পুনৰ এক জঘন্য তথা বৰ্বৰ ঘটনা পোহৰলৈ আহিছে। এগৰাকী পুত্ৰই নিজ মাতৃকে মৰিয়াই হত্যা কৰাৰ এক গুৰুতৰ অভিযোগ উত্থাপন হৈছে। আৰক্ষীয়ে প্ৰকাশ কৰা ঘটনাৰ বিৱৰণীৰ মতে মধ্য প্ৰদেশৰ ভূপালৰ ৩২ বছৰীয়া এজন যুৱকে মাতৃয়ে তেওঁক বিবাহ কৰোৱাত বাধা আৰোপ কৰাৰ বাবেই হত্যা কৰিছে।
স্থানীয় কোহ-ই-ফিজা আৰক্ষী থানাৰ উপ পৰিদৰ্শক প্ৰদীপ গুৰজাৰে সংবাদ মাধ্যমৰ আগত প্ৰকাশ কৰা মতে যোৱা মঙলবাৰে মাজনিশা আব্দুল আহমেদ ফাৰহান নামৰ যুৱকজনে মাতৃ আছমা ফাৰুখ(৬৭)ক ক্ৰিকেট বেট আৰু লোহাৰ পাইপেৰে আঘাত কৰি হত্যা কৰে।
ঘটনাৰ পিছতে নিজ ভগ্নী আৰু জোঁৱায়েকক মাতৃয়ে মজিয়াত পৰি আঘাতপ্ৰাপ্ত হৈ মৃত্যুক আঁকোৱালি লোৱা বুলি জনাইছিল অভিযুক্ত ফাৰহানে। প্ৰকাশ পোৱা মতে ফাৰহানৰ ভগ্নীয়ে বিবাহপাশত আৱদ্ধ হোৱাৰ পাছত মাতৃৰ সৈতে বাস কৰিছিল অভিযুক্ত ফাৰহান।
ফাৰহানৰ ভগ্নী আৰু জোঁৱায়েকে ঘটনা সন্দৰ্ভত আৰক্ষীক অৱগত কৰে আৰু আৰক্ষীয়ে ঘটনাস্থীলত উপস্থিত হৈ তদন্ত প্ৰক্ৰিয়া আৰম্ভ কৰে। আৰক্ষীয়ে সমগ্ৰ ঘটনাটো তন্ন তন্নকৈ পৰীক্ষা কৰাৰ পাছতে ফাৰহানৰ ওপৰত সন্দেহ ঘণীভূত হয় আৰু ফাৰহানক জেৰা আৰম্ভ কৰে।
আৰক্ষীয়ে জেৰা আৰম্ভ কৰাৰ পাছতে ফাৰহানে আৰক্ষীৰ আগত মাতৃক ক্ৰিকেট বেট আৰু লোহাৰ পাইপেৰে আঘাত কৰি হত্যা কৰাৰ কথা স্বীকাৰ কৰে।
অভিযুক্ত ফাৰহানৰ মতে তেওঁ বিবাহ কৰোৱাবলৈ ইচ্ছা প্ৰকাশ কৰি আহিলেও তেওঁৰ মাতৃয়ে সেয়া তীব্ৰ বিৰোধ কৰি আহিছিল, যাৰফলত মাতৃ-পুত্ৰৰ মাজত নিয়মিতভাৱে কাজিয়াৰ সৃষ্টি হৈছিল।
লগতে পঢ়ক: প্ৰেমৰ টান! প্ৰেমিক আফ্ৰিকান বংশোদ্ভৱ ‘আধ্যাত্মিক গুৰু’ৰ বাবে সিংহাসন এৰিলে নৰৱেৰ ৰাজকুমাৰীয়ে
“মৃত মাতৃয়ে কমাৰ্চৰ স্নাতক ফাৰহানক বিয়াৰ কথা চিন্তা কৰাৰ আগতে চাকৰি বিচাৰিবলৈ কৈছিল। ভগ্নী আৰু জোঁৱায়েক ঘৰলৈ অহাৰ পিছত তেওঁ তেওঁলোকক কৈছিল যে তেওঁলোকৰ মাতৃ মজিয়াত পৰি আঘাতপ্ৰাপ্ত হৈ মৃত্যু হৈছিল।”- উপ পৰিদৰ্শকগৰাকীয়ে সংবাদ মাধ্যমক কয়।
আৰক্ষীয়ে বিষয়াগৰাকীয়ে প্ৰকাশ কৰা মতে অভিযুক্ত ফাৰহানে মোবাইলত ডাইনীৰ ভিডিঅ’ চাই তাৰদ্বাৰা প্ৰভাৱিত হৈছিল আৰু মাতৃকো ডাইনী হেন জ্ঞান কৰিবলৈ লৈছিল। ডাইনী হোৱাৰ বাবেই মাতৃয়ে তেওঁৰ বিবাহ বিৰোধ কৰি অহা বুলি ফাৰহানে বিশ্বাস কৰিবলৈ আৰম্ভ কৰিছিল আৰু সেই বিশ্বাসৰ ভিত্তিতে মাতৃক আক্ৰমণ কৰি হত্যা কৰে।
