অসম সন্তান ৰিয়ান পৰাগৰ বিস্ফোৰক ইনিংছৰ সহায়ত ৰাজস্থান ৰয়েলছ দলে আজি ছানৰাইজাৰ্ছ হায়দৰাবাদৰ বিৰুদ্ধে ৰোমাঞ্চকৰ বিজয় সাব্যস্ত কৰে।
ৰিয়ানৰ উপৰি ৰাজস্থানৰ জয়ৰ আঁৰত ৰাহুল তেৱেতিয়াও গুৰুত্বপূৰ্ণ ভুমিকা গ্ৰহণ কৰে।
স্বাহৰুদ্ধকাৰী মেচখনত ৰিয়ানে অন্তিম অভাৰৰ ৫ নম্বৰ বলত ৬ কোবাই দলক জয়ী কৰায়। জয়ী হোৱাৰ পিছতে বিজয়ৰ আনন্দত ৰিয়ান পৰাগে খেলপথাৰত বিহু নাচি দিয়া পৰিলক্ষিত হয়।
ৰিয়ানে ২৬ টা বলত ৪২ ৰান কৰে আৰু ৰাহুলে কৰে ২৮টা বলত ৪৫ ৰান৷
উল্লেখ্য যে ছানৰাইজাৰ্ছ হায়দৰাবাদে প্ৰথমে বেট ধৰি ডেভিড ৱাৰ্নাৰৰ ৪৮, মনিষ পাণ্ডেৰ ৫৪ আৰু কেন উইলিয়ামছনৰ ২২ ৰানৰ সহায়ত ১৫৮ ৰান সংগ্ৰহ কৰে।
ইয়াৰ প্ৰত্যুত্তৰত বেট ধৰিবলৈ অহা ৰাজস্থানে মাত্ৰ ২৬ ৰানতে বেন ষ্টোকছ, জছ বাটলাৰ আৰু স্মিথৰ উইকেট হেৰুৱাই শলঠেকত পৰে।
পিছত উথাপ্পাই দলৰ স্ক’ৰব’ৰ্ড আগুৱাই নিবলৈ যত্ন কৰে যদিও সম্পূৰ্ণৰূপে ব্যৰ্থ হয়। উথাপ্পাৰ উইকেট পতনৰ পিছতে বেটিং কৰিবলৈ আহে অসম সন্তান ৰিয়ান পৰাগ।
প্ৰথম অৱস্থাত মন্থৰ গতিৰে নিজৰ ইনিংছ আৰম্ভ কৰা ৰিয়ানে ১৫ অ’ভাৰৰ পৰা সতীৰ্থ ৰাহুল তেৱেতিয়াৰ সৈতে লগ লাগি দলক গতি দিবলৈ আৰম্ভ কৰে।
ৰোমাঞ্চকৰ হৈ উঠা মেচখনৰ অন্তিম অভাৰত ৬ ৰানৰ প্ৰয়োজন হোৱাত পাঁচ নম্বৰ বলটোত ৰিয়ানে ছয় কোবাই দলক বিজয়ী কৰোৱায়।
