জীৱনত আগবাঢ়ি যোৱাৰ ক্ষেত্ৰত এটা ভাল চাকৰি যিকোনো যুৱকৰ সপোন। যদি সেয়া চৰকাৰী হয় তেন্তে ‘সোণত সুৱাগা চৰা’। কিন্তু চৰকাৰী বিদ্যালয় এখনত শিক্ষকৰ চাকৰি পোৱাৰ পিছতে বিপদ আহিল বিহাৰৰ এজন যুৱকৰ জীৱনলৈ! তেওঁৰ অনুমতি অবিহনেই তেওঁৰ জীৱনৰ ডাঙৰ সিদ্ধান্ত লোৱা হৈ গ’ল। অচিনাকি ব্যক্তিৰ বিৰুদ্ধে অপহৰণ আৰু বিবাহৰ অভিযোগ উঠিল। জীৱনৰ ভয়ত বিয়া পাতিবলগীয়াও হ’ল। কিন্তু কইনাক কেন্দ্ৰ কৰিহে আছে ঘটনাৰ ‘টুইষ্ট’।
দৰাচলতে কি ঘটিছিল? বিহাৰৰ বেগুছৰাই জিলাৰ বাসিন্দা অবনীশ কুমাৰ। শেহতীয়াকৈ তেওঁ ৰাজ্যিক লোকসেৱা আয়োগৰ পৰীক্ষাত উত্তীৰ্ণ হৈ বিদ্যালয়ৰ শিক্ষক হিচাপে চাকৰি লাভ কৰে। অভিযোগ অনুসৰি, ঘটনাৰ দিনা শুকুৰবাৰে যুৱকজন ঘৰৰ পৰা স্কুললৈ গৈ আছিল। হঠাৎ প্ৰায় ১২ জন অচিনাক্ত লোকে তেওঁক ঘেৰি ধৰিলে। কিবা গম পোৱাৰ আগতেই তেওঁৰ ফালে বন্দুক টোৱাই গাড়ীত উঠিবলৈ ক’লে।
অভিযোগ অনুসৰি, অবনীশক বলপূৰ্বকভাৱে গাড়ীত উঠাই লৈ যায়। গাড়ীখন পোনে পোনে গৈ এটা মন্দিৰৰ সন্মুখত ৰৈ গ’ল। তাত ইতিমধ্যে উপস্থিত ৰঙা শাৰী পৰিহিতা এগৰাকী কইনা। যুৱকজনক বিয়া পাতিবলৈ কোৱা হয়। তেওঁ মান্তি নোহোৱাত, ভাবুকি দি অবনীশক বিয়া কৰিবলৈ বাধ্য কৰা বুলি অভিযোগ উঠিছে।
কিন্তু ইয়াতে টুইষ্ট আছে। বিয়াৰ অপেক্ষাত থকা কইনাৰ নাম গুঞ্জন। তেওঁ লক্ষীচৰাই জিলাৰ বাসিন্দা তেওঁ। গুঞ্জনৰ মতে, অবনীশৰ সৈতে তেওঁৰ চাৰি বছৰীয়া প্ৰেমৰ সম্পৰ্ক আছিল। প্ৰেমিক যুগলৰ বিয়াও হোৱাৰ কথা আছিল।
কিন্তু যুৱতীগৰাকীয়ে দাবী কৰিছে যে যুৱকজনে চাকৰি পাই সেই ‘প্ৰতিশ্ৰুতি’ পাহৰি যায়। কিন্তু তেতিয়ালৈকে গুঞ্জনে ঘৰত তেওঁলোকৰ সম্পৰ্কৰ কথা অৱগত কৰিছিল। ইফালে অৱনীশৰ সৈতে যোগাযোগ কৰিব পৰা নাই। সেয়ে উঠাই আনি বলপূৰ্বক বিবাহ। গুঞ্জনে কয়, “আমাৰ সংসাৰ আৰম্ভ কৰাৰ কথা আছিল। যিখন স্কুলত চাকৰি পাইছিল সেইখন স্কুললৈও মোকো লৈ গৈছিল। কিন্তু মই ঘৰত কথাটো কওঁতেই অবনীশে বিয়া পাতিবলৈ অস্বীকাৰ কৰে। এইটো কেনেকৈ মানি ল’ম?”
অৱশ্যে সমগ্ৰ অভিযোগ অস্বীকাৰ কৰি অলপতে চৰকাৰী চাকৰি পোৱা অবনীশে কয়, “মই সেই ছোৱালীজনীক চিনি নাপাওঁ। বাৰে বাৰে ফোন কৰি মোক হাৰাশাস্তি কৰিছিল। ঘটনাৰ দিনা একাংশ লোকে মোক অপহৰণ কৰিছিল। মোক মাৰপিট কৰিলে, জোৰ কৰি বিয়া পাতি দিলে। প্ৰতিবাদ কৰিলে মোক হত্যা কৰাৰ ভাবুকি দিছিল।”
কিন্তু ঘটনা ইয়াতেই শেষ হোৱা নাই। বিয়াৰ পিছত গুঞ্জন অবনীশৰ ঘৰলৈ যায়। তাতো অশান্তি ঘটে। অবনীশৰ পিতৃ-মাতৃয়েও তেওঁক কইনা হিচাপে গ্ৰহণ কৰিব বিচৰা নাই। অৱশেষত কইনাই থানাত অভিযোগ দিলে। বিপৰীতে অপহৰণ আৰু নিৰ্যাতনৰ অভিযোগ দাখিল কৰে অবনীশে। আৰক্ষী বিবুধিত। অৱশ্যে এয়াই প্ৰথমবাৰৰ বাবে নহয়, খবৰ পোৱা গৈছে যে এইবাৰ বিহাৰ আৰক্ষীয়ে এই ধৰণৰ অভিলেখ সংখ্যক অভিযোগ লাভ কৰিছে।
