ক’ৰ’না ভাইৰাছৰ ভয়াৱহ সংক্ৰমণৰ বাবে যেতিয়া আই পি এল ২০২০ এক অনিশ্চয়তাৰ অৱস্থাত আছিল, তেতিয়াই সিদ্ধান্ত লোৱা হৈছিল যে প্ৰতিযোগিতাখন য়ুনাইটেড আৰব এমিৰেটছ চমুকৈ য়ু এ ইত অনুষ্ঠিত হ’ব।
শেষত, ২০২০ বৰ্ষৰ আই পি এল তাতেই অনুষ্ঠিত হয় আৰু সুকলমে সমাপনো ঘটে।
প্ৰতিযোগিতাখনৰ সফল পৰিসমাপ্তিৰ পিছত সকলোৱে জানিবলৈ উচ্ছুক যে আই পি এল অনুষ্ঠিত কৰাৰ বাবদ বি চি চি আইয়ে য়ু এ ই ক্ৰিকেট ব’ৰ্ডক কিমান পৰিমাণৰ ধণৰাশি প্ৰদান কৰিলে।
এই প্ৰশ্নৰ অৱতাৰণা হোৱাৰ পিছতে ‘মুম্বাই মিৰৰ’ নামৰ সংবাদ প্ৰতিষ্ঠানটোৱে এক নিৰ্ভৰযোগ্য সূত্ৰৰ উদ্ধৃতিৰে দাবী কৰিছে যে বি চি চি আইয়ে য়ু এ ই ক্ৰিকেট ব’ৰ্ডক ১৪ মিলিয়ন ডলাৰ প্ৰদান কৰিছে। অৰ্থাৎ ভাৰতীয় মতে এই ধনৰ পৰিমাণ হৈছে প্ৰায় ১০০ কোটি!
উল্লেখ্য যে, যেতিয়া মাৰ্চত ক’ৰ’নাৰ প্ৰকোপ বাঢ়িবলৈ আৰম্ভ কৰিছিল, বোৰ্ডে আৰম্ভণিতে প্ৰতিযোগিতাখন ১৪ এপ্ৰিললৈ স্থগিত কৰে।
কিন্তু ভাইৰাছৰ সংক্ৰমণ ভয়াবহভাৱে বৃদ্ধি পাব ধৰাত ২০২০ চনৰ আই পি এল অনিৰ্দিষ্টকাললৈ স্থগিত কৰা হৈছিল।
প্ৰতিযোগিতাখন অনুষ্ঠিত কৰিব নোৱাৰিলে বি চি চি আইয়ে ৪,০০০ কোটি টকা লোকচানৰ সন্মুখীন হ’ব লাগিব। সেয়েহে বোৰ্ডে ভাৰতৰ বিপৰীতে বিকল্প দেশৰ সন্ধান আৰম্ভ কৰি দিয়ে।
আই পি এল অনু্ষ্ঠিত কৰাৰ বাবে প্ৰথমটো প্ৰস্তাৱ আহিছিল য়ু এ ইৰ পৰা। শ্ৰীলংকা ক্ৰিকেট বোৰ্ডেও ইয়াৰ বাবে আগবাঢ়ি আহিছিল।
বহু জল্পনা কল্পনাৰ অন্তত ভাৰতে সাহসী সিদ্ধান্ত গ্ৰহণ কৰি য়ু এ ই ক্ৰিকেট বোৰ্ডৰ প্ৰস্তাৱত সঁহাৰি দিছিল। ইয়াৰ পূৰ্বে অৰ্থাৎ ২০১৪ চনৰ লোকসভা নিৰ্বাচনৰ বাবে য়ু এ ইত আই পি এলৰ প্ৰথম ২০খন মেচ অনুষ্ঠিত হৈছিল।
সফলতাৰে সম্পন্ন হোৱা ২০২০ বৰ্ষৰ আই পি এল শ্বাৰজাহ, আবুধাবি আৰু ডুবাইৰ ষ্টেডিয়ামত দৰ্শক অবিহনেই প্ৰায় দুমাহ ধৰি বিশ্বৰ ক্ৰিকেট অনুৰাগীসকলক মনোৰঞ্জন প্ৰদান কৰিছিল।
উল্লেখ্য যে, এইবাৰেই শেষ নহয়, পৰৱৰ্তী বছৰৰ আই পি এলো য়ু এ ইত অনুষ্ঠিত হোৱাৰ সম্ভাৱনা আছে। বি চি চি আইৰ সভাপতি সৌৰভ গাংগুলীয়ে অৱশ্যে প্ৰতিযোগিতাখন নিজ দেশত হোৱাতো বিচাৰে। কিন্তু যদি পৰিস্থিতি অনুকূল নহয়, তেনেহ’লে মৰুৰ দেশতে পৰৱৰ্তী আই পি এল অনুষ্ঠিত হোৱাটো খাটাং।
ইয়াৰ উপৰি, ভাৰত আৰু ইংলেণ্ডৰ মাজত হ’বলগীয়া শৃংখলাটোও য়ু এ ইত অনুষ্ঠিত হোৱাৰ সম্ভাৱনা আছে।