অহা ১৭জানুৱাৰী দেওবাৰে পুৱা ১০-০০বজাৰ পৰা গুৱাহাটীৰ লক্ষীধৰ বৰা ক্ষেত্ৰত ভাৰতীয় গণনাট্য সংঘ অসম ৰাজ্যিক সমতিয়ে জীৱন শিল্পী জ্যোতিপ্ৰসাদ আগৰৱালাৰ স্মৃতিত “জ্যোতি-স্মৰণ”আৰু হেমাংগ বিশ্বাসৰ সোঁৱৰণত “গণশিল্পী হেমাঙ্গ বিশ্বাস বঁটা প্ৰদান” অনুষ্ঠানৰ আয়োজন কৰিছে বুলি সংঘই এক প্ৰেছ বিজ্ঞপ্তিযোগে জনাইছে।
১০-০০বজাত পতাকা উত্তোলনৰে আৰম্ভ হ’বলগীয়া এই অনুষ্ঠানৰ ১০-৩০ বজাত চিত্ৰশিল্পী জ্যোতিস্মৰণ কাৰ্যসূচীত গুৱাহাটী আৰ্টিষ্ট গীল্ড,চৰকাৰী চাৰু কাৰুকলাৰ চিত্ৰশিল্পী, কাৰ্টুনিষ্ট,ফটোগ্ৰাফাৰ সকলে নিজস্ব শিল্প সম্ভাৰ লৈ অংশগ্ৰহণ কৰিব।
ইয়াত ইপ্টা বুক ৰেলিয়েও বিভিন্ন গ্ৰন্থৰ বিপনি এখনেও অংশগ্ৰহণ কৰিব।ইয়াৰ পিছতে ১১-০০ বজাত মঞ্চ উদ্বোধন কৰা হ’ব জ্যোতিপ্ৰসাদৰ ‘তোৰে মোৰে আলোকৰে যাত্ৰা’ গীতেৰে।
মঞ্চ উদ্বোধনৰ পিছতে হেমাঙ্গ বিশ্বাস বঁটা প্ৰদান কৰা হ’ব।
বঁটা প্ৰদান কৰিব প্ৰথিতযশা বুদ্ধিজীৱী ড:হীৰেন গোহাঁই আৰু যশস্বী কণ্ঠশিল্পী সুদক্ষিণা শৰ্মাই।
উল্লেখযোগ্য যে ২০১৮ আৰু ২০১৯ চনৰ বাবে এই বঁটা আগবঢ়োৱা হৈছে লোকশিল্পী টোকেশ্বৰ সেনাপতি আৰু লোকশিল্পী ওজা ধনেশ্বৰ শইকীয়াক।ইয়াৰ পিছতে সাংস্কৃতিক অনুষ্ঠান আৰম্ভ হ’ব।দুপৰীয়া সকলোৱে ভোগালীৰ জলপান গ্ৰহণ কৰিব।
বিজ্ঞপ্তিত সমূহ ৰাইজৰ উপস্থিতি কামনা কৰার লগতেে অংশগ্ৰহণকাৰী সমূহ সতীৰ্থক হাতে হাতে নিজে প্ৰস্তুত কৰা শিল্প সম্ভাৰ লৈ অংশগ্ৰহণ কৰিবলৈ অনুরোধ জনোবা হৈছে।
