বিশ্বৰ বিভিন্ন দেশৰ অস্থিৰ পৰিস্থিতিৰ মাজতে পুনৰ এখন চৰকাৰ ভংগ কৰাৰ চেষ্টা পোহৰলৈ আহিছে! পশ্চিম আফ্ৰিকাৰ দেশ বেনিনত দেওবাৰে ৰাজ্যিক টেলিভিছনত (TV) উপস্থিত হৈ সেনাই ৰাষ্ট্ৰপতি পেট্ৰিছ টেলনক পদৰ পৰা অপসাৰণ কৰা বুলি ঘোষণা কৰে। মিলিটাৰী কমিটি ফৰ ৰিফাউণ্ডেচন (CMR) ৰ সদস্য বুলি চিনাকী দিয়া জোৱানসকলে তাৎক্ষণিকভাৱে সিদ্ধান্ত ঘোষণা কৰে যে টেলন আৰু ৰাষ্ট্ৰপতি নহয়। এই অভ্যুত্থান ঘোষণা হোৱাৰ লগে লগে দেশখনত টিভি আৰু ৰেডিঅ’ৰ সম্প্ৰচাৰ তৎক্ষণাত বন্ধ হৈ পৰে।
ফ্ৰান্সৰ দূতাবাসে প্ৰকাশ কৰা তথ্য অনুসৰি, বেনিনৰ বাণিজ্যৰ কেন্দ্ৰ কটনৌৰ (Cotonou) ৰাষ্ট্ৰপতিৰ বাসগৃহৰ সমীপত গুলীৰ শব্দ শুনা গৈছিল। এই পৰিস্থিতিৰ বাবে দেশখনত বাস কৰা ফ্ৰান্সৰ নাগৰিকসকলক ঘৰৰ ভিতৰত থাকিবলৈ অনুৰোধ জনোৱা হৈছে। ইফালে, ৰাষ্ট্ৰপতিৰ কাৰ্যালয়ে জনাইছে যে পেট্ৰিছ টেলন বৰ্তমান সুৰক্ষিত। তেওঁলোকে লগতে দাবী কৰে যে জোৱানৰ এটা সৰু দলে কেৱল এটা টেলিভিশ্যন চেনেলহে দখল কৰিছিল আৰু ইয়াৰ পাছতেই বাকী সেনাই পৰিস্থিতি নিয়ন্ত্ৰণ কৰে। বেনিনৰ স্বৰাজ আৰু জননিৰাপত্তা মন্ত্ৰী লাছানে চেইডোৱেও এই অভ্যুত্থান বিফল হোৱা বুলি দাবী কৰিছে।
ইফালে, অভ্যুত্থানকাৰী সেনাই ঘোষণা কৰিছে যে ৰাষ্ট্ৰপতিৰ পদ আৰু সকলো চৰকাৰী প্ৰতিষ্ঠান আঁতৰাই পেলোৱা হৈছে। স্মৰ্তব্য যে, ১৯৬০ চনত ফ্ৰান্সৰ পৰা স্বাধীনতা লাভ কৰাৰ পিছত বেনিনত এনে অভ্যুত্থান কেইবাবাৰো সংঘটিত হৈছে।
পূৰ্বে এজন সফল ব্যৱসায়ী হিচাপে জনাজাত পেট্ৰিছ টেলনে ২০১৬ চনত ৰাষ্ট্ৰপতি হিচাপে শপত গ্ৰহণ কৰিছিল। তেওঁৰ কাৰ্যকালত বেনিনত বহু উন্নয়নমূলক কাম হোৱা বুলি একাংশই দাবী কৰে; কিন্তু বিৰোধী পক্ষই তেওঁক স্বৈৰাচাৰী বুলি আখ্যা দিয়ে। সংবিধান অনুসৰি, ২০২৬ চনত তেওঁৰ দ্বিতীয় আৰু অন্তিম কাৰ্যকাল শেষ হ’ব।
ৰাষ্ট্ৰপতি টেলনৰ বিৰুদ্ধে হোৱা এই অভ্যুত্থানৰ পূৰ্ৱাভাস চলিত বৰ্ষৰ জানুৱাৰী মাহৰ পৰাই স্পষ্ট হৈ পৰিছিল, যেতিয়া বিদ্ৰোহৰ পৰিকল্পনা কৰাৰ অপৰাধত তেওঁৰ দুজন ঘনিষ্ঠ সহযোগীক ২০ বছৰৰ কাৰাদণ্ড বিহা হৈছিল। ইয়াৰ উপৰি যোৱা মাহত সংসদত ৰাষ্ট্ৰপতিৰ কাৰ্যকাল পাঁচ বছৰৰ পৰা সাত বছৰলৈ বৃদ্ধি কৰাৰ প্ৰস্তাৱটোও গ্ৰহণ কৰা হৈছিল। এনে জটিল পৰিস্থিতিৰ মাজতে আজি তেওঁক অপসাৰণ কৰাৰ কথা পোহৰলৈ আহিছে।
