এন আৰ চিৰ দাবী-আপত্তি চলি থকাৰ সময়ত বিভিন্ন স্থানৰ পৰা অহা ভুৱা আপত্তিৰ অভিযোগৰ বিষয়টো চৰ্চাত থকাৰ মাজতে ইয়াক বাঙালী লোকৰ প্ৰতি ষড়যন্ত্ৰ আখ্যা দিছে সদৌ অসম বাঙালী যুৱ ছাত্ৰ ফেডাৰেশ্যনে।
শনিবাৰে দিচপুৰ প্ৰেছ ক্লাৱত এখন সংবাদমেল অনুষ্ঠিত কৰি সংগঠনটোৰ কেন্দ্ৰীয় সভাপতি দীপক দেই এই গুৰুতৰ অভিযোগ আনিছে। এন আৰ চিৰ পৰা বহু লক্ষ লক্ষ প্ৰকৃত ভাৰতীয় লোকৰ নাম বাদ পৰিব বুলিও তেওঁ মন্তব্য কৰে।
‘’যিখন এন আৰ চি প্ৰস্তুত হ’বলৈ গৈ আছে তাৰ পৰা বহু লক্ষ লক্ষ প্ৰকৃত ভাৰতীয় বাঙালী লোকৰ নাম বাদ পৰিব। কাৰণ অসমৰ এচাম উগ্ৰ জাতীয়তাবাদী আৰু বাঙালী বিৰোধী লোকে অসমৰ লগতে হ’বলগীয়া এন আৰ চি খনক বাঙালী মুক্ত কৰাৰ চেষ্টা চলাই আছে’’,-দীপক দেৰ মন্তব্য।
তেওঁ আছু আৰু এবছুৰ প্ৰতিও এইক্ষেত্ৰত সন্দেহৰ আঙুলি টোঁৱাইছে। তেওঁ লগতে কয় যে আছু বা এবছুৰ সদস্যই বাঙালী লোকৰ বিৰুদ্ধে আপত্তি দাখিল কৰাটো দুৰ্ভাগ্যজনক।
ইপিনে, আপত্তি দাখিল কৰা ব্যক্তিসকল শুনানিত উপস্থিত নথকা বিষয়টোক লৈ প্ৰতিক্ৰিয়া ব্যক্ত কৰি ভুৱা আপত্তি দাখিল কৰা তেনে লোকৰ বিৰুদ্ধে ব্যৱস্থা গ্ৰহণৰ দাবী জনায়।
ইপিনে বহু বাঙালী লোকক একপক্ষীয় ৰায়ৰ জৰিয়তে বিদেশীৰ নামত যধে-মধে ডিটেনশ্যন কেম্পলৈ নিক্ষেপ কৰা বুলি মন্তব্য কৰি সেইসকল লোকৰ ক্ষেত্ৰত ন্যায়ালয়ত আত্মপক্ষ সমৰ্থনৰ সুবিধা দিয়াৰ দাবী জনায়। এইক্ষেত্ৰত ‘নিৰপেক্ষতাৰ শপত লোৱা’ চৰকাৰখনক পদক্ষেপ ল’বলৈ আহ্বান জনায়।
একেখন সংবাদমেলতে বিশিষ্ট সমাজসেৱক ৰক্তিম স্বামীয়ে বিজেপিৰ দিনত বাঙালী লোকসকল অধিক নিৰাপত্তাহীনতাত ভূগিবলগীয়া হৈছে বুলি মন্তব্য কৰে।
‘’অগপ-কংগ্ৰেছৰ আমোলত আমি এনেকুৱা নিৰাপত্তাহীনতাত ভোগা নাছিলো। চৰকাৰৰ দায়িত্ব জনসাধাৰণৰ জীৱন সম্পত্তিৰ সুৰক্ষা দিয়া। কিন্তু এতিয়া সম্পত্তি দূৰৈৰ কথা, জীৱনৰে সুৰক্ষা নাই,’’-ৰক্তিম স্বামীয়ে সংবাদমেলত কয়।
নিৰাপত্তাহীনতাত ভূগি অসমৰ বহু হিন্দু বাঙালী লোকে এতিয়া অসম এৰি কলকাতা, দিল্লী আদিত থাকিবলৈ লৈছে বুলিও তেওঁ মন্তব্য কৰে। কেৱল ভোট দিবলৈহে তেওঁলোক অসমলৈ আহে বুলিও তেওঁ কয়।
