দেশৰ পাঁচখন ৰাজ্যত বাৰ্ড ফ্লুৱে ইতিমধ্যে সংহাৰীৰূপ ধাৰণ কৰিছে।
ইয়াৰ ভিতৰত দক্ষিণৰ কেৰেলাও অন্যতম।
কেৰেলা চৰকাৰে বাৰ্ড ফ্লুৰ বাবে ৰাজ্যত সতৰ্কতা জাৰি কৰাৰ পিছতে ৰাজ্যখনৰ ক্ষতিগ্ৰস্ত হাঁহ পালকসকলক ক্ষতিপূৰণ দিয়াৰ বাবে সিদ্ধান্ত গ্ৰহণ কৰিছে।
বাৰ্ড ফ্লুৰ সংহাৰত বিধ্বস্ত ৰাজ্যখনৰ আলাপ্পুঝা আৰু কট্টায়ম জিলা দুখনৰ হাঁহ পালকসকলক কেৰেলা চৰকাৰৰ কেবিনেটে ক্ষতিপূৰণ দিয়াৰ সিদ্ধান্ত গ্ৰহণ কৰিছে।
কেবিনেটত লোৱা সিদ্ধান্ত অনুসৰি হাঁহ পালকসকলে দুমহীয়া প্ৰতিটো হাঁহৰ বাবদ ১০০ টকা আৰু দুমাহতকৈ উৰ্দ্ধৰ প্ৰতিটো হাঁহৰ বাবে লাভ কৰিব ২০০ টকাকৈ ক্ষতিপূৰণ।
আনহাতে নষ্ট হোৱা প্ৰতিটো হাঁহৰ কণীৰ বাবে দিয়া হ’ব পাঁচ টকাকৈ ক্ষতিপূৰণ।
ইফালে পালক সংগঠনসমূহ চৰকাৰৰ এই পৰিমাণৰ ক্ষতিপূৰণ প্ৰদানৰ সিদ্ধান্তত সন্তুষ্ট নহয় বুলি প্ৰকাশ কৰিছে।
সংগঠসমূহে পশুপালন মন্ত্ৰী কে ৰাজুলৈ তেওঁলোকৰ অসন্তুষ্টিৰ কথা অৱগত কৰি এক পত্ৰ প্ৰেৰণ কৰা হ’ব বুলিও জানিবলৈ দিছে।
আনহাতে, পশুপালক মন্ত্ৰী কে ৰাজুৱে আলাপ্পুঝা জিলাৰ হাঁহ পালকসকলৰ সৈতে বাৰ্ড ফ্লুৰ বীজাণু সংক্ৰমণ ৰোধ কৰাৰ বাবে আলোচনাত মিলিত হৈছে।
উল্লেখ্য যে ৰাজ্যখনৰ আলাপ্পুঝা আৰু কুট্টায়াম জিলা দুখনৰ ৫০ হাজাৰ বীজাণু সংক্ৰমিত হাঁহ ইতিমধ্যে নিধন কৰা হৈছে।
