ বাৰ্ষিক সাধাৰণ সভাত এই প্ৰস্তাৱত ছীল-মোহৰ পৰিল। ২০২২চনৰ পৰা আইপিএলত ১০টা দলে খেলিব।
বৃহস্পতিবাৰে আহমেদাবাদ বোৰ্ডৰ বাৰ্ষিক সাধাৰণ সভাৰ বৈঠকত আইপিএলত ১০টা দল খেলোৱাৰ বিষয়টোৱে বিশেষ স্থান লাভ কৰে।
এইবছৰ সংযুক্ত আৰৱ আমিৰশ্বাহীত আইপিএল চলি থকাৰ সময়তে বিচিচিআইৰ সভাপতি সৌৰভ গাংগুলী আৰু ,চিব জয় শ্বাহে আইপিএলৰ অধ্যক্ষ ব্ৰীজেশ পেটেল আৰু বোৰ্ডৰ অন্যান্য কৰ্মকৰ্তাৰ সৈতে প্ৰাথমিক আলোচনাত বিষয়টোৰ মোখনি মাৰিছিল।
সেইমতে, বাৰ্ষিক সাধাৰণ সভাৰ বৈঠকত আইপিএলত ১০টা দল খেলোৱাৰ প্ৰস্তাৱ চূড়ান্ত কৰা হয়।
বাতৰি অনুসৰি, ২০২২চনৰ আইপিএলত দুটা নতুন দলক অন্তৰ্ভুক্ত কৰা হ’ব।
২০২২তহে কিয় আইপিএলত দলৰ সংখ্যা বৃদ্ধি কৰা হ’ব তাৰ কাৰণ হিচাপে কোৱা হৈছে যে অহা বছৰ আইপিএল যদি নিৰ্দ্ধাৰিত এপ্ৰিল-মে’ মাহতে অনুষ্ঠিত হয়, তেনেহ’লে হাতত বেছি সময় নাই।
নতুন দল অন্তৰ্ভুক্ত হ’লে সম্পূৰ্ণ নীলাম কৰিব লাগিব। তেনে ক্ষেত্ৰত প্ৰস্তুতিৰ বাবে দলবোৰৰ হাতত যথেষ্ট সময় নাথাকিব। সেয়ে, খৰধৰ নকৰি এবছৰ পাছত অৰ্থাৎ ২০২২লৈ বিচিচিআইয়ে অপেক্ষা কৰিব বিচাৰিছে।