বিশ্বনাথৰ কোৱাৰেণ্টাইন চেণ্টাৰৰ পৰা ২৩ জুলাইত পলায়ন কৰা কোভিড পজিটিভ আলমিন শ্বেখক শুকুৰবাৰে বিশ্বনাথ আৰক্ষীয়ে কৰায়ত্ত কৰে।
বিশ্বনাথৰ আমবাৰীত থকা এখন জংঘলত লুকাই আছিল আলমিন।
কৰায়ত্ব কৰাৰ পাছত আলমিনক ১০৮ সেৱাৰে বালিচাং চিকিৎসালয়লৈ লৈ যোৱা হয়।
উল্লেখ্য যে আলমিন শ্বেখৰ ঘৰ পশ্চিমবংগৰ মুৰ্ছীদাবাদত ৷
চতিয়াৰ উদয়পুৰৰ এটা ভাড়াঘৰত থাকি গাঁৱে গাঁৱে বস্তু বিক্ৰী কৰিছিল যুৱকজনে ৷
২০ জুলাই তাৰিখে কলকাতাৰ পৰা অহা আলমিনক বিশ্বনাথ মহাবিদ্যালয়ৰ কোৱাৰেণ্টাইন কেন্দ্ৰত ৰখা হৈছিল।
কিন্তু ২২ জুলাই তাৰিখে নিশা কোভিড পজিটিভ হোৱাৰ খবৰ পোৱাৰ পিছতে পলায়ন কৰিছিল যুৱকজনে ৷
আৰক্ষীৰ তৎপৰতাত অতি কৌশলেৰে আটক কৰিবলৈ সক্ষম হয় যুৱক জনক।
ৰাজ্যখনত কোভিড-১৯ৰ সংক্ৰমণ বৃদ্ধি পোৱালৈ চাই জনসাধাৰণে সাৱধানতা অৱলম্বণ কৰাৰ লগতে নীতি-নিৰ্দেশনাসমূহো পালন কৰাটো জৰুৰী হৈ পৰিছে।
কোভিড-১৯ পজিটিভ ৰোগীয়ে নিজকে আন ব্যক্তিৰ পৰা নিলগাই ৰখাটো অত্যন্ত জৰুৰী বিবেচিত হোৱাৰ সময়তে এনেদৰে এগৰাকী পজিটিভ ৰোগী কোৱাৰেন্টাইন চেন্টাৰৰ পৰা পলায়ন কৰাৰ পাছত স্বাভাৱিকতে শংকা বৃদ্ধি পাইছিল।
অৱশেষত আৰক্ষীয়ে আটক কৰি আলমিন শ্বেখক পুনৰ চিকিৎসালয়লৈ প্ৰেৰণ কৰাৰ খৱৰে ৰাইজক স্বস্তি আনি দিছে।