আধাৰ কাৰ্ডক লৈ দেশজুৰি এক ব্যাপক চৰ্চা আৰম্ভ হৈছে আৰু জানিব পৰা মতে ভাৰতীয় বিশিষ্ট পৰিচয় প্ৰাধিকৰণ চমুকৈ ইউআইডিএআইয়ে আধাৰ কাৰ্ডৰ বৰ্তমানৰ গাঁথনিটোৰ এক আমূল পৰিৱৰ্তন কৰাৰ পৰিকল্পনা কৰিছে। শেহতীয়াকৈ নতুন এম-আধাৰ এপ মুকলি কৰাৰ পিছত এতিয়া কাৰ্ডখনৰ ডিজাইন সলনি কৰাৰ কথা চিন্তা-চৰ্চা কৰা হৈছে। খবৰ অনুসৰি ভৱিষ্যতৰ নতুন আধাৰ কাৰ্ডত নাগৰিকৰ নাম, ঠিকনা, জন্মৰ তাৰিখ বা সেই বিশেষ ১২ অংকৰ আধাৰ নম্বৰটো হয়তো কাৰ্ডৰ ওপৰত দৃশ্যমান হৈ নাথাকিব। ইয়াৰ পৰিৱৰ্তে ব্যক্তিজনৰ ফটোখনকহে মূল গুৰুত্ব প্ৰদান কৰা হ’ব আৰু সকলো ব্যক্তিগত তথ্য এটা বিশেষ কিউআৰ ক’ডৰ ভিতৰত লুকুৱাই ৰখা হ’ব। এই নতুন পদ্ধতিৰ ফলত সাধাৰণ ৰাইজৰ বিপদ হ’ব নে নিৰাপত্তা বৃদ্ধি পাব, সেই লৈ এতিয়া জনসাধাৰণৰ মাজত কৌতুহলৰ সৃষ্টি হৈছে।
ইউআইডিএআইৰ সূত্ৰৰ মতে আধাৰৰ এই নতুন ডিজাইনত নাগৰিকৰ ব্যক্তিগত তথ্যসমূহ বাহ্যিকভাৱে প্ৰকাশ নকৰি কেৱল এটা আধুনিক কিউআৰ ক’ডৰ জৰিয়তেহে উপলব্ধ কৰা হ’ব। কোনোবাই যদি কাৰোবাৰ তথ্য চাব বিচাৰে, তেন্তে নতুনকৈ মুকলি কৰা এম-আধাৰ এপৰ জৰিয়তেহে সেই ক’ড স্কেন কৰি তথ্য লাভ কৰিব পাৰিব। এই সমগ্ৰ প্ৰক্ৰিয়াটোত এটা আধুনিক স্পৰ্শ থকাৰ লগতে তথ্যৰ গোপনীয়তা ৰক্ষাৰ ওপৰত বিশেষ গুৰুত্ব দিয়া হৈছে। যিহেতু কাৰ্ডখনত তথ্যবোৰ মুকলিকৈ লিখা নাথাকিব, সেয়েহে অপ্ৰাসংগিকভাৱে আন ব্যক্তিয়ে কাৰোবাৰ ব্যক্তিগত তথ্য সংগ্ৰহ কৰাটো কঠিন হৈ পৰিব।
এই গুৰুত্বপূৰ্ণ সিদ্ধান্ত লোৱাৰ মূল কাৰণ হ’ল ডাটা বা তথ্য চুৰি ৰোধ কৰা আৰু অফলাইন ভেৰিফিকেচনৰ নামত হোৱা বিসংগতিসমূহ দূৰ কৰা। বৰ্তমান সময়ত আমি দেখা পাওঁ যে হোটেল, বিভিন্ন অনুষ্ঠানৰ আয়োজক বা অন্যান্য ব্যক্তিগত প্ৰতিষ্ঠানে পৰিচয় পত্ৰ হিচাপে আধাৰ কাৰ্ডৰ ফটোকপি বা তথ্য সংগ্ৰহ কৰে। কিন্তু আধাৰ আইন অনুসৰি এইদৰে তথ্য সংগ্ৰহ কৰা বা সংৰক্ষণ কৰাটো নীতিবিৰুদ্ধ। কাৰণ এইদৰে সংগ্ৰহ কৰা তথ্যৰ কোনো নিৰাপত্তা নাথাকে আৰু ইয়াৰ সুযোগ গ্ৰহণ কৰি চাইবাৰ অপৰাধীয়ে চিম কাৰ্ড জালিয়াতি, ভুৱা ঋণ লোৱা বা বেংকৰ পৰা অবৈধভাৱে ধন উলিওৱাৰ দৰে অপৰাধ সংঘটিত কৰে। এই নতুন পদ্ধতিটোৱে এনেধৰণৰ বিত্তীয় প্ৰৱঞ্চনাৰ পৰা নাগৰিকক সুৰক্ষা দিব বুলি আশা কৰা হৈছে।
যিহেতু নতুন পদ্ধতিটোত স্কেন কৰাৰ বাবে চৰকাৰী এপ ব্যৱহাৰ কৰিব লাগিব, গতিকে ইউআইডিএআইৰ ওচৰত সম্পূৰ্ণ খবৰ থাকিব যে কাৰ তথ্য কোনে আৰু কেতিয়া পৰীক্ষা কৰিছে। ইয়াৰ ফলত তথ্যৰ অপব্যৱহাৰ বহুখিনি হ্ৰাস পাব বুলি বিভাগীয় কৰ্তৃপক্ষই ধাৰণা কৰিছে। অৱশ্যে এই সকলোবোৰৰ মাজতে ৰাইজৰ মনত এটা ডাঙৰ প্ৰশ্ন উদয় হৈছে যে এই নতুন আধাৰ কাৰ্ড লাভ কৰিবলৈ আমি আকৌ শাৰী পাতিব লাগিব নেকি? নতুন কাৰ্ডৰ বাবে আবেদন কৰিব লাগিব নে চৰকাৰে নিজে ইয়াৰ আপডেটৰ ব্যৱস্থা কৰিব, সেই সন্দৰ্ভত এতিয়ালৈকে কোনো স্পষ্ট নিৰ্দেশনা অহা নাই। এতিয়া সময়তহে গম পোৱা যাব যে আধাৰৰ এই আমূল পৰিৱৰ্তনে সাধাৰণ মানুহৰ বাবে কি ধৰণৰ সুবিধা বা অসুবিধা কঢ়িয়াই আনে।
