শেহতীয়াভাৱে পশ্চিম এছিয়াত চলি থকা যুদ্ধৰ পৰিৱেশ আৰু তাৰ ফলত সৃষ্টি হোৱা সংকটৰ প্ৰতি লক্ষ্য ৰাখি দেশবাসীক এক বিশেষ আহ্বান জনাইছে প্ৰধানমন্ত্ৰী নৰেন্দ্ৰ মোদীয়ে। প্ৰধানমন্ত্ৰীগৰাকীয়ে পেট্ৰ’ল, ডিজেল আৰু ৰন্ধন গেছৰ দৰে ইন্ধনৰ ব্যৱহাৰৰ ক্ষেত্ৰত সকলোকে অধিক সংযমী হ’বলৈ অনুৰোধ জনাইছে। তেওঁ উল্লেখ কৰে যে এই ধৰণৰ ইন্ধনৰ বাবে ভাৰত সম্পূৰ্ণৰূপে স্বাৱলম্বী নহয় আৰু দেশৰ প্ৰয়োজনীয় ইন্ধনৰ এক বৃহৎ অংশ বিদেশৰ পৰা আমদানি কৰিবলগীয়া হয়। সেয়েহে এই আমদানিকৃত সামগ্ৰীসমূহ অপচয় নকৰিবলৈ তেওঁ দেশবাসীৰ ওচৰত আৰ্জি জনাইছে। প্ৰধানমন্ত্ৰীৰ মতে ইন্ধনৰ সঠিক ব্যৱহাৰে যুদ্ধৰ ফলত সৃষ্টি হোৱা সাম্প্ৰতিক পৰিস্থিতিৰ বিৰূপ প্ৰভাৱৰ পৰা দেশক ৰক্ষা কৰাত সহায় কৰিব।
দেওবাৰে হায়দৰাবাদত আয়োজিত এক চৰকাৰী কাৰ্যসূচীত অংশ লৈ প্ৰধানমন্ত্ৰীয়ে এই গুৰুত্বপূৰ্ণ মন্তব্য কৰে। সেই অনুষ্ঠানৰ পৰাই তেওঁ ভাৰ্চুৱেল মাধ্যমেৰে তেলেংগানাত প্ৰায় ৯,৪০০ কোটি টকাৰ বিভিন্ন উন্নয়নমূলক প্ৰকল্পৰ আধাৰশিলা স্থাপন কৰে। এই অনুষ্ঠানত তেলেংগানাৰ মুখ্যমন্ত্ৰী ৰেৱন্ত ৰেড্ডীও উপস্থিত আছিল। ভাষণ প্ৰসংগত মোদীয়ে পশ্চিম এছিয়াৰ বৰ্তমানৰ অস্থিৰতা আৰু পেট্ৰ’লজাত সামগ্ৰীৰ যোগানৰ ওপৰত পৰা প্ৰভাৱৰ কথা উল্লেখ কৰে। তেওঁ কয় যে বৰ্তমান সময়ত পেট্ৰ’ল, ডিজেল আৰু গেছ অতি সাৱধানে আৰু যিমানখিনি প্ৰয়োজন সিমানখিনিহে ব্যৱহাৰ কৰা উচিত। এনে কৰিলে দেশৰ বৈদেশিক মুদ্ৰা ৰাহি হোৱাৰ লগতে বিশ্বজুৰি চলি থকা যুদ্ধৰ সংকটৰ প্ৰভাৱ আমাৰ দেশত কমকৈ পৰিব।
প্ৰণিধানযোগ্য যে পশ্চিম এছিয়াত যুদ্ধৰ পৰিৱেশ সৃষ্টি হোৱাৰ বাবে বিশেষকৈ হৰমুজ প্ৰণালীৰ দৰে গুৰুত্বপূৰ্ণ জলপথেৰে ইন্ধন সৰবৰাহৰ ক্ষেত্ৰত অনিশ্চয়তাই দেখা দিছিল। আন্তৰ্জাতিক বাণিজ্যৰ বাবে অত্যন্ত গুৰুত্বপূৰ্ণ এই পথছোৱাত অশান্তিৰ সৃষ্টি হোৱাৰ বাবে সমগ্ৰ বিশ্বতে ইন্ধনৰ যোগানত বাধা আহি পৰিছিল। ভাৰততো ইয়াৰ কিছু প্ৰভাৱ পৰিছিল যদিও চৰকাৰে পৰিস্থিতি বহু পৰিমাণে চম্ভালিবলৈ সক্ষম হৈছে। এনে এক স্পৰ্শকাতৰ সময়ত প্ৰধানমন্ত্ৰীয়ে দেশবাসীক ইন্ধন ৰাহি কৰিবলৈ দিয়া এই বাৰ্তাই বিশেষ তাৎপৰ্য বহন কৰিছে।
