হেলমেট নিপিন্ধাকৈ চলাইছিল স্কুটি, বাটত ৰখালে আৰক্ষীয়েঃ আৰক্ষীৰ হাতত কামুৰি পলায়নৰ চেষ্টা যুৱকৰ
যান-বাহন আইন উলংঘা কৰি হেলমেট পৰিধান নকৰাকৈ স্কুটি চলাই আহিছিল এজন যুৱকে। যাত্ৰাপথতে তেওঁক আগচি ধৰিলে যান-বাহন আৰক্ষীয়ে।
ইয়াৰ পিছতে যি ঘটিল, সেয়া অভাৱনীয়। ঘটনা বাংগালুৰুৰ। আৰক্ষীৰ হাতত ধৰা পৰা যুৱকজনৰ কাণ্ডই এতিয়া ব্যাপক চাঞ্চল্যৰ সৃষ্টি কৰিছে।
যুৱকজনৰ নাম ছায়াদ ছাফি। উইলছন গাৰ্ডেনৰ সমীপত নিয়ম উলংঘা কৰাৰ অভিযোগত যান-বাহন আৰক্ষীয়ে আগচি ধৰে ছায়াদ ছাফিক।
এজন ট্ৰেফিক কনিষ্টবলে স্কুটিৰ চাবি কাঢ়ি নিয়াৰ লগতে সিদ্দাৰামেশ্বৰ কৌজালাগী নামৰ হেড কনিষ্টবলজনে মোবাইলত ভিডিঅ’ কৰি তথ্য লিপিবদ্ধ কৰিবলৈ চেষ্টা কৰে।
তেনে সময়তে যুৱকজনে কনিষ্টবলৰ হাতৰ আঙুলিত কামুৰি স্কুটিৰ চাবি কাঢ়ি নিয়ে। ভিডিঅ’টোত শুনা গৈছে যুৱকজনৰ কণ্ঠস্বৰ।
তেওঁ উল্লেখ কৰা মতে চিকিৎসালয়লৈ যোৱাৰ উদ্দেশ্যে তেওঁ ওলাই আহিছিল আৰু লৰালৰিৰ বাবে তেওঁ হেলমেট পিন্ধিবলৈ পাহৰিলে।
তেওঁৰ ভিডিঅ’ ভাইৰেল হ’লেও কোনো সমস্যা নাই বুলি যুৱকজনে লগতে মন্তব্য কৰে। ছাফিয়ে লগতে হেড কনিষ্টবলজনকো ভিডিঅ’ কৰাত বাধা আৰোপ কৰে।
ইয়াৰ পিছতে তেওঁ পলায়নৰ চেষ্টা কৰে যদিও আৰক্ষীয়ে লগে লগে তেওঁক ধৰি গ্ৰেপ্তাৰ কৰে।
কৰ্তব্যৰত আৰক্ষী জোৱানক নিৰ্যাতন আৰু শাৰীৰিকভাৱে আঘাত কৰা, ভাবুকি প্ৰদান আদি অভিযোগত তেওঁৰ বিৰুদ্ধে গোচৰ ৰুজু কৰা হৈছে বুলি আৰক্ষীয়ে জানিবলৈ দিয়ে।