গেলেফু মাইণ্ডফুলনেছ চিটি প্ৰকল্পক লৈ ভাৰত আৰু অসমৰ সহায়ৰ প্ৰশংসা কৰিছে ভুটানৰ প্ৰধানমন্ত্ৰী শেৰিং টবগেই। ৰাষ্ট্ৰসংঘৰ সাধাৰণ সভাত ভাষণ দি টবগেই ভাৰতক ভুটানৰ এক বিশ্বাসযোগ্য বন্ধু হিচাপে উল্লেখ কৰাৰ লগতে এই গুৰুত্বপূৰ্ণ প্ৰকল্পত ভাৰতৰ প্ৰধানমন্ত্ৰী নৰেন্দ্ৰ মোদী আৰু অসম চৰকাৰৰ সহায়ৰ কথা উল্লেখ কৰে।
ভুটানৰ প্ৰধানমন্ত্ৰীয়ে কয় যে গেলেফু মাইণ্ডফুলনেছ চিটিৰ অৱস্থান ভাৰতৰ সীমান্তৰ একেবাৰে কাষতে। এই প্ৰকল্পক ভাৰত চৰকাৰৰ লগতে ভাৰতৰ চুবুৰীয়া ৰাজ্য অসমেও সহায় আগবঢ়াইছে বুলি তেওঁ উল্লেখ কৰে। টবগেইৰ মতে, ভাৰত-ভুটানৰ মাজৰ সম্পৰ্ক বিশ্বাস, পাৰস্পৰিক সন্মান আৰু সহযোগিতাৰ ওপৰত গঢ় লৈ উঠিছে।
টবগেইৰ এই মন্তব্যৰ পিছতে অসমৰ মুখ্যমন্ত্ৰী হিমন্ত বিশ্ব শৰ্মাই তেওঁক ধন্যবাদ জনায়। এক্সত দিয়া এটা পোষ্টত মুখ্যমন্ত্ৰীগৰাকীয়ে কয় যে অসমৰ উন্নয়ন আৰু গেলেফু মাইণ্ডফুলনেছ চিটি প্ৰকল্পত অসমৰ বিশেষ ভূমিকাক স্বীকাৰ কৰাৰ বাবে ভুটানৰ প্ৰধানমন্ত্ৰীক তেওঁ কৃতজ্ঞতা জনাইছে।
হিমন্ত বিশ্ব শৰ্মাই লগতে কয় যে ভাৰত আৰু ভুটানৰ সম্পৰ্ক বিশ্বাস, পাৰস্পৰিক সন্মান আৰু দুয়োখন দেশৰ একে লক্ষ্যৰ ওপৰত নিৰ্ভৰশীল। গেলেফু মাইণ্ডফুলনেছ চিটি প্ৰকল্পত অসমে নিজৰ ভূমিকা অব্যাহত ৰাখিব বুলিও তেওঁ উল্লেখ কৰে।
গেলেফু মাইণ্ডফুলনেছ চিটি ভুটানৰ দক্ষিণ অংশত গঢ়ি উঠি থকা এক বৃহৎ উন্নয়নমূলক প্ৰকল্প। অসমৰ সীমান্তৰ কাষতে অৱস্থিত এই অঞ্চলটোক ভৱিষ্যতে অৰ্থনীতি, বাণিজ্য, বিনিয়োগ আৰু যোগাযোগৰ এক গুৰুত্বপূৰ্ণ কেন্দ্ৰ হিচাপে গঢ়ি তোলাৰ পৰিকল্পনা কৰা হৈছে। ভুটান চৰকাৰৰ তথ্য অনুসৰি, এই প্ৰকল্পৰ জৰিয়তে দেশখনৰ অৰ্থনৈতিক বিকাশৰ লগতে আন্তঃৰাষ্ট্ৰীয় যোগাযোগো অধিক শক্তিশালী কৰাৰ লক্ষ্য লোৱা হৈছে।
গেলেফুৰ ভৌগোলিক অৱস্থানৰ বাবে অসমৰ ভূমিকাও বিশেষ গুৰুত্বপূৰ্ণ বুলি ধৰা হৈছে। ভাৰত আৰু ভুটানৰ মাজত সীমান্ত যোগাযোগ, বাণিজ্য আৰু অৰ্থনৈতিক সম্পৰ্ক অধিক শক্তিশালী কৰাৰ ক্ষেত্ৰত অসমৰ অৱস্থান এই প্ৰকল্পৰ বাবে বিশেষ তাৎপৰ্যপূৰ্ণ হৈ উঠিছে।
