শেহতীয়াকৈ অসমত বিৰোধী দলসমূহৰ বৈঠকত মিত্ৰজোঁটৰ ভিতৰত কংগ্ৰেছ আৰু ৰাইজৰ দলৰ সভাপতি অখিল গগৈৰ মাজত মতানৈক্যই সকলোৰে দৃষ্টি আকৰ্ষণ কৰিছে। আগন্তুক ’২৫ৰ বিধানসভা নিৰ্বাচনৰ পূৰ্বে আভ্যন্তৰীণ উত্তেজনাৰ বাবে শনিবাৰে সোণাপুৰৰ আতিথ্য ৰিজ’ৰ্টত অনুষ্ঠিত হোৱা আলোচনা অমীমাংসিত ভাৱে সমাপ্ত হয়।
অসম প্ৰদেশ কংগ্ৰেছ কমিটিৰ সভাপতি ভূপেন বৰাই দেওবাৰে ছ’চিয়েল মিডিয়াত বাংলা গীত “একলা চলো ৰে” শ্বেয়াৰ কৰে। তেওঁৰ পোষ্টটোত তেওঁ গীতটোৰ কেপচনত লিখিছে, ‘প্ৰি প’ল/ পোষ্ট প’ল’। বৰাৰ এই পোষ্টটোৱে বিৰোধী দলসমূহৰ মাজত থকা সম্পৰ্কক লৈ জল্পনা-কল্পনাৰ ইন্ধন যোগাইছে।
সোণাপুৰত অনুষ্ঠিত হোৱা বৈঠকত অখিল গগৈ আৰু কংগ্ৰেছৰ মাজত তীব্ৰ তৰ্ক-বিতৰ্কৰ সৃষ্টি হয়। গগৈৰ মন্তব্যত অসন্তুষ্ট হৈ কংগ্ৰেছৰ সাংসদ প্ৰদ্যুৎ বৰদলৈয়ে বৈঠকৰ মাজভাগতে সভাত্যাগ কৰে।
সভাৰ পাছত উপস্থিত কোনো এজনে সভাৰ ফলাফল সন্দৰ্ভত কোনো ৰাজহুৱা বক্তব্য নিদিলে। অৱশ্যে সকলোৱে স্বীকাৰ কৰিছিল যে আলোচনাত তীব্ৰ বিতৰ্ক আৰু শক্তিশালী বাক্যবাণৰ অৱতাৰণা হৈছিল। কোনো নেতাই এই বিষয়ে মুকলিকৈ কোৱা নাছিল যদিও শেহতীয়াকৈ ভূপেন কৰাৰ ৰহস্যময় ফেচবুক পোষ্টে যেন নিজৰ নিজৰ স্থিতিৰ ইংগিত দিছে।
শনিবাৰে নিশা বৈঠকৰ পৰা উভতি অহাৰ কিছু সময়ৰ পাছতে অখিল গগৈয়ে ফেচবুক পোষ্ট এটা শ্বেয়াৰ কৰি কয় যে আমি মতাদৰ্শগত বিষয়ত অটল হৈ থাকিম। আলোচনাৰ সময়ত তেওঁৰ আৰু কংগ্ৰেছৰ মাজত হোৱা মতানৈক্যৰ গভীৰতাৰ বিষয়ে এই পোষ্টটোৱে তীব্ৰভাৱে ইংগিত দিছিল।
