সত্ৰীয়া পৰম্পৰাৰে বৰপেটা সত্ৰত আজি জ্বলোৱা হ’ল মাঘৰ উৰুকাৰ মেজি।
বৰপেটাত ১৪ জানুৱাৰীত উৰুকা পালন কৰাৰ পাছত ১৫ জানুৱাৰি অৰ্থাৎ আজি পুৱা সত্ৰৰ নৈমিত্তিক প্ৰসংগৰ পিছত পূৰ্বৰে পৰা চলি অহা ৰীতিৰে সত্ৰৰ টুপৰ চোতালত বিৰিণাৰে সজা মেজিত অগ্নি সংযোগ কৰা হয়।
বৰপেটা সত্ৰৰ বুঢ়া সত্ৰীয়া বশিষ্ঠ শৰ্মাৰ উপস্থিতিত মেজি জ্বলোৱা সময়ত উপস্থিত থাকে সত্ৰৰ ভকত বৈষ্ণৱ আৰু ভক্তপ্ৰাণ ৰাইজ।
বৰপেটা সত্ৰত মাঘৰ মেজি জ্বলোৱা প্ৰত্যক্ষ কৰাৰ লগতে বিহু উপলক্ষ্যে সত্ৰত সেৱা জনাবলৈ বহু ভক্তৰ সমাগম হয়।
উল্লেখ্য যে, পৰম্পৰা অনুযায়ী পুহৰ সংক্ৰান্তিৰ পৰা ৪ মাঘলৈ বৰপেটা সত্ৰত ৫ দিনীয়াকৈ মাঘৰ দোমাহী পালন কৰা হয়।
এই ৫ দিনে সত্ৰত নিত্য প্ৰসংগৰ লগতে নৈমিত্তিক প্ৰসংগৰ সংযোজন কৰা হয়।
লোকসংস্কৃতি আৰু সত্ৰীয়া সংস্কৃতিৰ সংমিশ্ৰণত সত্ৰ নগৰী বৰপেটাত ভোগালী বিহুৱে এক স্বকীয়ৰূপ ধাৰণ কৰি আহিছে।
বৰপেটা সত্ৰত মাঘৰ পহিলা তাৰিখটো বৰদোমাহী হিচাপে পালন কৰা হয়। বৰদোমাহীৰ দিনা বৰপেটা সত্ৰত ৰাতিপুৱাৰ নিত্য-নৈমিত্তিক প্ৰসংগৰ পিছত সত্ৰৰ টুপৰ চোতালত মেজি প্ৰজ্বলন কৰা হয়।
মেজিৰ জুইৰ উত্তাপ লোৱাৰ লগতে সত্ৰত সেৱা জনাবলৈ পুৱাৰে পৰা সত্ৰত সমবেত হয় অগনন ভক্ত আৰু দৰ্শনাৰ্থী।
উল্লেখ্য যে মেজিৰ জুইৰ ছাঁইৰে কপালত তিলক লৈ প্ৰতিজন ভক্ত ঘৰমুৱা হয়।