টি-২০ ক্ৰিকেটৰ ইতিহাসত এনেকুৱা এটা দিন আগতে কেতিয়াও অহা নাই। যিটো ভূটানৰ হাতলৈ আহিল। বাওঁহতীয়া স্পিনাৰ সোণম য়েশ্বেই আন্তঃৰাষ্ট্ৰীয় টি-২০ত এটা ইনিংছত ৮টা উইকেট দখল কৰি এক নতুন বিশ্ব অভিলেখ গঢ়িবলৈ সক্ষম হৈছে।
ম্যানমাৰৰ বিৰুদ্ধে পাঁচখন খেলৰ টি-২০ শৃংখলাৰ গেলেফুত তৃতীয়খন মেচত ২২ বছৰীয়া য়েশ্বেই এই ঐতিহাসিক কৃতিত্ব অৰ্জন কৰে। পৰিসংখ্যা—৪ অভাৰত ৭ ৰান দি ৮ টা উইকেট। ইয়াৰ পূৰ্বে টি-২০ আন্তঃৰাষ্ট্ৰীয় ক্ৰিকেটত পুৰুষ-মহিলা কোনো বলাৰৰ এনে অভিলেখ নাই।
এই ৮টা উইকেটৰ ভিতৰত ৬টা কেচৰ দ্বাৰা, এটা বোল্ড, এটা এলবিডব্লিউ। য়েশ্বেইৰ ধূৰ্ণীৰ সন্মুখত থিয় দিবই নোৱাৰিলে ম্যানমাৰৰ লাইন আপ । ভূটানে ১২৭ ৰানত অল আউট হোৱাৰ পিছত মাত্ৰ ৪৫ ৰানতে অল আউট হয় ম্যানমাৰ। ভূটানে ৮২ ৰানত জয়লাভ কৰে।
ইয়াৰ পূৰ্বে পুৰুষৰ টি-২০ত শ্ৰেষ্ঠ বলিং ফিগাৰৰ অভিলেখ আছিল মালয়েছিয়াৰ ছিয়াজৰুল ইদ্ৰুছৰ—২০২৩ চনত চীনৰ বিৰুদ্ধে ৮ ৰান দি ৭ উইকেট দখল কৰিছিল। মহিলা টি-২০ত শ্ৰেষ্ঠ অভিলেখ আছিল ইণ্ডোনেছিয়াৰ ৰোহমালিয়া ৰোহমালিয়াৰ—২০২৪ চনত মংগোলিয়াৰ বিৰুদ্ধে কোনো ৰান নিদিয়াকৈ ৭ উইকেট দখল। সোনম য়েশ্বে দুয়োটাকে অতিক্ৰম কৰিলে।
ভূটান আন্তঃৰাষ্ট্ৰীয় ক্ৰিকেট পৰিষদৰ সহযোগী সদস্য। এই পৰ্যায়ৰ বহু দেশৰ ক্ৰিকেটাৰ এতিয়াও অপেশাদাৰ। অৱশ্যে ভূটান ইয়াৰ ব্যতিক্ৰম। পুৰুষ আৰু মহিলা জাতীয় দলৰ ৩৬ গৰাকী ক্ৰিকেটাৰে কেন্দ্ৰীয় চুক্তিৰ অধীনত দৰমহা লাভ কৰে।
বৰ্তমান পুৰুষৰ টি-২০ ৰেংকিঙত ভূটান ৭৭ নম্বৰ স্থানত থকাৰ বিপৰীতে ম্যানমাৰ ৯৫ নম্বৰ স্থানত আছে। কিন্তু এই এখন মেচত ক্ৰিকেটৰ ইতিহাসত সোমাল সোণম য়েশ্বেৰ… এটা স্পেলেৰেই সলনি কৰি দিলে কাহিনী, এদিনতে লিখা বিশ্ব অভিলেখ।
