পানীত প্ৰয়োজনতকৈ অধিক ফ্লৰাইডৰ উপস্থিতি; অসমত নিষিদ্ধ Bisleri

অসম চৰকাৰৰ খাদ্য সুৰক্ষা বিভাগে পেকেজ ড্ৰিংকিং ৱাটাৰ বিশলেৰীৰ বিক্ৰী অসমত নিষিদ্ধ কৰিছে।

‘প্ৰভিজনছ অব ফুড ছেফটি এণ্ড ষ্টেণ্ডাৰ্ড এক্ট, ২০০৬’ৰ আওতাত অসমত বিশলেৰীৰ বিক্ৰী নিষিদ্ধ কৰা হৈছে।

জানিব পৰা মতে, অসম চৰকাৰৰ খাদ্য সুৰক্ষা বিভাগৰ এটা পৰীক্ষাত বিশলেৰীৰ পানীত প্ৰয়োজনীয় মাত্ৰাতকৈ অধিক পৰিমাণৰ ফ্লৰাইডৰ উপস্থিতি ধৰা পৰা বাবেই ব্ৰাণ্ডটোৰ পানী বজাৰত বিক্ৰী নিষিদ্ধ কৰা হৈছে।

এপ্ৰিলৰ ৬ তাৰিখে বিভাগে পানীৰ নমুনা সংগ্ৰহ কৰিছিল।

উল্লেখযোগ্য যে, কামৰূপ (গ্ৰাম্য) জিলাৰ কমলপুৰ অঞ্চলত বিশলেৰীৰ উৎপাদন কেন্দ্ৰ আছে।

ৰাজ্যত বিশলেৰীৰ পানী বিক্ৰীৰ ওপৰত ৩০ দিনৰ বাবে এই নিষেধাজ্ঞা বাহাল থাকিব।

পৰৱৰ্তী সময়ত প্ৰতিষ্ঠানটোৱে তেওঁলোকৰ পানী পৰিষ্কাৰ বুলি প্ৰমাণ কৰি পুনৰ বিক্ৰীৰ বৈধতা ঘুৰাই ল’ব পাৰিব।

পানী বিক্ৰীৰ ক্ষেত্ৰত অসমত তথা উত্তৰ-পূবত বিশলেৰীয়ে বৃহৎ বজাৰ দখল কৰি আহিছে।

খাদ্য সুৰক্ষা বিভাগৰ দ্বাৰা ঘোষিত এই নিষেধাজ্ঞাৰ ফলত প্ৰতিষ্ঠানটো যথেষ্ট লোকচানৰ সন্মুখিন হ’বলগীয়া হ’ব।