উত্তেজিত জনতা তথা প্ৰতিবাদকাৰীসকলক ছ্ত্ৰভংগ দিয়াৰ বাবে অসম আৰক্ষীয়ে পৃথিৱীৰ আটাইতকৈ তীক্ষ্ণ ভোট জলকীয়াক অস্ত্ৰ হিচাপে ব্যৱহাৰ কৰিব।
আৰক্ষী সূত্ৰই প্ৰকাশ কৰা অনুসৰি অসম আৰক্ষীয়ে কন্দুৱা গেছ ৰাবাৰ বুলেটৰ ধৰণে ভোট জলকীয়াক হেণ্ড গ্ৰেনেডৰ লেখিয়াকৈ নতুন অস্ত্ৰ হিচাপে ব্যৱহাৰ কৰিব।
‘চিলি গ্ৰেনেড’কে ধৰি প্ৰায় ৩০,০০০ হাজাৰ বিভিন্ন ধৰণৰ অ-প্ৰাণঘাটি গোলাবাৰুদ আৰক্ষীয়ে বিগত সময়ছোৱাত নিজৰ অস্ত্ৰাগাৰত অন্তৰ্ভূক্ত কৰিছে।
বিশ্বৰ আটাইতকৈ তীক্ষ্ণ জলকীয়া হিচাপে ভোট জলকীয়াই ২০০৭ চনত গ্ৰিনিজ বুক অব ৱৰ্ল্ড ৰেকৰ্ডত নাম অন্তৰ্ভূক্ত কৰিবলৈ সক্ষম হৈছিল। উত্তৰ-পূব বিশেষকৈ অসম, অৰুণাচল, নাগালেণ্ড আৰু মণিপুৰত ভোট জলকীয়াৰ খেতি কৰা হয়।
ভাৰতীয় প্ৰতিৰক্ষা গৱেষণা আৰু বিকাশ মন্ত্ৰালয়ৰ লেবৰটৰীত পৰীক্ষামূলকভাৱে ব্যৱহাৰৰ পাছত যিবোৰ যোগ্য হিচাপে বিবেচনা কৰা হয় সেইবোৰকহে অ-প্ৰাণঘাটি অস্ত্ৰ ভাণ্ডাৰত অন্তৰ্ভূক্ত কৰা হয়।
উল্লেখযোগ্য যে, অসম আৰক্ষীৰ অ-প্ৰাণঘাটি অস্ত্ৰভাণ্ডাৰত ‘ভোটজলকীয়া গ্ৰেনেড’ অন্তৰ্ভূক্ত কৰাৰ লগে লগে কন্দুৱা গেছ, ৰাবাৰ বুলেটৰ লগতে ভোট জলকীয়া উত্তেজিত জনতাৰ বাবে নিশ্চিতভাৱে ত্ৰাসৰ কাৰণ হৈ পৰিব ।